Read Bawm Chin MALAKI 1 Bible Online

MALAKI 1 - Bawm Chin bible

MALAKI 1

¹Hi hi Israel mi tla simh na ding hen LALPA nih Malaki sinah thuchah a pêk mi chu asi.

²LALPA nih a mi tla sinah, “Ka nan dâwt kumza na asi,” a ti. Sikhawmsele annih nih an sâng le, “Kan rangah na kan dâwt mi zei hâwi hen na langh,” an ti. LALPA nih a sâng le, “Esau leh Jakob chu unau an si le, sikhawmsele Jakob leh a thlâk tla chu ka dâwt na.

³Esau leh a thlâk tla lam chu ka hua na. Esau tlâng ram chu ka râwk le, ramsa rangah ram chu ka mâk rawh,” a ti.

⁴Esau thlâk tla, Edom mi tla nih chun, “Kan khuapi tla chu râwk hen um khawmsele, kan dirh nawlh lai le, LALPA nih a hawng kan sâng nawlh lai,” an ti le, sikhawmsele LALPA nih sak nawlh na ko seh, ka siat nawlh awt nget. Mi nih ‘Sualnâk ram leh LALPA thinrun kumzanâk phun,’ an ti lai.

⁵Israel nih anmah mit ngelchel hen an muh lai le, “Israel ram lênglei khawmah LALPA chu a chak asi!” an ti lai.

⁶LALPA Zeizawng tikho nih bâwlpu tla sinah, “Fapa nih chun a pa a zah le, to-aw nih a hotu a zah. Kei nan pa ka si mi zeirangah nan ka zah lo zia? Nan hotu ka si mi, zeirangah nan hawng ka zah lo? Nan hawng ka zauhnawmh le, zei hâwi hen kan zauhnawmh lai ti hen nanna deih.

⁷Nan ka zauhnawmhnâk chu mâichâm ah sang nâwmtâm nan hawng ap mi lakah asi. Asi chun, ‘Nang rangah zeitin kan zah lo zia?’ nan ti le, ka mâichâm nan siarlo mi ruangah asi ti kan simh na.

⁸Bâwlnâk ah ran a ngawr mi mawh, a mit a chaw mi mawh, a khêng mi mawh nan hawng put mi lakah zeikhawm diklonâk umlo hen ma nan ruat? Lâirêltu sinah chubang hâwi ran chu pêk nik kher u! A nan lawmh na hen an sunhsak na lai ma?” a ti.

⁹Nannih bâwlpu tla, kan lakah Pathian ṭha ding hen deih nik kher u me. Nan thlachamnâk a sâng rêng lai lo, chu chu nan sual ruangah asi.

¹⁰LALPA Zeizawng tikho nih, “Nan lakah minung pakhat nih ka mâichâm tlûnah manglo ding mi mei tih lo ding hen Biakin khâr pang sele ka duh. Nan tlûnah ka lâwm lo, ka sinah thil ap nan hawng put mi ka pawm awt lo.

¹¹Laikulh khatlei dawmh thawk hen a dawng tiang khawm nih an hawng ka zah. Mun kipah rimthâw tla an duah le, ka sinah bâwlnâk pawmtlâk an hawng ap, chu zawng nih chun an hawng ka zah asi!

¹²Sikhawmsele nannih nih chun ka mâichâm chu zah tlâklo hen nan ruat le, sang nan zauhnawmh mi tla nan hawng ap mi lakah nan hawng ka zah lo asi.

¹³‘Nengtawr a kâi!’ nan ti le, nan nâr nan hawng ka phît nawh. Thil ap nan hawng put mi tla chu ran fîr mi tla mawh a khêng mi tla mawh a ngâwr mi tla an si. Chubang hâwi mi chu pawm ding hen ma nan hawng ka ruat?

¹⁴Mang tlâklo mi ran hen zauhnawmh tak hen hawng ka pêktu sinah siat um seh. Ka sinah a tiamh liauah chun a ranrual lakah a ṭha mi pêk ding â tiam! Kei chu phun zawzawng nih an hawng ka ṭih mi lal rokual tak ka si,” a ti.