Read Bawm Chin NUMBER 33 Bible Online

NUMBER 33 - Bawm Chin bible

NUMBER 33

¹Mosi leh Aron mi hen Aigupta ram an suaktâk nûnah Israel tla nih hi bang tla hi an riaknâk mun min tla chu asi.

²LALPA thupêk hen riakmun an khuar kip ah Mosi nih riakmun min chu a rîn.

³Israel mi tla nih Aigupta chu kum khat sungah thla masachem a ni leinga ni ah Kalkanh Kût masachem lîm kâ hen an suaktâk. LALPA humnâk hen Aigupta mi tla, an fapa tîr

⁴LALPA nih a thah na mi vûitu tla mitmuh hen Rameses khuapi chu an suaktâk rawh. Hi lakah hin LALPA chu Aigupta pathian ngâk hen thil a ti kho dauh asi ti a langh.

⁵Israel mi tla nih Rameses chu an kaltâk le, Sukot ah mun an khuar.

⁶Chu nûnah chun ramkaro rîl ah Etham ah mun an khuar.

⁷Chu thawk hen Baal Zephon saklei mi Pi Hahirot leiah an kîr le, Migdol kiangah riakmun an khuar.

⁸Chun, Pi Hahirot an mâk le, Tipi Sen an kanh le, Sur ramkaro leiah an kal; ni thum an kal nûnah Marah ah mun an khuar.

⁹Chu thawk hen Elim ah an kal le, chunah chun mun an khuar, chu mun ah chun tinung va leinih leh tûm kûng sâwmsarih a um.

¹⁰Elim chu an kaltâk le, Suez likâwlneng kiangah mun an khuar.

¹¹Chu nûnah chun Sin ramkaro ah mun an khuar.

¹²Churawhchun Dopkah ah mun an khuar,

¹³chu nûnah chun Alus ah mun an khuar nawlh.

¹⁴Chu nehnûnah chun Rephidim ah, chunah chun din ding tî an tawng lo.

¹⁵Rephidim thawk hen Hor Tlâng ah an kal le, hi bang mun tla ah hin riakmun an khuar: Sinai Ramkaro, Kibrot Hataavah (mawh “thlân ker mi tla”), Hazerot, Ritmah, Rimmon Perez, Libnah, Risah, Kehelathah, Sepher Tlâng, Haradah, Makhelot, Tahat, Terah, Mitkah, Hasmonah, Moserot, Bene Jaakan, Hor Hagidgad, Jotbathah Abronah, Eziongeber, Zin ramkaro (chu chu Kades asi) leh Edom ram kiangah mi Hor Tlâng.

³⁸LALPA thupêk hen bâwlpu Aron chu Hor Tlâng ah a kâi. Aigupta ram Israel tla nih an suak tâknâk thawk hen a kum sâwmlinâk, a thla nganâk a ni khat ni ah, kum 123 tling hen chunah a thi rawh.

⁴⁰Kanaan simlei kâng mi Arad lalchem nih Israel tla an hawng ti a theih rawh.

⁴¹Hor Tlâng thawk hen Moab phâi ah Israel tla nih hi bang mun tla ah hin riakmun an khuar: Zalmonah, Punon, Obot, Moab ram ah Abarim a râwknâk mun ah, Dibon Gad, Almon Diblathaim, Nebo Tlâng kiangah mi Abarim Tlâng, chun Jeriko thawk hen Jordan Va kanh hen Moab phâi ah Bet Jesimot leh Akasia Tivakuam karah.

⁵⁰Jeriko thawk hen Jordan Va kanh hen Moab phâi ah Israel tla rangah

⁵¹hi bang sîntirnâk tla LALPA nih Mosi rangah a pêk: “Jordan Va kanh hen Kanaan ram nan lût tik chun,

⁵²ram sungah minung um mi tla zawzawng chu nan nar phin ding asi. An sawnh mi milem lung leh thîr hen an siam mi tla leh an sawnhnâk mun tla râwk dep u.

⁵³Chu ram chu ka nan pêk na mi asi ruangah luah ule, um u.

⁵⁴An chi leh phun tla lakah ram chu chamchawh hen ṭhenh na ule, a chi tam dauh mi tla sinah tam dauh pêk ule, a chi tâwm dauh mi sinah tâwm dauh hen pêk na u.

⁵⁵Sikhawmsele, chu ram ah um mi tla nan nar hep lo chun, nan thah bang tla nih an nawktir na lai le, nan mit sunhtu leh nan tak lakah ling hâwi an si lai le, nanmah dotu an si lai.

⁵⁶Nan nar phin na lo chun, anmah râwk dep ding ka tum mi chu nanmah lam kan râwk na awt,” a ti.