Read Bawm Chin ZEKARIA 1 Bible Online

ZEKARIA 1 - Bawm Chin bible

ZEKARIA 1

¹Persia lal Darias a lalnâk thawk hen a kum nihnâk thla riatnâk ah, LALPA nih khuavâng Zekaria Berekiah fapa Iddo tupa sinah LALPA nih hi thuchah hi a simh.

²LALPA nih Zekaria chu zapi sinah thu sim ding hen a simh le, “Kei, LALPA hi nan thlâktu tlûnah thungâi ka thin a run.

³Sikhawmsele tuah ka nan ti na, Ka sinah hawng kîr ule, kei khawm nan sinah ka hawng kîr lai.

⁴An thlâk natu hâwi hen um lah u, a lânah khuavâng tla nih ṭhalo tak leh sual tak hen umlo rawh ding hen ka thuchah an simh na, sikhawmsele ka thu an ngâi hen an zûl lo.

⁵Chu nan thlâktu leh khuavâng tla chu an thi rawh.

⁶Ka to-aw khuavâng tla mang hen an thlâk natu tla chu thu ka pêk hen ka simhkan na le, sikhawmsele zeikhawm an rêl lo le, chu lak chun an tuar phah. Ti ding ka duh mi hâwi hen kei, LALPA nih an sual mi ruangah ka rêp na,” a ti.

⁷Darias a lal mi kum nihnâk a thla leikhatnâk ni kul leh ni li (zân ah chu chu Sebat thla) ah LALPA nih zân langhnâk ah thuchah hawng ka simh.

⁸LALPA vânmifial rang sen tlûnah â chuan mi ka muh le, tivakuam ah lênmui thing nâwngah â dîn le, a dunglei ah rang dang tla, a sen mi, a senduk mi leh a ngo mi tla an um.

⁹Kei nih, “Pu, hi rang tla hi zei tinâk mesi?” ka ti. Anih nih hawng ka sâng le, “Zei tinâk asi kan muhtir lai.

¹⁰LALPA nih tual zauhdik ding hen a hawng fial na mi asi,” a ti.

¹¹Vânmifial sinah thu an sim le, “Laikulh pumpi kan ṭawl le, laikulh chu ṭangpitu neilo leh nâuneh hen a um mi kan muh,” an ti.

¹²Churawhchun vânmifial nih, “LALPA, Zeizawng tikho, tuah Jerusalem leh Juda khuapi lakah na thinrun mi chu kum sâwmsarih asi rawh. Khuaruatnâk neilo hen zeitiang riamruam me na siah awt?’” a ti.

¹³LALPA nih vânmifial chu thlangamhnâk thu hen a sâng le,

¹⁴vânmifial nih LALPA Zeizawng tikho thusim chu sim ding hen hawng ka simh: “Jerusalem, ka khua thenhlimh chu thungâi ka dawn hen ka dâwt.

¹⁵Phun tla anna lâwm mi leh thlangam tak hen an um mi thungâi ka rothawk. Ka mi le tla, phundang tla nih ṭhalo tak hen an tuartir na liauah ka mi tla tlûnah ka thinthawknâk chu ka sûm râm.

¹⁶Churuangah khuapi lakah ka khuaruatnâk langh ding hen Jerusalem ah ka kîr nawlh, ka Biakin khawm sak nawlh hen a um lai le, khuapi khawm dirh nawlh hen a um lai,” a ti.

¹⁷Chu vânmifial nih thu sim ding mi hawng ka simh, “LALPA Zeizawng tikho nih khuapi chu sul-le-lam tluang tak hen a um nawlh lai le, Jerusalem khawm chu ṭangpi nawlh hen amah khuapi ah a ruat nawlh lai,” a ti.

¹⁸Langhnâk dangah chawchal ki pali ka muh.

¹⁹Vânmifial hawng ka sawnhtu sinah, “Hi bang ki tla hi zei tinâk mesi?” ti hen ka deih. Anih nih hawng ka sâng le, “Juda, Israel leh Jerusalem ah um mi tla rekrâwi tirtu dingah laikulh ruangrûl ah thiltikhonâk neitu ah dîr mi an si,” a ti.

²⁰Churawhchun LALPA nih tukboh hen rianṭuantu pali hawng ka zauhtir.

²¹Kei nih, “Hi minung tla hi zei ti ding hen hawng mi me an si?” ti hen ka deih. Anih nih, “Juda ram veih deptu leh a mi tla tek tir phintu phun tla lauh na ding leh neh dingah an hawng mi asi,” ti hen hawng ka sâng.