Read Bawm Chin ZEKARIA 6 Bible Online

ZEKARIA 6 - Bawm Chin bible

ZEKARIA 6

¹Langhnâk dang pakhat ka nei nawlh le, chu tan chun tlâng sen vulval panih kar thawk hen kari pali an hawng suak mi ka muh.

²Kari masachem chu rang sen tla nih an nûk le, a panihnâk chu rang dum tla nih an nûk,

³a pathumnâk chu rang ngo tla nih, a palinâk chu rang ṭial tla nih an nûk.

⁴Churawhchun kei nih vânmifial sinah, “Pu, hi bang kari tla hi zei tinâk mesi?” ti hen ka deih.

⁵Anih nih a sâng le, “Hi bang tla hi thli pali an si. Laikulh pumpi LALPA mâika thawk hen hawng mi an si,” a ti.

⁶Rang dum nih a nûk mi kari chu marlei Babolon ah kal ding mi asi le, rang ngo nih a nûk mi chu thlanglei kângah, rang ṭial nih a nûk mi chu simlei kângah kal ding mi an si.

⁷Rang ṭial tla chu an suak liauah thungâi kal an mawhlah le, tual chu an zauhfiang. Chun vânmifial nih, “Kal le tual chu va zauhfiang u,” a ti na le, chu hâwi hen an ti.

⁸Churawhchun vânmifial nih hawng ka auh le, “Marlei kâng Babulon ah rang kal mi tla nih chun LALPA thinthawknâk an bângtir,” a ti.

⁹LALPA nih hi thuchah hi hawng ka pêk.

¹⁰“Sal ah tâng mi tla, Heldai, Tobijah leh Jedaiah nih thil an pêk mi chu lâk le, Zephaniah fapa Josiah in ah kal sawm.

¹¹Ngûn leh tangkasa an pêk mi hen lallukhuh siam le, Jehozadak fapa Bâwlpu Lian Josua lû ah khuhtir.

¹²LALPA, Zeizawng tikho nih a sim mi thu simh rawh: Ṭeng ti hen min sak mi chu a mun ah a hawng ṭhang lai le, LALPA Biakin a dirh nawlh lai.

¹³Amah chu a saktu ding mi leh lal sinâk hen zahnâk tawng ding mi leh a mi tla lâirêltu ding chu asi. Bâwlpu chu a laltophah sîrah dîr hen munkhat hen rian an tuan lai le, thlangam leh nuam tak hen an um lai.

¹⁴Chu lallukhuh LALPA Biakin ah mi chu Heldai, Tobijah, Jedaiah, leh Josiah zah an kâi mi theihkumzanâk asi lai,” a ti.

¹⁵Ram lât takah um mi tla chu LALPA Biakin sak nawlh mi ṭangpitu ah an hawng lai, chu Biakin chu an sak nawlh tikah LALPA Zeizawng tikho nih nan sinah hawng ka fial mi ka si ti nan theih lai. LALPA nan Pathian thupêk nan zûl ver chun hi bang zawzawng hi a hawng tlung ver lai.