Read Bawm Chin NUMBER 17 Bible Online

NUMBER 17 - Bawm Chin bible

NUMBER 17

¹LALPA nih Mosi sinah

²Israel mi zapi tla nih phun kip lakah mi ruitu pakhat chiau ṭhianṭhunh leinih a nan pêk ding hen simh na. An ṭhianṭhunh chiauah anmah min rîn na le.

³Aron min chu Levi phun ruangrûl mi ṭhianṭhunh lakah rîn. Phun kip ruitu nih ṭhianṭhunh pakhat chiau nei ding asi.

⁴Ka umnâk Puanin ah kalpi le, ka nan tawngnâk ding mun Thudântuk Bâwm mâika ah siah rawh.

⁵Ka thîm mi minung ṭhianṭhunh chu a hawng chawrh lai. Hi hâwi hen Israel mi tla na lakah an chipchiarnâk chu ka bângtir awt,” a ti.

⁶Churawhchun, Mosi nih Israel mi tla sinah chun, “Ruitu kip sinah ṭhianṭhunh pakhat pêk chiau u, phun khat ruangrûl ah pakhat chiau, a ektê hen leinih, Aron tâ khawm an sinah siah bâk u,” a ti.

⁷Mosi nih ṭhianṭhunh tla chu LALPA Thudântuk Bâwm mâika ah Puanin ah a siah hep.

⁸A thâituan ah Mosi chu Puanin ah a va kal le, Levi phun ruangrûl ah mi Aron ṭhianṭhunh chu chawrh hen a muh rawh. A kukulul a tuah le, a pâr le, almon rah min a hawng suah.

⁹Mosi nih ṭhianṭhunh zawzawng a lâk le, Israel mi tla a zauhtir na. Thil a hawng um mi chu an muh le, ruitu kip nih mah ṭhianṭhunh chu an lâk nawlh.

¹⁰LALPA nih Mosi sinah, “Aron ṭhianṭhunh chu Thudân tuk Bâwm mâika ah siah rawh. Israel hel mi tla an chipchiarnâk an bâng lo chun an thi ding mi theihtirnâk dingah kil ding asi,” a ti.

¹¹Mosi nih LALPA thupêk hâwi hen a ti rawh.

¹²Mi zapi tla nih Mosi sinah, “Chu hâwi asi chun kan dawng rawh ma chu!

¹³Mi âuzawng Puanin naihtu chu thi ding asi chun kan ektê hen ṭha khawmsele kan thi mi rawh,” an ti.