Read Bawm Chin HABAKUK 2 Bible Online

HABAKUK 2 - Bawm Chin bible

HABAKUK 2

¹In sâng râl chuanhnâk ah ka kâi lai le, LALPA nih a sinah thu ka tlunh mi ruangah zei hâwi hen hawng ka sâng awt ka va ngâichâng nik lai.

²LALPA nih hi hâwi hen hawng ka sâng: “Sunhtlung valei tlêp lakah fiang tak thu ka nan simh mi rîn le, zauh vuak khawmah rêl kho ding hen.

³Chu rîn mi chu a hun tak a tlung lo rih ruangah siah ziar. Sikhawmsele a tik chu khulrang hen a hawng tlung lai. Tlâi dauh khawm asi kho, ngâk ko rih le; a hawng um ngelchel lai, a tlâi tuk lai lo.

⁴Thuchah lam chu hi hi asi: ‘Misual rerêng chu zuah an si lai lo, sikhawmsele mirep lam chu Pathian lakah zumh an kâi ruangah an nung lai, ti hi,” a ti.

⁵Neihnâk hi bumtu asi. Mi hamkah tla anna zûm le, an um ziar kho lo. Thihnâk nih tâwk ti a nei lo mi hâwi asi. Churuangah asi, a phun phun hen mah rangah an neh mi chu.

⁶Neh hen an um mi tla nih anmah nehtu tla chu an zauhnawmh na lai le, an siar na lonâk an langh lai, “Na tâ silo mi chu na lâk le, sikhawmsele na vânduai rawh! Na sinah leibattu tla zângran ko a sam tir hen zei chan me neih leh siah hen na um awt?” an ti na lai.

⁷Sikhawmsele, na theihmanh lânah nang, midang tla nehtu, nangmah ngelchel leibat hen na um lai le, a fa zângran ko a pêktir hen na um lai. Na mêlma tla an hawng lai le, an lamhbêk lai! An rawk lai!

⁸Phun tam tak na rawk na le, sikhawmsele tu lam chun mi tla na thah na ruangah leh laikulh minung tla leh an khuapi tla na veih na ruangah a dam rih mi tla nih an rawk bâk lai.

⁹Zângran ko hen mi thil lâk piak hen na dâwngsungkhur neihnâk na siam le, tuarnâk leh ṭihnungkâi lakah na in sungkhur chu hum ding na tum ruangah na vânduai rawh!

¹⁰Sikhawmsele na thiltum nih na dâwngsungkhur lakah mualphonâk a tlungtir. Phun tla tamtak na veih na mi chu nangmah tlûnah siatnâk na tlungtir mi cho asi.

¹¹Lungvâm tla khawm nih an auh lai le, kuaiber tla lakah a hâu a thangkhâwk lai.

¹²Dân buar hen khuapi tla na dirh le, mi thah hen in tla na sak ruangah na vânduai rawh.

¹³Na neh na mi phun tla rianṭuan chu zeikhawm asi lo le, an in sak mi tla chu mei nih a khangh hep rawh. Chu chu LALPA Zeizawng tikho nih a ti mi asi.

¹⁴Sikhawmsele tipi chu ti hen a khat hâwi hen, tual chu LALPA rokualnâk hen a khat lai.

¹⁵Na thinrunnâk hen na zâwlbâwm tla chu na nâutir na le, ningzak na saih na. Zurî hâwi hen na hâwrtir na.

¹⁶Chu ruangrûl ah nang khawm mi nih an zah ding ngâk hen mualphoh hen na um lai. Nang ngelchel khawm na din hen na hâwr lai. LALPA nih an rêpnâk hâi na din lai. Zah hen na umnâk chu ningzak hen a um lai.

¹⁷Lebanon tlâng ah mi thing mun chu na hâu le; nang khawm hâu hen na um lai. Chunah ramsa tla na thah le, tu chun ramsa tla nih an lâutir lai rawh. Mi tla na thah na ruangah leh laikulh minung tla leh an khuapi na râwk na ruangah chubang tla na tlûnah a hawng tlung lai.

¹⁸Milem hi zeirangah mang asi? Minung nih thil zeimawh an siam mi cho asi le, âwkrâwl cho lo chu zeikhawm an simh loh. Hawlh kholo mi pathian nih a siamtu rangah zei thil ṭha me zumhkâi ding hen a ti piak?

¹⁹Thing pheltê sinah, “Meng” mawh, thing tan sinah, “Thawk!” na ti mi ruangah na vânduai rawh! Milem nih zei thil me a langh? Tangkasa leh ngûn hen luanh mi sikhawmsele, amah lakah nungnâk a um lêm lo.

²⁰LALPA chu a Biakin thenhlimh ah um hen tual tlûnah mikip chu a mâika ah dâisip hen um na seh.