Read Bawm Chin NUMBER 21 Bible Online

NUMBER 21 - Bawm Chin bible

NUMBER 21

¹Kanaan mi Arad lalchem Kanaan ram simlei kângah um mi nih Atharim lampi leiah Israel tla an hawng ti a theih le, mi zeimaw mi chu a do na le, a tleih na.

²Churawhchun, Israel tla nih LALPA sinah thutiamnâk an nei: “Hi minung tla nehtu ah na kan siam chun, anmah tla chu ka nan pêk lai le, an khuapi tla khawm kan pêk lai le, kan râwk dep lai,” an ti.

³LALPA nih a ngâi piak na le, Kanaan mi tla chu neh ding hen ṭangpi na. Churawhchun Israel tla nih anmah leh an khuapi tla an veih dep na le, chu mun min ah chun Hormah[3] an ti.

⁴Israel mi tla nih chun Hor Tlâng chu an mâk le, Akaba leiah a kal mi lampi zawh hen Edom ram chu an rial. Sikhawmsele mi zapi tla chu lampi ah an nengtawr rawh le,

⁵Pathian leh Mosi rangah an sâwi rawh. An chipchiar le, “Zeirangah Aigupta ram ah mi hi ramkaro buh leh tî umlo nâk ah thi ding hen na hawng kan kalpi êu? Hi buh khawm hi kan neng zuk rawh!” an ti.

⁶Churawhchun LALPA nih mi zapi lakah rûl tûrnei tla a fial le, Israel tla chu an chuk na le, cherkhet an thi rawh.

⁷Mi zapi tla chu Mosi sinah an hawng le, “LALPA leh nangmah kan sâwi na mi hi kan sual asi. Tuah hi bang rûl tla hi kiangtir ding hen LALPA sinah thlacham,” an ti. Churawhchun Mosi nih zapi minung tla rangah thla a cham piak na rawh.

⁸Chun, LALPA nih Mosi chu dâr rûl siam hen thingtluan pâr ah thlâi hen, rûl chuk mi âuzawng nih an zauh chun an dam khonâk ding hen ti ding hen a simh.

⁹Churawhchun Mosi nih dâr rûl a siam le, thingtluan pâr ah a thlâi. Âuzawng rûl nih a chuk na mi, chu dâr rûl chu an zauh chun an dam vima.

¹⁰Israel mi tla chu anna ṭhial le, Oboth ah mun an khuar.

¹¹Chu mun an kaltâk nûnah chun Abarim a râwk mi munah Moab ramri saklei kâng ramkaro ah mun an khuar.

¹²Churawhchun Zered Vakuam ah mun an khuar rawh.

¹³Chu thawk hen chun anna ṭhial nawlh le, Arnon Tiva marlei kâng Amor mi ramri dêng khet hen um mi ramkaro ah mun an khuar. (Arnon chu Moab mi leh Amor mi anna kar ramri asi.)

¹⁴Churuangah asi, LALPA râltuknâk bu ah chun, “Suphah bial ah Waheb khua leh Arnon Tivakuam,

¹⁵tivakuam tlâng, Moab ramri leikângah Ar khua tiang hen an ti mi chu,” a ti.

¹⁶Chu thawk hen an kal vima le, Tikhurchawh tla an ti mi mun lei, LALPA nih Mosi sinah, “Zapi minung hawng pumh na le, tî ka pêk na lai,” a tinâk mun ah an tleng rawh.

¹⁷Chuliau chun Israel tla nih hi la hi an sak: “Tikhurchawh tla, nan tî hawng suah u; La hen chibai kan bûk lai

¹⁸Chu tikhur chu lal tla leh Mi zapi ruitu tla chawh mi asi, Lalchem ṭhianṭhunh leh An ṭhianṭhunh hen chawh mi asi,” ti hen. Ramkaro thawk hen Mattanah ah an kal le,

¹⁹chu thawk hen Nahaliel ah an kal. Nahaliel thawk hen Bamoth ah an kal,

²⁰Bamoth thawk hen Moab ram kuam Pisgah Tlâng tang ramkaro chuanhnâk ah an kal.

²¹Israel tla nih Amor mi Sihon lalchem sinah mi an fial:

²²“Na ram lakah hawng kan lantir. Nan phâisen leh nan grep dûm khawm kan pal awt lo, nan tikhurchawh mi tî khawm kan din awt lo, lampi tê hen nan ram lanh tiang kan kal awt,” an ti.

²³Sikhawmsele Sihon nih Israel tla a ram sungah lan ding a siang lo. A kawrsen a pumh le, Jahaz leikâng ramkaro ah a va kal le, Israel tla chu a va do na.

²⁴Sikhawmsele Israel tla nih an mêlma tla chu tuknâk ah tamtak an thah na le, marlei mi Amon Tiva thawk hen Jabok tiang, Amon murui umnâk tiang an luah, chu chu Amon mi tla leikâng asi, Amon mi tla ramri chu vêng thlir asi ruangah.

²⁵Churawhchun Israel mi le nih Amor khuapi tla zawzawng an lâk le, Hesbon leh a kiangkam mi khua tla khawm an lâk le, chunah chun an um.

²⁶Hesbon chu Amor lalchem Sihon umnâk khuapi asi, amah chu a lânah Moab lalchem dotu asi le, Amon Tiva tiang hen a ram zawzawng a lâk piak.

²⁷Churuangah asi la phuahtu nih, “Sihon lalchem khuapi Hesbon ah hawng u! Tharh hen remhnawlh mi chu muh kan duh.

²⁸Hi khuapi Hesbon thawk hen veikhat chu Sihon kawrsen tla chu mei hâwi hen an suak; Moab ram ah mi Ar khuapi chu a râwk dep, Arnon tlûnlei mi tlâng tla khawm a veih dep.

²⁹Moab mi tla, nan rang ṭihnung a kâi chiam e! Nannih Kemos sawnhtu tla, nan vei rawh! Nan pathian nih ramdang ah an dawrtir na, Nan nunau tla chu Amor lalchem sal ah an lût rawh.

³⁰Sikhawmsele tuah an thlâk tla chu an vei rawh le, Hesbon thawk hen Dibon tiang hen, Nasim thawk hen Medeba kiangah mi Nophah tiang hen an veih hep na,” an ti mi chu.

³¹Churawhchun Israel mi tla chu Amor mi tla ram ah an um le,

³²Mosi nih Jazer khuapi do ding hen lampi ṭha hâwl ding hen mi a fial na. Israel tla nih Jazer khuapi leh a kiangkam khua tla chu an lâk ver le, Amor tla chunah um mi tla chu an nar phin na.

³³Chun, Israel tla chu anna her le, Basan lei kalnâk lampi an zawh le, Og, Basan lalchem chu a kawrsen tla hen Edrei ah anmah tla do ding hen an va kal.

³⁴LALPA nih Mosi sinah, “Amah chu ṭih rîlmâl lah, amah nehtu ah ka nan siam lai, a minung leh a ram zawzawng khawm ka nan pêk lai. Sihon lakah na ti hawi hen Hesbon ah lâirêltu Amor lalchem lakah ti rawh,” a ti.

³⁵Israel tla nih Og leh a fapa tla leh a mi tla chu an thah na, pakhat khawm an zuah na lo, churawhchun a ram chu an luah piak rawh.