Read Bawm Chin MIKAH 1 Bible Online

MIKAH 1 - Bawm Chin bible

MIKAH 1

¹Juda lal Jotham, Ahaz, Hezekiah san liauah Moreseth khua ah mi Mikah sinah LALPA nih hi thuchah a pêk. LALPA nih Mikah sinah Samari leh Jerusalem ah thil um ding mi thu chu a langh.

²Nannih phun zawzawng tla, hi hi tual tlûnah um mi zawzawng tla, hi hi ngâi u! LALPA Zahkâi nih a nan sâwi awt, a vân Biakin thawk hen thu a sim mi chu ngâi u!

³LALPA chu a mun thenhlimh thawk hen a hawng lai le, a hawng ṭum lai le, tlâng sâng tlûnah a hawng kal lai.

⁴A tangah mi tlâng tla chu mei lakah khuailul a zawr mi hâwi hen an zawr lai, tlâng tla tî tawih hâwi hen tivakuam tla a tawih lai.

⁵Hi bang zawzawng tla chu Israel mi tla LALPA tlûnah an hel hen an sual ruangah a hawng tlung lai. Israel helnâk ah hin âu me a mawh? Samari, khuapi chu asi! Juda ram ah milem sawnh ruangah âu a mawh? Jerusalem chu asi!

⁶Churuang chun LALPA nih, “Samari chu thil sianâwi pawngnâk ah leh grep phunnâk ah ka siam lai, a khuapi mi neknâwi chu tivapi kuamah ka thlêt lai le, khuapi lungphûm chu a karo hen ka siah lai.

⁷A milem sung tak tla chu mântir dip asi lai le; â zuarnâk a biakin tla chu mei hen a veih lai le; a milem zawzawng chu a karo hen pawng asi lai. Samari nih a phung sawnhnâk rangah a nei le, tu lam chun mun dang ah sawnhnâk rang dingah an kalpi hep lai,” a ti.

⁸Churawhchun Mikah nih, “Hi bang ruangah hin ka lung a fâk hen ka ngaih a sia. Ka ngaihsia mi langhnâk ding hen kê karo leh takkaro hen ka kal awt. Kâwlui hâwi hen ka âu lai le, vachâ hâwi hen ka lung a fâk lai.

⁹Samari â liam mi chu damh kho asi lai lo, Juda khawm chu hâwitê hen a tuar bâk awt; ka mi tla umnâk Jerusalem kulh kawtkâ tiang chu siatnâk nih a phanh rawh” a ti.

¹⁰Kan mêlma tla Gath a mi sinah neh kan si mi thu simh na lah ule, nan ṭap mi khawm a muhtir lah u. Beth Leapbrah mi tla, valeidip lakah rîl ule, nan lungdawngnâk langh u.

¹¹Nannih Saphir mi tla, takkaro leh ningzak bû hen sal ah kal u. Zaanan ah um mi tla chu an khuapi thawk hen an hawng suak ngam lo. Bethezel ah um mi tla an lungfâk mi nan theih tik chun chunah himnâk a um lo rawh ti nan theih lai.

¹²Maroth mi tla nih Jerusalem siatnâk a nâi rawh ruangah, tlunglo sele thungâi an duh.

¹³Lakis ah um mi tla, rang tla chu kari banh u, Israel sualnâk nan châwng le, Jerusalem nan sualtir.

¹⁴Tuah Juda mi tla, Moreseth Gath khuapi rangah ka kal lai rawh ti u. Israel lal tla nih Akzib khuapi ṭangpinâk an tawng lai lo.

¹⁵Maresah mi tla, LALPA nih nan khuapi lâk awttu nan mêlma kut ah an pêk na awt. Israel ruitu rokual tak tla chu Adullam pûk ah an kal lai le, an va a thup lai.

¹⁶Juda mi tla nan fa nan dâwt mi tla sal ah put an si awt ruangah nan lung a fâk zauhtirnâk ah nan sam mêt u. Mulukawlh hâwi hen nan lû kâwng tleng ziat u.