Read Bawm Chin NUMBER 8 Bible Online

NUMBER 8 - Bawm Chin bible

NUMBER 8

¹LALPA nih Mosi sinah,

²“Aron chu meichêu tung lakah meichêu pasarih siah ding hen a chêu nih mâilei chu a cherh khonâk ding hen simh,” a ti.

³Aron nih chun a sim mi hâwi hen meichêu chu meichêu tung mâilei hawih hen a siah.

⁴Meichêu tung chu a tlûn thawk hen a tawbul tiang ngûn dêng mi asi, Mosi rangah LALPA nih zûnzauh ding hen a muhtir mi hâwi hen.

⁵LALPA nih Mosi sinah hi hâwi hen,

⁶“Levi tla chu Israel lakah mi

⁷thlei na le, thenhlimhtir na; Thenhnâk tî theh na le, an taksa mul zawzawng mêttir na le, an nipuan suktir na, chu tikah dân hâwi hen an thiang lai rawh.

⁸Churawhchun chawchal pakhat leh sangvut thil ap oliv sariak hen chawmh mi put ding asi; nangnih chawchal dang sual thil ap rangah na put ding asi.

⁹Israel mi zapi zawzawng na pumh na lai le, Levi tla chu ka umnâk Puanin mâika ah dîrtir na.

¹⁰Israel zapi tla nih Levi murui tlûnah an kut an thâng lai le,

¹¹Aron nih Levi tla chu Israel lakah mi a bîk thilpêk hâwi hen ka sinah a hawng ap ding asi, chu tikah ka rian an ṭuan kho lai.

¹²Churawhchun Levi tla nih chawchal panih lû tlûnah an kut an thâng lai le, pakhat chu sual thil ap rangah ap ding, a dang pakhat chu duahphung thil ap rangah mang ding, Levi tla chu dân hâwi hen thenhlimhtir an sinâk ding hen.

¹³“Levi tla chu a bîk thilpêk hâwi hen ka sinah hawng ap le, Aron leh a fapa tla chu an hotu ah siam na.

¹⁴Levi tla chu Israel lakah mi hi hâwi hen thlei na, ka tâ an si khonâk ding hen.

¹⁵Levi tla chu na thenhlimhtir na hen na ap na nûnah, Puanin ah rianṭuantu si ding hen an tlâk lai rawh.

¹⁶Israel mi lakah fapa tîr ruangrûl ah keimah vo ah ka ruat na mi an si le, keimah tâ rang ding cho an si.

¹⁷Aigupta ram ah fa tîr ka thah na liauah, Israel lakah mi fapa upachem zawzawng chu ka tâ si ding hen ran lakah a ring tîr mi hen ka thenhlimhtir rawh.

¹⁸Israel lakah mi fa tîr ruangrûl ah Levi tla chu ka lâk rawh le,

¹⁹chun Levi tla chu Israel thawk a thilpêk hâwi hen Aron leh a fapa tla sinah ka pêk na, Puanin lakah Israel mi tla rangah rianṭuan ding leh Israel mi tla nih Mun Thenhlimh an hawng naih tuk hen siat-le-râwknâk lakah vêngtu dingah ka ruat na asi,” a ti.

²⁰Mosi, Aron leh Israel mi zapi tla nih LALPA nih Mosi sinah thu a pêk hâwi hen Levi tla chu an ap na rawh.

²¹Levi tla nih anmah chu anna thenhlimhtir le, an nipuan tla an suk, Aron nih a bîk thilpêk hâwi hen LALPA sinah a ap na. Dân hâwi hen thenhlimh tirnâk khawm a timhtuah piak na.

²²Zapi tla nih chun Levi murui thu ah LALPA nih Mosi sinah thu a pêk mi hâwi hen thil zeizawng an ti rawh. Churawhchun Levi tla chu Aron leh a fapa tangah Puanin ah rianṭuan kho an si rawh.

²³LALPA nih Mosi sinah,

²⁴“Levi tla lakah kum kul leh kum nga thawk hen ka umnâk Puanin ah rianṭuannâk an nei lai le,

²⁵kum sâwmnga an tling nûnah anna dîn lai.

²⁶Chu nûn chun an hâwi Levi tla Puanin ah an rianṭuan an bawmh na kho, sikhawmsele, amah lâwng hen rianṭuannâk lam chu a nei ding asi lo. Hi bang tla hi Levi tla rangah an rianṭuan nan siam piak ding mi dân chu asi.