Read Bawm Chin DEUTERONOMY 13 Bible Online

DEUTERONOMY 13 - Bawm Chin bible

DEUTERONOMY 13

¹“Nan lakah khuavâng nih mawh mang simhfiangtu nih mawh, a lânah nan sawnh dah loh mi Pathian sawnh leh zûl ding hen thilchê ti leh langhtir hen,

²chu leikângah kalpi ding hen an awtpi na kho; chu hâwi hen ti na menza khawmsele,

³an thu tla ngâi piak na lah u. LALPA, nan Pathian nih nan thinlung zawzawng hen, amah chu nan dâwt ma dâwtlo ti muh ding duh hen a nan nik na mi asi.

⁴LALPA chu ṭih hen amah chu zûl ule, ê-aw ngâi tak hen a thupêk tla zûl u, zumhkâi tak hen amah chu sawnh u.

⁵Aigupta ram ah sal nan sinâk ah mi an suah natu lakah heltu, mang simhfiangtu mawh, khuavâng mawh si mi âutal nan thah na ding asi. Chubang hâwi minung tla chu misual, LALPA nih um ding dân thu an pêk na mi lakah mi chu pial tâk ding hen an awt natu an si. Chu sualnâk lakah mi chu nan suak khonâk ding hen anmah tla chu nan thah na ding asi.

⁶“Na unau nih mawh, na fapa nih mawh, na fanu nih mawh, na nupi na dâwt tak mi nih mawh, na kâwi tak nih mawh, an thlâk natu nih an sawnh dah lo mi pathian sawnh ding hen an fawrh na kho.

⁷An lakah âu nih mawh, nan kiangkam mi pathian mawh, lât tak a um mi pathian mawh sawnh ding hen an fawrh na kho.

⁸Anmah perpet ding hen um lah ule, an thu khawm ngâi lah u. An lakah khuaruat lah ule, lungkham lah na ule, hum lah na u.

⁹Amasa chem ah lung hen seh masatu si rawh, chu tikah midang tla khawm nih seh bâk na seh.

¹⁰Thi thlo hen seh u! Aigupta ram ah sal nan sinâk ah mi an suah natu LALPA nan Pathian lakah mi chu mahlo leikângah an pialpi na ding hen a awt ruangah.

¹¹Chu tikah Israel mi tla nih thil umdân chu an theih lai le, an lâu lai le, chu hâwi thilsual chu âukhawm nih an ti lai lo rawh.

¹²“LALPA nan Pathian nih a nan pêk na mi khuapi lakah nan va um tikah

¹³mi-do-tla-lo zeimaw mi nih a lânah nan sawnh dahlo mi pathian sawnh ding hen an khua lakah mi minung tla mahlo leikângah an kalpi na mi nan theih tâwn lai.

¹⁴Chu hâwi thu thang nan theih chun, deihfiang ver na ule; chubang thilsual chu a um tak ti nan theih chun,

¹⁵chu khua mi an minung leh ranrual hen thah hep na u. Chu khua chu veih dep u.

¹⁶Chunah mi tla neih-le-siah tla chu munkhat ah pawng ver ule, kil li hen pawng u. LALPA sinah thil ap rang dingah thil zeizawng a khua hen duah hep u. Râwk dep hen siah asi lai le, zeiliau khawm sak nawlh asi lai lo rawh.

¹⁷Zei thil tal rawk ding hen nawmh asi mi chu mah rangah kil lah u, chu tikah LALPA nih a thinthawknâk a lêt lai le, nan lakah khua a ruat lai. A nan thlâk natu tla sinah thu a tiamh mi hâwi hen nan lakah khua a ruat lai le, a nan puatir na lai.

¹⁸Tusûn ni ah thu ka nan pêk na mi zawzawng hi nan zûl hen a nan ngiar na mi tla nan ti mi asi chun.