Read Bawm Chin MALAKI 3 Bible Online

MALAKI 3 - Bawm Chin bible

MALAKI 3

¹LALPA Zeizawng tikho nih a sâng le, “Ka rangah lampi hawng ka siam piak ding hen ka fial awt. LALPA hawng ding hen nan lungum mi chu Biakin ah a hawng sawm lai. Mifial muh ding nan duh mi chu a hawng lai le, ka thudântuk a phuang lai,” a ti.

²Sikhawmsele a hawng kal ni ah chun âu nih tuar kho lai? A hawng lang tikah âu a him kho lai? Anih chu sabung chak tak hâwi leh thîr zawrtirnâk mei hâwi asi lai.

³Mi nih tangka a êr le, a thenhlimhtir mi hâwi hen lâirêl ding hen a hawng lai. LALPA sinah bâwlnâk dik tak an pêk khonâk ding hen LALPA mifial nih chun thîr siamtu nih tangka leh ngûn a êr mi hâwi hen bâwlpu tla chu a thiangtir na lai.

⁴Churawhchun Juda mi leh Jerusalem mi tla nih LALPA sinah thil ap an hawng put mi tla chu a lânah mi hâwi hen LALPA nih a lawmh lai rawh.

⁵LALPA Zeizawng tikho nih, “Lâirêl ding hen nan lakah ka hawng a langh lai le, dâwithiam, ṭângdang pawm mang, thâwngthâng diklo simtu, rianṭuantu tla lawh lakah perpettu leh numei tla, ngâkṭah tla, ramdang minung lakah nâunehtu leh hawng ka zahlotu zawzawng sâwi hen thu ka sim awt.

⁶“Kei, dang kholo mi LALPA ka si. Churuangah nannih Jakob thlâk tla nan vei dep rîlmâl lai lo.

⁷Nannih tla hi nanmah lânah an thlâk natu tla hâwi hen ka dân nan kaltâk hen nan zûl lo, ka leiah hawng a hawi ule, kei khawm nanmah leiah ka hawng hawi lai. Sikhawmsele nannih nih, Nangmah lei hawng a hawi ding hen zei kan ti awt?’ nan ti le,

⁸Kei nih, minung nih Pathian rangah a perpet mi hi a dik ma?’ A dik lo thlo sikhawmsele nannih nih nan hawng ka perpet, ‘Zei lakah? nan ti. Parâ lû ah pakhat pêk leh nan thil ap lakah.

⁹Phun zawzawng nih nan ka perpet ruangah nan tlûnah siatbarh nan si.

¹⁰Tî-râwl tamtak um kho ding hen Biakin ah parâ lû pakhat hawng put u. Hawng ka nik ule, vân langawtkawt ka awng lai le, thil ṭha chikip tamtak ka hawng thlêt mi nan muh lai.

¹¹Thlâi râwktu thilnung tla ka veih lai le, nan grep zûn tla chu kûr rê hen a rah lai.

¹²Nan ram chu umnâk ṭha tak asi awt ruangah phun tla zawzawng nih mi lâwptlo tla an ti na lai.

¹³“LALPA nih, ‘Nannih nih, ka thu hi thil ṭihnungkâi asi nan ti,’ a ti. Sikhawmsele nannih nih, ‘Na thu zei hâwi hen kan sim’ nan ti le,

¹⁴‘Pathian rianṭuan hi zeikhawm asi lo nan ti mi ruangah, LALPA nih a sim mi hâwi a thilti mawh thil kan ti rawh mi lakah pawi kan ti mi thu a sinah va langh ding tum hi zei me a ṭhatnâk a um?’ nan ti.

¹⁵Kan muh mi hâwi hen mi zûm tla chu mi lâwptlo tla an si. Misual tla chu sul-le-lam tluanglonâk lâwng silo hen Pathian dawnhkhonâk chu an thilsual ti hen an nik le, anna kiang ving!” a ti.

¹⁶Churawhchun LALPA ṭihtu tla chu thu anna ruah le, LALPA nih an thusim chu a ngâi le, a theih rawh. Amah ṭihtu leh zahtu tla thilti rînnâk chu LALPA mâika ah lasuibu lakah rîn hen a um.

¹⁷LALPA Zeizawng tikho nih, “Ka mi tla an si lai, thil ka ti ni ah chun ka tâ tak an si lai, pa nih a rianṭuantu a fapa tlûnah khua a ruat mi hâwi hen an tlûnah khua ka ruat lai.

¹⁸Veikhat chu ka mi tla nih mirep leh misual tlûnah thil a hawng um ding mi tla, ka rianṭuantu leh ṭuanlotu tlûnah â dang zia an muh teh lai,” a ti.