Read Bawm Chin ZEKARIA 11 Bible Online

ZEKARIA 11 - Bawm Chin bible

ZEKARIA 11

¹Lebanon, na sidar thing tla kâng kho ding hen na inkhâr awng rawh.

²Sidar thing rokual tak chu a tlû rawh, far thing, ṭap ule, lungfâk tak hen um u! Basan a mi oak thing tla, tumun sah tak chu vât hen a um ruangah ṭap ule, lungfâk tak hen um u.

³Lâirêltu tla chu ngaihsia hen an ṭap le, an rokualnâk chu a vei rawh! Chakeibaknei a hûk mi ngâi rawh, an umnâk Jordan vadung ah mi an thing mun chu a vei rawh!

⁴LALPA, ka Pathian nih ka sinah, “Dawrâ rual lakah mi dawrâ vêngtu vo ran thahnâk mun ah kalpi ding mi chu ruat.

⁵An dâwngpu tla nih an thah na le, rêplo hen an kal. A sa an zuar le, ‘LALPA chu thangṭhat hen um seh! Kan nei rawh!’ an ti le, anmah vêngtu khawm nih a lungkham na lo,” a ti.

⁶(LALPA nih, “Tual tlûnah mi âukhawm ka lungkham na awt lo rawh, keimah tak nih an lâirêltu thu thu hen um na ding hen ka siah na awt. Chubang lâirêltu tla nih tual an râwk lai le, an thiltikhonâk lakah mi ka hum awt lo,” a ti.)

⁷Dawrâ tla châwktu leh zuartu nih an hawng ka mang le, thahnâk ah put ding mi dawrâ rual vêngtu ah ka chang ving. Ṭhianṭhunh panih ka lâk le, pakhat chu “Sunhsak mi” a dang pakhat chu “Thurualnâk” ka ti. Churawhchun ranrual chu ka zauhkhenh.

⁸Dawrâ vêngtu pathum dang hawng ka huatu chu ka tuar na kho lo rawh le, thla khat kar sungah ka kiangtâk ving na.

⁹Churawhchun ranrual tla sinah, “Nannih vêngtu ka si awt lo rawh, a thi ding mi chu thi ko u, a vei ding mi chu vei ko u, a thibang tla chu anmah leh anmah a veih na seh,” a ti.

¹⁰Churawhchun “Sunhsak” ka ti mi ṭhianṭhunh chu ka lâk le, ka khiak le, chu chu LALPA nih phun tla zawzawng hen thudântuk a siam mi râwknâk ding hen asi.

¹¹Chu ni ah chun thudântuk chu râwk asi rawh. Hi bang dawrâ rual châwktu leh zuartu nih hin an ka zauh thlingthlâk le, ka thilti lakah LALPA nih thu a sim mi asi ti an theih.

¹²An sinah, “Nan duh chun ka rianṭuantu lawh man hawng ka pêk u, asi lo chun kil ko u, churawhchun ka rianṭuan man dingah tangka sâwmthum an hawng ka pêk.

¹³LALPA nih ka sinah, “Biakin tangka siahnâk ah siah,” hawng ka ti. Churawhchun ka rianṭuan man tâwk ding hen an hawng ka pêk mi tangka sâwmthum chu Biakin ah ka siah rawh.

¹⁴Ṭhianṭhunh panihnâk “Thurualnâk” ti mi chu ka khiak le, ‘Juda leh Israel tlâinâk chu ka râwk rawh.

¹⁵Churawhchun LALPA nih ka sinah, “Dawrâ vêngtu tingvo tuah mang tlâk lo tak hen a um mi pakhat hi ti nawlh.

¹⁶Ka dawrâ rual zauhkhenhtu ah ka dawrâpu ka siah le, sikhawmsele veihtu nih a ṭhih na mi lakah a âwva lo le, a tlâu mi khawm a sunhsak lo, â liam mi khawm a thlawp lo, a thibang khawm râwl a pêk lo, chu hâwi ngâk hen dawrâ rual lakah a bit chem mi sa tla a ei le, an ketin khawm a thlêr piak na.

¹⁷Chu hâwi mi dawrâ vêngtu mang tlâk lo chu a vânduai rawh! A dawrâ tla a kaltâk na, râltuknâk nih a thiltikhonâk a veih dep lai. A bân a uai lai le, a vawrhlei mit a chaw lai,” a ti.