Read Bawm Chin NUMBER 27 Bible Online

NUMBER 27 - Bawm Chin bible

NUMBER 27

¹Josef fapa chu Manaseh, Manaseh fapa chu Makir, Makir fapa chu Gilead, Gilead fapa chu Hepher, Hepher fapa chu Zelophehad asi le, Zelophehad nih chun fanu Mahlah, Noah, Hoglah, Milkah, Tirzah a neih na.

²Chu tla chu an va kal le, LALPA umnâk Puanin tualmâi ah Mosi, bâwlpu Eleazar, ruitu tla leh zapi minung zawzawng mâika ah an va dîr le,

³“Kan pa chu ramkaro ah a thi le, fapa rerêng a nei loh. LALPA lakah hel mi Korah murui tla lak khawmah â tel lo; amah sual ruangah a thi mi asi.

⁴Fapa a nei lo ruang ko ah, zeitin kan pa min Israel lakah lang lo hen a um zia? Kan pa unau tla rangah thil hawng kan pêk bâk u,” an ti.

⁵Mosi nih chu thu chu LALPA sinah a tlunh le,

⁶LALPA nih a sinah,

⁷“Zelophehad fanu tla nih an deih mi hi a dik asi, an pa unau tla sinah thil pêk na bâk u. An pa vo chu tingtir na u.

⁸Zeiliau zawngah mi fapa nei lo hen a thi chun, a fanu nih a inthâwng ting vima ding hen Israel zapi rangah simh na.

⁹Fanu a nei lo chun a unau tla nih anna ting lai.

¹⁰Unau tla a nei lo chun a pa unau tla nih anna ting ding asi.

¹¹Unau mawh patê mawh khawm a nei lo chun amah taksa tlâi nih â ting lai le, amah thil rangah a tleih lai. Israel mi tla nih hi dân herh tak hi Kei LALPA nih thu ka nan pêk na mi hâwi hen nan zûl ding asi,” a ti.

¹²LALPA nih Mosi sinah, “Abarim Tlâng ah kâi le, Israel tla rangah ram ka pêk ding mi va chuanh.

¹³Na muh thluh rawh chun na unanpa Aron hâwi hen na thi lai,

¹⁴Zin ramkaro ah ka thupêk lakah nan hel vevê ruangah. Zapi minung tla Meribah ah ka tlûnah an chipchiar liau khan ka thiltikhonâk thenhlimh an lakah nan langhtir duh lo ruangah,” a ti. Meribah chu Zin ramkaro ah Kades mi tinung va asi.

¹⁵Mosi nih thla a cham le,

¹⁶“LALPA Pathian, nungnâk zawzawng bulpi, mi zapi rui kho ding mi

¹⁷leh râltuknâk ah thupêk kho ding mi, na ruat ding hen ka nan ngiar, zapi minung tla chu vêngtu neilo dawrâ hâwi an si lonâk ding hen,” a ti.

¹⁸LALPA nih Mosi sinah, “Nun fapa Josua, mi thiltikho tak, lû tlûnah na kut thâng.

¹⁹Bâwlpu Eleazar leh mi zapi mâika ah dîrtir le, chunah chun an ektê mâika ah nangmah ruangrûl ah ruat mi asi ti phuang.

²⁰Na thuneihnâk zeimaw zat a sinah pêk le, Israel mi zawzawng nih a thu an ngâi khonâk ding hen.

²¹Bâwlpu Eleazar, Urim leh Thummim mang hen ka duhzia hen umtu lakah a ngauh ding asi. Hi hâwi hen bâwlpu Eleazar nih Josua leh Israel mi tla zawzawng chu an rianṭuan ding thu ah an rui na ding asi,” a ti.

²²Mosi nih chun LALPA thupêk hâwi hen a ti. Josua chu bâwlpu Eleazar leh mi zapi mâika ah a dîrtir.

²³LALPA nih thu a pêk hâwi hen Josua lû tlûnah Mosi nih a kut a thâng le, amah ruangrûl ah ruat asi rawh ti a phuang rawh.