Read Bawm Chin ZEKARIA 12 Bible Online

ZEKARIA 12 - Bawm Chin bible

ZEKARIA 12

¹Hi hi Israel mi tla thu ah LALPA vân siamtu, tual tuahtu leh minung nungnâk pêktu thawk hen thuchah chu asi:

²“Jerusalem chu uain hâi hâwi hen ka siam lai; a kiangkam ah phun tla nih an din lai le, zurî mi tla hâwi hen an hâwr lai. Jerusalem an hual tikah chun Juda khuapi khawm an hual sih lai.

³Chu tik a hawng tlung tikah chun Jerusalem chu lung rit tak hâwi hen ka siam lai le, zei phun zawng nih châwi ding tumtu chu nganfâk an tawng lai. Jerusalem do ding hen laikulh phun zawzawng thu anna rual lai.

⁴Chu tikah chun rang tla chu ka loh na lai le, a tlûnah anna chuan mi tla chu â thlo hen an kal lai. Juda mi tla chu ka vêng na lai le, sikhawmsele an mêlma rang tla chu an mit ka chawttir lai.

⁵Churawhchun Juda phun tla nih an thinlung ah ‘LALPA Pathian Zeizawng tikho nih a mi Jerusalem ah um mi tla chu chaknâk a pêk na,’ an ti lai.

⁶“Chu tik chun Juda phun tla chu tumun mi mei hâwi hen mawh phâisen a mi fâng min hâwi hen mawh ka siam na lai le, an kiangkam a mi phun tla chu an veih phin na lai. Jerusalem mi tla chu him ziar hen an um lai.

⁷“A masachem hen kei, LALPA nih Juda kawrsen tla sinah nehnâk ka pêk lai le, David thlâk leh Jerusalem ah um mi tla nih rokualnâk anna ting ding mi chu Juda mi tla ngâk hen a rokual lai lo.

⁸Chu tikah chun Jerusalem ah um mi tla chu LALPA nih a hum na lai le, anmah lakah a chak lo chem mi khawm David hâwi hen an chak lai. David thlâk tla nih chun LALPA vânmifial hâwi leh amah Pathian tak hâwi hen an rui na lai.

⁹Chu tik chun Jerusalem do tumtu phun chu ka veih hep na lai.

¹⁰“David thlâk leh Jerusalem ah midang um mi tla chu khuaruatnâk thlarau leh thlachamnâk thlarau hen ka khattir na lai. Thi thlo an sunh mi chu an zauh lai le, mi nih a fa neihlem tlûnah a lungfâk mi hâwi a lakah an lungfâk lai. An fa tîr thi mi lakah an lungfâk hâwi hen thungâi an lungfâk lai.

¹¹Chu tikah Jerusalem ah lungfâknâk chu Megido phâi ah Hadadrimon ruangah an lungfâk mi hâwi tluk hen an lung a fâk lai.

¹²Ram lakah dâwngsungkhur kip lungfâknâk an nei lai: David thlâk dâwngsungkhur tla, Nathan thlâk dâwngsungkhur tla, Levi thlâk dâwngsungkhur tla, Simei thlâk dâwngsungkhur tla leh dâwngsungkhur dang zawzawng khawm, dâwngsungkhur kip an lungfâk chiau lai le, nunau mipa a dang chereh hen an lungfâk chiau lai.