Read Bawm Chin HABAKUK 1 Bible Online

HABAKUK 1 - Bawm Chin bible

HABAKUK 1

¹Hi hi LALPA nih khuavâng Habakuk sinah a thuchah chu asi:

²LALPA, siatnâk lakah ruang hawng kan suah ding leh kan thu hawng kan ngâi piak ding hen zei tiang riamruam me ṭangpi kan deih awt?

³Hi hâwi lawksawngnâk muh ding hen zeirangah na hawng ka siam, hi bang hâwi thil diklo ti hi zeitin na zauh kho zia? Siatnâk leh râwknâk nih hawng ka kulh dak le, mun kipah a sualnâk leh donâk a um.

⁴Dân tla chu a chak lo hen mang tlâk lo hen a um le, diknâk khawm mang asi lo. Misual nih mirep ngâk hen ṭhat dauhnâk a lawh le, diknâk chu diklo hen a kal rawh.

⁵LALPA nih a mi tla sinah, “Nan kiangkam ah phun tla chu zauh thlingthlâk na. Na thilmuh lakah chê na ti lai. A thu na theih tikah na lunglo thlo ding mi thil zeimawh ka ti awt.

⁶Mirât leh um ziar kholo mi thiltikho tak tla Babulon sinah ka put awt. Ramdang tla lâk ding hen laikulh pumpi an ṭawl.

⁷Ningṭihnâk leh lâunâk an khattir le, anna zûmnâk ruangah dân chu anmah an si chawlh.

⁸“An rang tla chu keitê ngâk hen an chak dauh le, chingngia sungvâng ngâk hen an rât dauh. Rang tlûnah anna chuan mi tla chu ram lât tak a thawk hen an hawng le, an rang tla nih tual ah an kê an thlik. Mû nih sa a châwi ding mi a thlûr mi hâwi hen an hawng kal.

⁹“An kawrsen tla chu an kalnâk kipah an neh hen an veih vima na le, an va kalnâk kipah mi minung tla nih an ṭih na. An tleih mi tla chu risep hâwi hen an tam.

¹⁰Lal tla chu an zauhnawmh le, milian tla chu an nihsanh na. Zei kulh khawm nih a do na lo. Tual an pawng le, an lâk vima.

¹¹Thli râng hâwi hen an phiat le, an kal ving, chubang minung tla chu an thiltikhonâk chu an pathian asi,” a ti.

¹²LALPA, nang chu a tîr thawk hen Pathian na si. Nang chu zungzâl ka Pathian thenhlimh na si. LALPA, ka Pathian leh hawng ka humtu, Babulon mi tla chu hawng kan rêp ding hen na thîm le, chak tak hen na siam.

¹³Sikhawmsele hi bang hâwi misual leh nehsawhtu tla hi zeitin na zuah kho na zia? Misual tla zauh ding hen chun na mit a thenhlimh tuk, mi nih thil diklo an ti mi khawm na zauh ziar kho lo. Churuang chun mi diklo nih mi dik rangah an veih liauah zeitin na dâisip zia?

¹⁴Nga tla mawh tholung bû tla anmah ho na ding hen lâirêltu neilo mi hâwi hen mi tla zeitin na tikho na zia?

¹⁵Babulon mi tla nih mi tla siau hen nga an siau mi hâwi hen mi tla an siau na. Lên hen an nûk na le, an tleih na mi ruangah lâwm hen an âu!

¹⁶An lên tla chu an sawnh le, bâwlnâk an ap. An lên tla nih thil ṭha chem a pêk na ruangah.

¹⁷An nâmsâu tla an mang kumza hen, phun tla chu khuaruatnâk neilo hen an veih kumza na lai ma?