Read Bawm Chin ZEKARIA 8 Bible Online

ZEKARIA 8 - Bawm Chin bible

ZEKARIA 8

¹LALPA Zeizawng tikho nih Zekaria sinah hi thuchah hi a pêk:

²“Jerusalem chu ka mi dâwt tak tla ruangah a mêlma tla hen ka thin hawng ka thawktir khawmsele amah ṭangpi ding hen ka duh.

³Ka khuapi thenhlimh Jerusalem ah ka kîr nawlh lai le, chunah chun ka um lai. Khuapi zumhkâi tak ti hen theih asi lai. LALPA Zeizawng tikho tlâng chu tlâng thenhlimh ti asi lai.

⁴Tarnu leh tarpa, an tar tuk ruangah ṭhianṭhunh mang hen kaltu tla chu khuapi zâwllâi tla ah an to lai.

⁵Khualâi tla chu mipa ngâksia leh nunau ngâksia tla pang mi hen an khat nawlh lai.

⁶“Tuah thibang phun tla nih chubang chu muh ding har ual ding hâwi hen a lang le, sikhawmsele kei rang lam chun tikho lo ding mi asi lo.

⁷Kalpi ving hen ka mi tla an umnâk ram a mi chu ruang ka suah na lai le,

⁸Jerusalem ah um ding hen saklei ah leh thlanglei ah mi chu ka kîrpi nawlh lai. Annih chu ka mi tla an si lai le, kei chu an Pathian ka si lai le, an tlûnah rep tak leh zumhkâi tak hen lâirêltu ka si lai.

⁹“Râlṭha tak hen um u! Ka Biakin sak nawlh ding hen lungphûm an phûm liauah khuavâng tla nih thu an sim mi hâwi kha tuah nan theih rawh asi.

¹⁰Chubang hun lân chun minung mawh ran mawh âukhawm nih tikho ding hen an nei lo le, âukhawm an mêlma lakah mi him hen an um kho lo. Anmah leh anmah ka dotir na.

¹¹Sikhawmsele tu chun hi phun lakah thibang tla chu dang ving hen ka siam na rawh.

¹²Thlangam tak hen thlâi tla an chîng lai rawh. An grep zûn tla nih rah a suah lai le, tual nih rah tamtak a suah lai le, ruah tamtak a sûr lai. Hi bang phun tla lakah ka mi thibang tla chu hi zawng malsâwmnâk tla ka pêk na lai.

¹³Juda leh Israel mi tla! Ramdang mi tla nih a lânah Juda leh Israel lakah siatnâk a tlung mi hâwi hen na tlûnah tlung seh’ ti hen siat anna barh tawnh le! Sikhawmsele ruang ka nan suah na lai le, churawhchun ramdang minung siat anna barh tawnh mi tla nih ‘Juda leh Israel mi tla tlûnah malsâwmnâk a tlung mi hâwi hen a malsâwmnâk a ting rawh’ anna ti tawnh rûl lai rawh. Churuangah râlṭha tak hen um ule, lâu lah u,” a ti.

¹⁴LALPA Zeizawng tikho nih, “An thlâk natu nih ka thin an thawktir liauah anmah siat leh râwk ding ka thinrunnâk thinlung chu lêt lo hen ka tum mi ziatê hen ka ti.

¹⁵Sikhawmsele tu lam chun Jerusalem mi tla leh Juda chu malsâwm na ding ka tum. Churuangah lâu lah u.

¹⁶Hi bang hi nan ti ding mi thil chu asi: Thudik a simh tawnh u, thlangamnâk leikâng mi lâirêlnâk in ah thudik sim u.

¹⁷Nganfâk a pêk tawnhnâk leikâng tum lah u. Âwkrâwl thusim hen thu tiam lah u. Âwkrâwl replonâk, siatnâk tla ka hua asi,” a ti.

¹⁸LALPA Zeizawng tikho nih hi thuchah hi Zekaria sinah a sim:

¹⁹“Thla linâk, thla nganâk, thla sarihnâk leh thla rânâk ah buh ngeinâk chu Juda mi tla rangah lâwmnâk puai leh lâwptlonâk puai a hawng si lai. Thudik leh lungngamnâk nan duh ding asi,” a ti.

²⁰LALPA Zeizawng tikho nih, “Khuapi tamtak thawk hen Jerusalem ah mi tla an hawng ding mi tik chu a tlung rawh.

²¹Chubang khuapi tla thawk hen a hawng mi tla nih an hâwi le sinah, “LALPA Zeizawng tikho sawnh ding leh malsâwmnâk ngiar ding hen a sinah kan kal awt.

²²Kan sinah hawng bâk u! Mi tamtak leh phun thiltikho tla chu Jerusalem ah LALPA Zeizawng tikho sawnh ding leh a sinah malsâwmnâk deih ding hen an hawng awt.

²³Chubang ni ah chun ramdang mi parâ Juda mi pakhat sinah an va kal lai le, ‘Na sinah Pathian a um ti kan theih ruangah na hun dawnghnâk leikângah na vo an pêk ding kan duh, an ti lai,” a ti.