Read Bawm Chin NUMBER 20 Bible Online

NUMBER 20 - Bawm Chin bible

NUMBER 20

¹A thla khatnâk ah Israel tla chu Zin ramkaro ah an hawng tleng le, Kades ah mun an khuar. Chunah chun Miriam a thi le, an vûi.

²Chunah an umnâk ah chun tî rerêng a um lo, zapi tla chu Mosi leh Aron kiangah an hawng a pûm le,

³an vûirâm, “LALPA Puanin mâiah kan hâwi Israel tla hen thi hep sele a ṭha dauh lai.

⁴Zeirangah hi ramkaro ah hin nan hawng kan kalpi êu? Hinah kan ran tla hen thi ding ko ma asi awt?

⁵Zeirangah Aigupta ram ah mi hi hamhkâi tak zeikhawm a kho lonâk mun ah nan hawng kan kalpi êu? Fâng, theipi, grep, pomegranate khawm a um lo. Tî din ding men a um lo!” an ti.

⁶Mosi leh Aron chu mi zapi lakah mi anna kiang ving le, Puanin mâika ah an va dîr. Tual leiah an mâi hawih hen an buk le, LALPA umnâk chêu mitser rê mi chu an sinah a hawng lang.

⁷LALPA nih Mosi sinah,

⁸“Thudântuk Bâwm mâika mi ṭhianṭhunh kha lâk le, nang leh Aron nih zapi zawzawng pumh na u. An mâika mi lungpi sinah thu va sim rawh, churawhchun tî a hawng suak lai. Hi hâwi hen zapi minung rangah lungpi thawk hen tî na lâk piak na lai le, anmah leh an ran tla din ding hen,” a ti.

⁹Mosi nih chun LALPA thupêk hâwi hen a kal le, ṭhianṭhunh chu a lâk rawh.

¹⁰Lungpi kiangah Mosi leh Aron nih mi zapi tla chu an pumh na le, Mosi nih, “Mi hel tla, ngâi u! Nan rangah hi lungpi thawk hen tî kan lâk piak na lai ma?” a ti.

¹¹Churawhchun, Mosi nih ṭhianṭhunh a lirh le, lungpi chu vei nih a vuak, churawhchun tî tamtak a hawng luang le, zapi leh ran tla nih an din rawh.

¹²Sikhawmsele LALPA nih Mosi leh Aron rangah fâk tak hen a fâi na. “Ka thiltikhonâk thenhlimh Israel mi tla mâika ah langhtir ding hen lungnâk nan nei tâwk lo ruangah, pêk ding hen ram ka tiamh na mi ram ah nan lûtpi kho na lai loh,” a ti.

¹³Hi hi Meribah ah, Israel mi tla LALPA tlûnah an chipchiar le, a thenhlimhnâk a zauhtir na mi mun ah a hawng um mi asi.

¹⁴Mosi nih Kades thawk hen Edom lalchem sinah mi a fial. “Hi thuchah hi nangmah chi-leh-kuang Israel phun tla thawk hen mi asi. Thil harsa kan tuar mi khawm na theih,

¹⁵kan thlâktu tla Aigupta ram ah an kal le, chunah kum tamtak kan um rawh mi khawm na theih. Aigupta mi tla nih kan thlâktu tla hen thungâi hawng kan nehsawh,

¹⁶LALPA sinah ṭangpi deih hen kan âu. Kan âu hâu chu a theih le, Aigupta ram ah mi hawng kan suah ding hen vânmifial a hawng fial. Tuah chun na ramri ah mi khuapi Kades ah kan um.

¹⁷Na ram pal hen lan ding zângfahtê hen hawng kan siang piak râu rawh. Kan ran tla hen nan phâisen leh grep dûm leiah pial lo hen nan tikhurchawh ah mi tî khawm kan din awt lo, a lampi tê ah na ram lanh tiang kan kal lai,” an ti.

¹⁸Edom mi tla nih an sâng le, “Kan ram pal hen nan lan ding kan siang lo! Nan kal êu chun, kan hawng lai le, kan do na awt,” an ti.

¹⁹Israel mi tla nih, “Lampi tê hen kan kal lai le, nan tî kan ran tla nih an din chun a man kan pêk na lai, lan ding cho kan duh,” an ti.

²⁰Edom mi tla nih an sâng nawlh le, “Kan siang lo rerêng,” an ti le, an kawrsen chak tla hen Israel mi tla do ding hen an suak rawh.

²¹Edom mi tla nih an ram lan ding an siang lo ruangah Israel tla chu anna lêt le, lam dang leiah an kal rawh.

²²Israel mi zapi tla nih Kades chu an mâk le, Hor Tlâng Edom ramri an va tleng.

²³Chunah LALPA nih Mosi leh Aron sinah,

²⁴“Aron lam chu Israel tla rangah ram ka tiamh mi lakah a lût lai lo; a thi lai, Meribah ah ka thupêk nan ngâi lo le, nan panih hen nan hel ruangah.

²⁵Aron leh a fapa Eleazar hi Hor Tlâng ah kâipi na le,

²⁶chunah chun Aron bâwlpu thuam chu lît le, Eleazar rangah ruktir. Chunah chun Aron chu a thi lai rawh,” a ti.

²⁷Mosi nih LALPA thupêk hâwi hen a ti rawh. Israel zapi mitmuh ah Hor Tlâng ah an kâi rawh.

²⁸Mosi nih Aron bâwlpu thuam chu a lît le, Eleazar a ruktir rawh. Chu tlâng ah chun Aron chu a thi le, Mosi leh Eleazar chu an kîr rawh.

²⁹Zapi minung tla nih Aron a thi mi an theih le, ni sâwmthum an ulh rawh.