Read Bawm Chin NAHUM 1 Bible Online

NAHUM 1 - Bawm Chin bible

NAHUM 1

¹Hi hi Ninevi khua thu ah thuchah Nahum, Elkos ah a um mi nih langhnâk ah a muh mi chu asi.

²LALPA Pathian nih heltu a sâithiam lo le, Amah dotu tla chu a rêp na, a thinthawknâk hen lehrûl a sam na.

³LALPA chu a thinthawk sawm lo le, sikhawmsele thil a ti kho hen misual chu rêp lo hen a siah na lo. LALPA kalnâk ah chun thlipi a râng le, a kê hen valeidip chu sûm hâwi hen a zâmtir!

⁴Tipi chu thu a pêk le, a kang hep, tiva tla chu a kangtir. Basan ah mi phâisen tla chu a uai hep le, Karmel tlâng tla chu a senduk, Lebanon tlâng chawmpâr tla khawm a nawh hep.

⁵LALPA mâika ah tlâng tla a thir le, Tlângtê tla chu a mâika ah an zawr. LALPA a hawng lang liauah tual chu a thir, Laikulh leh a minung tla chu an thir.

⁶A thinthawk tikah âu me him kho lai? A thinrunhnâk ṭihnungkâi lakah âu a âwl kho lai? A thinthawknâk meialh chu a thlêt le, lungpi tla a mâika ah valeidip hâwi hen an nek dip.

⁷LALPA chu a ṭha asi, lawksawng liauah a mi tla chu a hum na le, amah lei hawng a hawitu tla chu a kilkâwi na.

⁸Tîlian rokual tak a luang mi hâwi hen a mêlma tla chu a veih phin na le; amah dotu tla chu an thihnâk leiah a kaltir na.

⁹LALPA do ding hen zei me thinlung ah ruatnâk na nei? A nan veih salam lai, âukhawm nih veikhat nûnlêm an do kho lo.

¹⁰Banhtu ling leh fapawn a châr mi hâwi hen na kâng hep lai!

¹¹Ninevi, nangmah thawk hen thilsual ti tumtu hen a khat dil mi minung, LALPA rangah do tumtu a hawng.

¹²Hi hi LALPA nih a mi Israel sinah thu a sim mi chu asi: “Asiria ni tla chu chak hen tam menza na khawmsele, vei leh tlâu dep hen an um lai. Ka mi tla nganfâk kan pêk na le, sikhawmsele kan pêk na lai lo rawh.

¹³Tu lam chun nan tlûnah Siria thuneihnâk chu ka dawnghtir lai rawh le, a nan phuarnâk rêngri chu ka sah lai rawh,” a ti.

¹⁴Hi hi LALPA nih Asiria mi tla lakah a thusuah chu asi: “An min thâwn vima ding hen thlâk an nei lo rawh, an biakin ah milem an pathian tla ka veih awt. Asiria mi tla chu lung ding hen an tlâk lo, an rangah thlân ka timhtuah rawh,” a ti.

¹⁵Zauhnik, tlâng tlûnah mifial thâwngthâng ṭha tak sim ding hen a hawng! Nehnâk thu sim hen lampi ah a hawng liau asi, Juda mi tla, nan kût ni siam ule, Pathian sinah nan thutiam bir tak hen siam u. Misual nih nan ram an rûn lai lo rawh, neh an si hep rawh!