Read Bawm Chin MIKAH 6 Bible Online

MIKAH 6 - Bawm Chin bible

MIKAH 6

¹Israel tlûnah LALPA thunawk chu ngâi u! LALPA thawk le, na thunawk chu sim le, tlâng sâng tla leh tlângtê tla nih na thusim chu ngâi seh.

²Nannih tlâng sâng tla, nannih zungzâl lungphûm tla, LALPA thunawk ngâi u! Israel tla lakah LALPA nih thunawk a nei, Israel tla chu a phiar na awt.

³LALPA nih, “Ka mi tla, nan sinah zei thil ka ti? Nan rangah thilrit tak na maw ka si? Hawng ka sâng u?

⁴Aigupta mi chu kan suakpi na le; sal nan tâng mi chu kan suah na rawh; Nanmah an ruitu ding hen Mosi, Aron, leh Miriam ka hawng fial na.

⁵Ka mi tla, Moab lal Balak nih nan sinah thilti ding a tum mi leh Beor fapa Balaam nih a thu a sâng dân tla kha theihkumza u. Akasia thawk hen Gilgal leiah kalnâk lampi ah thil a hawng tlung mi tla kha theihkumza u. Nanmah ruang an suah na ding hen thil ka ti mi tla kha nan theih ko ruangah hi bang thil tla hi theihkumza u,” a ti.

⁶LALPA vân Pathian amah sawnh ding hen ka kal liauah zei ka put lai? A sinah duah mi thil ap pêk ding hen chawlâ ṭha chem ma ka put lai?

⁷Dawrâ sâng tamtak mawh oliv sariak tiva hâwi hen kanglo mi a sinah put sele LALPA â lâwm lai ma? Ka sual mi ruangah ka fa tîr a sinah bâwlnâk ah ka ap lai ma?

⁸Silo e! LALPA nih a ṭha mi hawng kan simh rawh, kan lakah a duh mi chu hi hi asi; diknâk, zângfahnâk dawnglo langhtirnâk leh amah Pathian hen nâutak hen a kawmh ding a duh mi chu asi.

⁹LALPA ṭih chu fingnâk asi. Khuapi a auh le, “Nannih khuapi ah a pûmtu tla, ka thu ngâi u!

¹⁰Misual in tla ah chun diklo tak hen an tawng mi thil-le-rî a um, ka huatkâng tak hen tahnâk diklo an mang.

¹¹Khîngnâk diklo leh tahnâk diklo mangtu zeitin ka ngaihdam kho lai?

¹²Nan minei tla nih mipâm tla an mang na le, nan ektê hen mi âwkrâwl ver nan si.

¹³Churuang chun nan thilsual ti ruangah nanmah siat leh râwknâk tlungtir ding hen ka dawmh ko rawh.

¹⁴Nan ei lai le, sikhawmsele khimlo hen nan sung a vâng kumza lai. Thil tla nan lâk lai le, sikhawmsele nan zuah kho lai lo, thil zeizawng nanna khiar mi chu râltuknâk ah ka veih awt hep.

¹⁵Fâng tla nan tuh lai le, sikhawmsele ât hen nan pumh lai loh. Oliv sariak nan sûr lai le, sikhawmsele mang ding hen a um kho dah lai loh. Uain hâng nan siam lai le, khawmsele a din chu nan din lai lo.

¹⁶Lal Omri thilsual ti dân leh a fapa lal Ahab thilsual ti dân nan zûl ruangah chubang chu a hawng tlung lai. An thilti dân nan châwng vima ruangah siatnâk ka hawng tlungtir lai le, mikip nih an zauhnawmh na lai. Munkip mi nih an siar na lai lo rawh.