Read Bawm Chin ZEKARIA 7 Bible Online

ZEKARIA 7 - Bawm Chin bible

ZEKARIA 7

¹Lal Darias a lal mi kum linâk a thla kuanâk (Kislev thla) a ni li ni ah LALPA nih thuchah hawng ka pêk.

²Bethel mi tla nih chun LALPA malsâwmnâk deih ding leh khuavâng leh bâwlpu tla hi thu hi deih na ding hen, Sarezer leh Regemelek leh an minung tla LALPA Zeizawng tikho Biakin ah an fial na:

³“Biakin a râwk mi thu ruangah kum sâwt tak a thla nganâk thawk hen tusûn ni tiang lungfâk tak hen buh kan ngei mi hi ti vima ding ma asi awt?” an ti.

⁴Hi hi LALPA thawk hen thuchah ka sinah a hawng tlung mi chu asi:

⁵“Ram lakah mi tla leh bâwlpu tla nih kum sâwmsarih sungah thla nganâk leh thla sarihnâk sungah buh an ngei mi chu keimah sunhsaknâk ruangah asi lo,

⁶an ei hen an din mi chu mah paw khimnâk rang ding cho asi,” a ti.

⁷LALPA nih a tîrah mi khuavâng mang hen Jerusalem sul-le-lam tluang tak a um hen minung tla khat hen an kiangkam ah khuapi tla ah mi tamtak um mi lâwng silo hen simlei ram leh thlanglei tlângbul tla khuapi ah an um liau khawmah thu a sim mi chu hi hi asi.

⁸LALPA nih Zekaria sinah hi thuchah hi a pêk.

⁹“A lân thawk hen ka mi tla sinah hi thupêk tla hi ka pêk na rawh: ‘Rep tak hen thil nan ti ding asi, nan lakah khatlei khatlei vêlneih suah ule, khuaruat u.

¹⁰Nan lakah numei leh ngâkṭah tla, ramdang mi minung leh ṭangpi herh âuzawng um mi tla chu nâuneh lah na u,’ ka ti na.

¹¹“Sikhawmsele ka mi tla nih lungkhung tak hen an êl le, an ngâi duh lo.

¹²An thinlung chu lungpi hâwi hen an changtir le, ngaihlo lêm an thlâk. A lânah mi khuavâng fial hen sîntirnâk ka pêk na mi an ngâi lo ruangah thungâi ka thinrun.

¹³An sinah thu ka sim mi an ngâilo ruangah thla an cham mi khawm ka ngâi lo.

¹⁴Thlipi hâwi hen ramdang ah um ding hen ka sêm phin na. Hi ram ṭha tak hi a luahtu pakhat khawm umlo hen mâk hen a um.