Read Bawm Chin MIKAH 3 Bible Online

MIKAH 3 - Bawm Chin bible

MIKAH 3

¹Nannih Israel lâirêltu tla, ngâi u! Diknâk leikâng duhtu si ding hen ruat nan si mi lakah a ṭha leikâng nan hua le,

²sual leikâng chu nan duh, ka mi tla nung bû hen an vun nan lîk le, an ruh lakah mi an sa tla nan khelh.

³Ka mi tla nan ei hep le, an vûn nan lîk na le, an ruh tla nan khiak piak na le, an sa tla bêl sungah suang ding mi hâwi hen nan chan dip.

⁴LALPA nan auh ding mi tik a tlung awt, sikhawmsele a nan sâng na lai lo. Thilsual nan ti ruangah nan thlachamnâk khawm an sâng na lai lo.

⁵Ka mi tla chu khuavâng tla nih an perpet na le, chubang khuavâng tla nih chun an sinah thil pêktu tla rangah thla an ngamh na le, pêklotu tla rang chun râltuknâk a um awt ti hen an ṭhih na. Chubang khuavâng tla sinah chun LALPA nih,

⁶“Khuavâng tla, nan ni a dawng awt rawh; nî nih an tlâk khumh na awt. Ka mi tla mahlo leiah nan kalpi na ruangah langhnâk thu nan sim lai lo rawh le, zei thil simkannâk khawm nan nei kho lai lo rawh,” a ti.

⁷Mâilei thu um ding mi simhkanhtu chu a diklonâk nih ningzak â saih lai. Pathian nih a sâng na lo ruangah nâutir hen an um hep lai.

⁸Sikhawmsele kei lam chu a thlarau leh a thiltikhonâk hen hawng ka khattir lai le, thildik theihnâk leh râlṭhatnâk, a mi Israel tla an sualnâk theihtir na ding hen hawng ka pêk.

⁹Israel lâirêltu tla, diknâk hua hen, diknâk chu diklonâk ah changtirtu, ka thu ngâi u.

¹⁰Diklonâk leh mi thahnâk lungphûm tlûnah Pathian khuapi Jerusalem chu nan dirh.

¹¹Khuapi sungah lâirêltu tla nih nawhnâk ruangah lâi an rêl le, bâwlpu tla nih a man duh hen dân thu tla an sim, chubang zawng tla nih LALPA kan sinah a um an ti ver. “Kan lakah nganfâk zeikhawm a tlung lai lo. Kan sinah LALPA a um,” an ti.

¹²Churuang chun Zion chu nangmah ruangah phâisen hâwi hen nâwn asi lai le, Jerusalem chu nâwm pawngnâk asi lai, Biakin tlâng chu tumun asi lai.