Read Bawm Chin NUMBER 25 Bible Online

NUMBER 25 - Bawm Chin bible

NUMBER 25

¹Israel mi tla Akasia Vakuam ah an um liauah, chunah um mi Moab nunau tla chu an pung na.

²Chubang nunau tla nih chun anmah Moab pathian an sawnh mi bâwlnâk puai ah an sâwm na. Israel mi tla nih

³Peor ah mi Baal pathian sawnhnâk tî-le-râwl an ei. Churawhchun LALPA chu an tlûnah a thinthawk le,

⁴Mosi sinah, “Israel ruitu tla chu, ka thu ngâi hen put na le, zapi tlûnah ka thinthawknâk a reh khonâk ding hen sûn nî chêu ah thah hep na,” a ti.

⁵Mosi nih ruitu tla sinah, “Nan phun lakah Peor a mi Baal sawnhtu vial chu thah ver ding,” a ti.

⁶Israel lakah mi pakhat nih LALPA umnâk puanin mâika ah an ulh liau chirah Midian nunau Mosi leh zapi minung mitmuh hen a puanin ah a lûtpi.

⁷Chun, Phinehas, Eleazar fapa Aron bâwlpu tupa nih a muh le, a thawk le, anna pûm mi zapi minung tla chu a mâk thlap na. Fei a lâk le,

⁸puanin sungah chu nunau leh mipa chu a va lût khumh na le, an panih hen tleng fêk a sunh na. Hi hâwi hen Israel mi tla tlûnah siat-le-râwknâk chu bângtir asi,

⁹sikhawmsele, minung sîng nih leh sâng li chu thah chia an si rawh.

¹⁰LALPA nih Mosi sinah,

¹¹“Phinehas thilti ruangah Israel mi zapi tlûnah ka thinthawknâk chu a reh rawh. Keimah cho lo chu zei pathian khawm sawnh a duh lo ruangah, churuang tak chun ka thinthawk hen ka veih na lo mi asi.

¹²Churuang chun a sinah zeiliau zawng rang dingah thudân ka tuk asi ti simh.

¹³Amah leh a thlâk tla chu bâwlpu si kumza ding hen ka birhtir, ka lakah hel mi tla a sâithiam lo ruangah leh mi zapi sual rangah ngaihdamnâk a siam ruangah,” a ti.

¹⁴Israel lakah mi Midian nunau hen an thah na mi Salu fapa Zimri chu Simeon phun lakah a lukhâi chem asi.

¹⁵A nunau min chu Kozbi asi. A pa Zur chu Midian phun murui hotu asi.

¹⁶LALPA nih Mosi thu a pêk le,

¹⁷“Midian mi tla chu do ule, veih na u,

¹⁸Peor ah an perpet na liauah nan lakah thilsual an ti ruangah leh Peor ah thihnâk râi a lêng liau chirah Kozbi an thah ruangah,” ti hen.