Read Bawm Chin NUMBER 31 Bible Online

NUMBER 31 - Bawm Chin bible

NUMBER 31

²“Israel lakah an thilti ruangah Midian tla chu rêp na. Chu chu na ti thluh chun na thi lai rawh,” a ti.

³Churawhchun Mosi nih zapi tla sinah, “Râltuk ding hen a tîm ule, LALPA lakah an thilti ruangah Midian tla chu do ule, rêp na u.

⁴Israel phun kip thawk hen sâng khat vima hen râltuk ding hen fial na u,” a ti.

⁵Churawhchun phun kip thawk hen sâng khat vima an thîm le, an ektê fawnh hen sîng khat leh sâng nih minung chu râltuk ding hen anna tîm rawh.

⁶Mosi nih bâwlpu Eleazar fapa Phinehas, singsiahnâk tâwtawrâwt leh thil thenhlimh mawhphurhnâk lâktu thupêk hen Mosi nih râltuk ah a fial na rawh.

⁷LALPA nih Mosi rangah thu a pêk hâwi hen Midian tla chu an va do le, mi zawzawng leh

⁸Midian lalchem panga: Evi, Rekem, Zur, Hur leh Reba an thah na. Beor fapa Balaam khawm an thah sih.

⁹Israel mi tla nih Midian mi nunau leh an fa tla chu an tleih na le, an ranrual, an dawrâ rual tla hen, an neih zawzawng hen an lâk hep le,

¹⁰an riakmun leh an khuapi zawzawng an duah piak na.

¹¹An thil lâk tla, an minung tleih tla leh an ran tla hen an kalpi na le,

¹²Jeriko thawk hen Moab phâi ah Jordan Va kanh hen Israel zapi tla umnâk mun Mosi leh Eleazar sinah an kalpi na.

¹³Mosi, Eleazar leh zapi ruitu dang tla chu râltuk kawrsen tla dawng ding hen riakmun ah mi an suak le, an kal.

¹⁴Mosi chu râltuknâk ah hotu leh thuneitu tuknâk thawk hen an hawng kîr mi tla tlûnah a rothawk.

¹⁵“Zeirangah nunau tla kha nung hen nan zuah na?

¹⁶Kha nunau tla kha Baal sîntirnâk zûltu leh Peor ah zapi tla LALPA lakah zumhkâi lo ding hen râwktu an si ti theih u. Chu nih chun LALPA mi le tla tlûnah râi a tlungtir phah asi.

¹⁷Churuangah tuah mipa fa leh nunau fa pung-leh-lêngnâk neitu tla kha thah hep na u.

¹⁸Sikhawmsele nungâk leh nunau a thenhlimh mi chu nan rangah zuah na u.

¹⁹Tuah kha minung thahtu leh ruak tawnghtu vial chu ni sarih kar riakmun lênglei ah nan um rih ding asi. A ni thum ni ah leh a ni sarih ni ah nanmah leh nan tleih na mi nunau tla chu a thenhlimhtir u.

²⁰Nan lakah puan tliar leh savun hen siam mi thil zeizawng, kêl mul mawh, thing rerêng khawm nan thiangtir ding asi,” a ti.

²¹Eleazar bâwlpu nih râltuknâk thawk hen hawng kîr mi tla sinah, “Hi bang tla hi LALPA nih Mosi sinah dân a pêk mi chu asi.

²²Thil zeizawng a kâng lo mi ngûn, tangkasa, dâr, thîr, tâma, mawh suan, thenhlimh ding hen mei hen liau ding asi. A dang vial chu tî hen thiangtir ding asi.

²³

²⁴A ni sarih ni ah nan nipuan tla nan suk lai le: dân hâwi hen nan thiang lai rawh le, riakmun ah lût ding hen siang asi lai rawh,” a ti.

²⁵LALPA nih Mosi sinah,

²⁶“Nang leh Eleazar, Israel zapi minung ruitu tla hen lâk mi thil leh tleih mi minung leh ran tla nan rêl hep ding asi.

²⁷Zat cho hen mun nih hen ṭhen ule, anrang khat chu kawrsen rang, anrang khat chu zapi minung rangah.

²⁸Kawrsen tla tingvo lakah mi LALPA rangah pêk ding hen tleih mi minung tla zanga lakah pakhat, chu hâwi hen ranrual tla sanatung tla, dawrâ tla, leh kêl tla lakah mi khawm pêk ding asi.

²⁹LALPA rangah a bîk thawhlâwm si ding hen bâwlpu Eleazar sinah pêk u.

³⁰Mi zapi tla vo lakah mi tleih mi minung sâwmnga lakah pakhat chu hâwi hen ranrual, sanatung tla, dawrâ tla, kêl tla lakah mi khawm chu lâk ding asi. LALPA Puanin lakah rianṭuantu Levi murui rangah pêk na,” a ti.

³¹Mosi leh Eleazar nih LALPA thupêk hâwi hen an ti rawh.

³²Hi bang tla hi kawrsen tla nih an lâk mi anmah vo anna kil mi asi, anmah rang dingah an lâk mi tla fawnh hen: dawrâ leh kêl tla 675,000; ranrual 72,000; sanatung 61,000; nunau thenhlimh 32,000 an si.

³³

³⁴

³⁵

³⁶Kawrsen tingvo khingkhuai dawrâ leh kêl 337,500, chu lakah mi 675 chu LALPA vo asi; 36,000 chu kawrsen vo asi, chu lakah 72 chu LALPA sinah pêk mi asi; sanatung kawrsen rang mi vial 30,500 asi, chu lakah mi 61 chu LALPA rangah asi; kawrsen rang ding mi nungâk thenhlimh vial 16,000 asi, chu lakah mi 32 chu LALPA vo asi.

³⁷

³⁸

³⁹

⁴⁰

⁴¹LALPA nih thu a pêk mi hâwi hen Mosi nih chun Eleazar sinah a bîk hen LALPA sinah thawhlâwm rangah a pêk.

⁴²Zapi vo khawm chu kawrsen vo hen â bang: dawrâ tla, leh kêl tla 337,500; ranrual 36,000; sanatung 30,500 leh nungâk thenhlimh 16,000.

⁴³

⁴⁴

⁴⁵

⁴⁶

⁴⁷Hi lakah mi hi Mosi nih ran leh tleih mi minung sâwmnga lû ah pakhat vima a lâk le, LALPA thupêk hâwi hen LALPA Puanin rianṭuantu Levi tla rangah a pêk na.

⁴⁸Churawhchun, kawrsen hotu chu Mosi sinah a va kal le, thu a va sim.

⁴⁹“Pu, kan ho na mi kawrsen zawzawng kan rêl na le, pakhat khawm kanna zûk loh.

⁵⁰Thuamhnâk ngûn, bânkhimh, zaksiar, pizung, nabeh, leh ṭhi kan lâk mi chiau chu kan hawng put. Kan nungnâk hawng kan hum mi ruangah LALPA sinah kan pêk chiau, amah nih hawng kan vêng ding hen,” an ti.

⁵¹Mosi leh Eleazar nih chun ngûn leh thuamnâk siam mi tla chu an lâk rawh.

⁵²Hotu tla thawhlâwm chu a khîng an thlâi le; kilogramme 200 a tling.

⁵³Hotu an silo mi tla nih an thil lâk tla chu an kil.

⁵⁴Churawhchun Mosi leh Eleazar nih ngûn tla chu Israel mi tla LALPA nih hum na ding hen LALPA Puanin ah an kalpi rawh.