Read Bawm Chin HAGAI LASUIBU 2 Bible Online

HAGAI LASUIBU 2 - Bawm Chin bible

HAGAI LASUIBU 2

¹Chu kum ber a thla sarihnâk ni kul leh ni khat ni ah, LALPA nih khuavâng Hagai mang hen thu a sim nawlh fâwn.

²Hagai rangah Juda lâirêltu Zerubabel leh Bâwlpu Lian Josua chu zapi tla thu va simh na ding hen simh na ti hen a simh.

³“Nan lakah a lânah Biakin ṭha tak umdân theihkumzatu nan um rih ma? Tuah nan rangah zei hâwi hen asi ne? Zeikhawm silo hen dahmawh asi ah.

⁴Sikhawmsele tuah âukhawm lungdawng lah u, nan sinah ka um asi, rianṭuan ko u.

⁵Aigupta ram thawk hen nan hawng suak liau khawmah nan sinah um ding hen thu ka tiam asi. Nan sinah ka um kumza nget rih, ningṭih lah u.

⁶“Sâwtlotê ah tual leh vân, ram leh tipi ka ninh lai.

⁷Phun tla chu ka lawnh phin na lai le, an neih tla chu hinah hawng put hen a um lai le, Biakin chu thil-le-rî hen a khat lai.

⁸Laikulh a mi ngûn leh tangka zawzawng ka tâ asi.

⁹Biakin thar chu a li mi ngâk hen a rokual dauh lai le, chunah chun ka mi tla rangah sul-le-lam tluangnâk leh lungngamnâk ka pêk na lai,” LALPA Zeizawng tikhotu nih a ti.

¹⁰Lal Darias a lal mi kum nihnâk thla kuanâk ni kul leh ni li ni ah LALPA Zeizawng tikho nih khuavâng Hagai sinah thu a sim nawlh,

¹¹“Bâwlpu tla rangah lâirêl ding hen hi deihnâk hi deih na:

¹²Âu nih mawh sa thenhlimh a kawrdawh fual hen fûn hen a put tâ sele, a kawrdawh nih sang suang mi buh, uain, oliv sariak zei eiphung tal tawngh sele thenhlimh asi kho lai ma?” a ti. Chu deihnâk chu deih an si le, bâwlpu tla nih, “A thenhlimh lai loh,” ti hen an sâng.

¹³Churawhchun Hagai nih, “Mi nih ruak a tawngh ruangah nâwm hen um sele, chu minung nih ei ding mi zeital tawngh sele a nâwm ber lai ma?” a ti. Bâwlpu tla nih an sâng le, “A nâwm lai,” an ti.

¹⁴Churawhchun Hagai nih, “LALPA nih chu hâwitê hen hi phun tla sinah leh an thilneih zawzawng lakah mang ule; churawhchun thil zeizawng mâichâm ah an ap mi chu nawmh hen a um lai,” a ti.

¹⁵LALPA nih, “Nan lakah thil a hawng tlung mi hi nan muh kho lo ma? Biakin nan sak nawlh lân chun,

¹⁶fâng pawng kilogramme zanih tawng ding lungum hen nan kal le, sikhawmsele zâ cho a um; uain siahnâk mun a mi litre zâ va than ding hen nan va kal le, sikhawmsele sâwmli cho nan tawng.

¹⁷Rotirtu thli leh nan chîng mi zawzawng veihtu ding rial ka hawng fial le, sikhawmsele nan rim lo nget rih.

¹⁸Tusûn a thla kuanâk ni kul leh ni lî ni chu Biakin lungphûm phûm lîm ni asi. Tusûn thawk hen zei thil a hawng um awt vima zauhnik u.

¹⁹Fâng tla, grep zûn tla, theipi kung tla, pomegranate tla leh oliv thing tla umlo rawh khawmsele, tu thawk hen mal kan sâwm na lai rawh,” a ti.

²⁰Chu thla ni kul leh ni li ni takah LALPA nih Hagai sinah,

²¹“Juda lâirêltu Zerubabel sinah sim ding mi thuchah veinihnâk a pêk: “Tual leh vân tla ninh hen,

²²lalram tla leh an thiltikhonâk ka dawngtir awt, an kari leh a khalhtu tla chu ka thal tlak lai le, rang tla an thi lai le, a tlûnah totu tla chu anmah leh anmah anna thah lai.

²³Chu ni chun nang ka to-aw Zerubabel chu ka nan lâk lai le, ka min hen lâirêltu ah ka nan ruat lai. Nang chu ka mi thîm pakhat na si lai rawh,” a ti. LALPA, Zeizawng tikho nih a sim mi asi.