Read Bawm Chin ZEKARIA 4 Bible Online

ZEKARIA 4 - Bawm Chin bible

ZEKARIA 4

¹Vânmifial hawng ka sawnhtu chu a hawng nawlh le, it mi ṭhangh hâwi hen hawng ka ṭhangh.

²“Zei na muh?” ti hen hawng ka deih. Kei nih, ka sâng le, “Khâwnvâr ngûn hen siam mi, a pâr ah a hâng siahnâk khêng um mi, khâwnvâr pasarih a mun pasarih seng siah mi,

³chu khâwnvâr sîr vevê ah oliv thing kûng nih a um,” ka ti.

⁴Churawhchun vânmifial sinah, “Pu, hi bang thil tla hi zei rang ding mesi?” ti hen ka deih.

⁵Anih nih chun, “Na theih lo ma?” hawng ka ti. Kei nih, “Ka theih lo pu,” ti hen ka sâng.

⁶Chu vânmifial nih chun Zerubabel sinah Lalpa thu va sim ding hen hawng ka simh: “Kawrsen chaknâk leh nangmah chaknâk chu silo hen, keimah thlarau chaknâk hen asi dauh lai.

⁷Na mâika ah tlâng lian hâwi hen khamtu chu a tlâu lai. Biakin na sak nawlh lai le, a lungphûm madung chem na phûm liauah mi tla nih, ‘Â dawh a! Â dawh a!’” ti hen an âu lai.

⁸LALPA thawk hen thuchah dang a hawng suak nawlh. Anih nih chun,

⁹“Zerubabel nih Biakin lungphûm chu a phûm rawh le, a in sak chu a lîm lai rawh. Chu hâwi hen thil a hawng um tik chun ka mi tla nih an sinah kan fial mi na si ti an theih lai rawh.

¹⁰Mâilei fûknâk tâwmtê asi ruangah an lung a dawng, sikhawmsele Zerubabel nih Biakin a sak vima mi chu an muh lai le, anna lâwm lai rawh,” a ti. Vânmifial nih ka sinah, “Khâwnvâr pasarih chu LALPA mit pasarih, laikulh zawzawng muhtu chu asi,” a ti.

¹¹Churawhchun kei nih, “Khâwnvâr khatlei sîr vevê ah oliv thing panih a um mi hi zei tinâk?

¹²Ngûn chawng panih thawk hen oliv sariak luangnâk sîrah oliv ṭeng panih chu zei tinâk mesi?” ti hen ka deih.

¹³Anih nih, “Na theih lo ma?” hawng ka ti. Kei nih, “Ka theih lo pu,” ti hen ka sâng.

¹⁴Churawhchun anih nih, “Hi minung panih hi LALPA nih laikulh pumpi ah amah rianṭuantu dingah sariak a thuh na hen a thîm na mi chu an si.