Read Bawm Chin NUMBER 24 Bible Online

NUMBER 24 - Bawm Chin bible

NUMBER 24

¹Israel tla chu LALPA nih malsâwm na ding a duh ti Balaam nih a theih rawh chun, chu tan chu a lânah a ti hâwi hen simhkannâk hâwl hen a kal lo rawh. Balaam chu ramkaro leiah a pial le,

²Israel tla chu a phun phun hen mun an khuar mi a muh na. Pathian thlarau nih a mang le,

³hi thu hi a sim rawh: “Beor fapa Balaam thuchah, Minung thu fiang tak a theihthiam khotu,

⁴Pathian nih thu a sim mi theihkhotu Pathian chak tak thawk hen langhnâk lakah mit zauh hen ka muh.

⁵Israel puanin tla chu â dawh a!

⁶Tûmkûng tlar sâu tak hawi mawh Tiva kap mi dûm tla hâwi, LALPA nih aloe thing a phun mi hâwi mawh Sidar thing tiva kap mi hâwi asi.

⁷Ruahtî tamtak anna ting lai le, Tî umnâk phâisen ah an thlâi an chîng lai. An lalchem chu Agag ngâk hen a rokual lai le, A lâirêlnâk chu a sâwt hen a kâu lai.

⁸Aigupta ram ah mi Pathian nih a suakpi na; Ram chawchal hâwi hen a do piak na. An mêlma tla chu an veih phin na le, An ruh tla an khiak le, An thalzum tla an khiak dip.

⁹Chu phun chu chakeibaknei chak tak hâwi asi le, A it liauah âukhawm nih an thawh ngam lo. Âuzawng Israel malsâwmtu chu malsâwm hen a um lai le, Âuzawng Israel siatbarhtu chu siatbarh asi bâk lai,” a ti.

¹⁰Churawhchun, Balak chu a thinrun tukah a kut a tum le, Balaam sinah, “Ka mêlma tla siatbarh ding hen kan kawh le, sikhawmsele tuah veithum bo siatbarh na ngâk hen mal lam na sâwm na.

¹¹Tuah na in leiah tlung vit! Lâwmman pêk ding kan tiamh le, sikhawmsele, na lâwmman tawng ding LALPA nih a kham pang,” a ti.

¹²Balaam nih a sâng le, “Mi na hawng fial na mi tla sinah,

¹³ngûn leh tangka na in ah mi hawng ka pêk ver khawmsele, LALPA thupêk êl hen zeikhawm ka ti awt lo, LALPA nih sim ding hen hawng ka simh mi lâwng ka sim awt ka ti ngen lo mazei,” a ti.

¹⁴Balaam nih Balak sinah, “Tuah ka in leiah ka mi le sinah ka kîr awt rawh le, sikhawmsele ka kal lânah Israel mi tla nih na mi le tla mâilei ah an ti na ding mi dân zei asi, ka nan simh lai,” a ti.

¹⁵Churawhchun hi thu hi a sim rawh: “Beor fapa Balaam thuchah: Minung thu fiang tak hen theihkhotu,

¹⁶Pathian thusim theihkhotu leh Chungnungchem thawk hen A hawng kal mi theihnâk tingtu, Pathian chak tak thawk hen langhnâk lakah mit zauh hen ka muh.

¹⁷Mâilei thil um ding mi ka zauh le, Israel phun ka muh. Lalchem ârfi chêu tak hâwi hen Chu phun lakah mi a hawng suak lai. Israel thawk hen ârfi zuang hâwi hen a hawng kal lai. Moab ruitu tla chu a vuak na lai le, Seth mi tla zawzawng chu a thlûk phin lai.

¹⁸Edom ram ah mi a mêlma tla chu a neh na lai le, An ram chu amah nih â ting lai. Israel tla nehtu an si kar vial chun.

¹⁹Israel phun tla nih an lamhbêk na lai le, A thibang tla khawm an veih hep lai,” a ti.

²⁰Churawhchun Balaam nih langhnâk ah Amalek mi tla a muh na le, hi thu hi a sim: “Amalek chu phun zawzawng ah chak chem mi asi le, Sikhawmsele a dawnghnâk ah lam chun a vei pawt lai,” a ti.

²¹Langhnâk lakah chun Kenit tla chu a muh le, hi thu hi a sim rawh: “Na umnâk mun chu a him, Lungpi tlûnah sâng takah bû khuar mi hâwi hen a him le,

²²Sikhawmsele, Asiria nih sal ah an put tik chun Nang Kenit hi na vei awt,” a ti.

²³Balaam nih hi thu hi a sim rawh: “Marlei ah anna pûm mi zapi minung tla hi âu tla me an si?

²⁴Rûntu tla chu Kupra thawk hen an hawng lai le; Asiria leh Eber an neh lai, sikhawmsele, annih khawm an kîr leiah an vei pawt lai,” a ti.

²⁵Churawhchun, Balaam chu a in leiah tlung ding â tîm le, a tlung rawh, Balak khawm a umnâk leiah a tlung bâk.