Read Bawm Chin NUMBER 30 Bible Online

NUMBER 30 - Bawm Chin bible

NUMBER 30

¹Mosi nih Israel phun ruitu tla rangah hi bang sîntirnâk tla hi a pêk na.

²Mi nih LALPA sinah thilpêk ding hen â tiam chun mawh thil tilo ding hen â tiam mi thu ah, a thutiam chu a râwk ding asi lo, thil zeizawng ti ding â tiam mi chu a ti ngelchel ding asi.

³Nungâk nih a pa in sungkhur ah a um liauah LALPA sinah thilpêk ding hen tiamnâk a nei chun mawh, thil tilo ding hen â tiam mi thu ah

⁴a pa nih chu thu chu a theih hen a êl mi asi lêm lo chun a thutiam hâwi hen a ti ngelchel ding asi.

⁵Sikhawmsele a pa nih a thutiam tlingtir ding mi a theih hen a khap chun a ti êu ding asi lo. A pa nih a khap mi asi ruangah LALPA nih a ngaihdam lai.

⁶Pasal nei lo mi nunau nih thil zeimawh tilo ding hen bir tak hen mawh, a salam hen mawh, thu a tiam hen pasal a nei chun,

⁷a pasal nih a thutiam a theih hen a êl lêm lo chun a tiam mi zeizawng a ti ngelchel ding asi.

⁸Sikhawmsele, a pasal nih a thutiam chu tlingtir ding a theih hen a khap mi asi chun a ti êu ding asi lêm lo. LALPA nih a ngaihdam lai.

⁹Numei mawh mâk mi nunau nih mawh thil tilo ding hen tiamnâk a nei chun a thutiam chu a zulh ngelchel ding asi.

¹⁰Pasal nei mi nunau nih thil zeimawh tilo ding hen a tiam chun

¹¹a thutiam chu a pasal nih a theih hen a êl lêm lo chun, a tiam mi hâwi hen a zulh ngelchel ding asi.

¹²Sikhawmsele a pasal nih a thutiam chu a theih hen tilo ding hen a khap mi asi chun a ti êu ding asi lo. A pasal nih a thutiam zawh ding mi a khap mi asi ruangah LALPA nih a ngaihdam lai.

¹³Zei lak zawngah a thutiam chu a pasal nih birhtir ding leh lawnh piak ding hen thu a nei.

¹⁴Sikhawmsele, thu a tiam mi chu a theih ko na hen a thâituan khawmah a khap lo asi chun, a tiam mi zeital a zulh ngelchel ding asi. A theih ni ah a êl lo ruangah amah nih a birhtir mi asi.

¹⁵Sikhawmsele chu thutiam chu a nehnûnah a râwk chun, chu thutiam chu tling lo hen a râwk mi ruangah a tuar ding asi.

¹⁶Hi bang dân tla hi nunau pasal nei lo, a pa in sung khur a mi leh pasal nei mi nih thu anna tiam mi leikângah LALPA nih Mosi sinah a pêk mi chu asi.