Read Bawm Chin NUMBER 19 Bible Online

NUMBER 19 - Bawm Chin bible

NUMBER 19

¹LALPA nih Mosi leh Aron chu

²hi bang dân tla hi Israel tla pêk ding hen thu a pêk na. Chaw nunau a sen mi sâwinâk umlo mi leh rianṭuannâk ah mang lo mi hawng put le,

³Eleazar bâwlpu sinah pêk. Riakmun lênglei ah kalpi sele, a umnâk ah thah seh.

⁴Churawhchun Eleazar nih a thî chu lâk sele, Puanin mâilei a kutdawng hen vei sarih theh seh.

⁵Chu ran chu a vun, a sâ, a thî leh a ril a pum hen bâwlpu mâika ah a duah ding asi.

⁶Churawhchun sidar, husop ṭeng leh lazâi sen a lâk lai le, mei ah a paih lai.

⁷Chu nûnah chun a nipuan tla a suk lai le, tak â khawlh lai le, chu tikah riakmun ah a lût kho lai; sikhawmsele zânlei tiang hen thianglo ah ngaih asi lai.

⁸Chaw duahtupa khawm nih a puan a suk lai le, tak â khawlh lai, sikhawmsele zânlei tiang thianglo ah ngaih asi lai.

⁹A thiang mi pa nih chaw dap a pumh lai le, dân hâwi hen riakmun lêngah mun thenhlimh mun ah a siah lai, Israel mi zapi tla an nâwmnâk dân hâwi hen thiangtirnâk tî rangah mang ding hen chunah chun an kil ding asi. Hi dân hâwi hen sual thiangtirnâk ti dân chu asi.

¹⁰Chu dap pumhtu nih a puan a suk lai le, sikhawmsele zânlei tiang thianglo hen ngaih asi lai. Hi hi Israel mi leh ramdang an sinah um mi tla rangah zeiliau zawngah an dân si kumza ding asi.

¹¹Ruak tawnghtu zawng chu dân hâwi hen ni sarih kar a thianglo asi.

¹²Thenhlimhnâk tî hen a ni thum ni ah leh a ni sarih ni ah a thenhlimhtir ding asi, chu tikah a thiang lai rawh. Sikhawmsele chu hâwi hen a ni thum ni ah leh a ni sarih ni ah amah â thenhlimhtir lo chun thenhlimh lo asi lai.

¹³Âuzawng ruak a tawngh hen amah â thenhlimhtir lo chun thianglo asi lai, thenhlimhnâk tî chu a lakah theh asi lo ruangah. LALPA Puanin chu a nawmh le, Pathian mi ah ngaih asi lai lo.

¹⁴Mi âumawh puanin ah a thi chun, a thih liauah puanin sungah um mi mawh a va lûttu chu dân hâwi hen ni sarih kar thianglo asi.

¹⁵Tî sâwknâk leh bêl puanin sungah mi a sinh a umlo mi chu a nâwm hep asi.

¹⁶Mi âu nih mawh, thah mi minung mawh, amah thih hen lêng ah a thi mi mawh tawnghtu mawh âu ruh mawh thlân mawh tawnghtu chu ni sarih kar thianglo ah ngaih asi.

¹⁷Chu nâwmnâk chu thiangtir ding hen chun chaw a sen mi sual thiangnâk dingah duah mi dap lâk sele, bêl ah siah hen tî telh seh.

¹⁸A masachem hen a thiang mi pa nih husop ṭeng a lâk lai le, tî lakah a nîm lai le, puanin, a sungah mi thil tla leh chunah mi zapi um mi tla khawm a theh lai. A panihnâk chu, mi âumawh a thiang mi nih chu tî hen chun ruh tawnghtu leh ruak tawnghtu leh thlân tawnghtu chu a theh na lai.

¹⁹A ni thum ni ah leh a ni sarih ni ah a thiang mi pa nih a thianglo mi pa rangah tî chu a theh ding asi. A ni sarih ni ah chun a thenhlimhtir ding mi minung chu a nipuan a suk lai le, tak â khawlh lai le, nî a tlâ chun dân hâwi hen a thiang lai rawh.

²⁰Mi dân hâwi hen thianglo mi chu amah â thiangtir lo chun thianglo hen a um kumza lai, thenhlimhnâk tî hen tak â khawlh lo ruangah. LALPA Puanin chu a nawmh ruang chun Pathian mi ah ngaih asi lai lo rawh.

²¹Hi bang dân tla hi zeiliau zawngah nan mang kumza ding asi. Mi thiangnâk tî hen theh mi khawm nih puan a suk ding asi; âuzawng nih tî chu a tawngh chun zânlei tiang a nâwm asi.

²²Chun, mi thianglo nih a tawngh mi zawng chu a thianglo asi, âuzawng a tawnghtu chu zânlei tiang hen a thianglo asi.