Read Bawm Chin DEUTERONOMY 19 Bible Online

DEUTERONOMY 19 - Bawm Chin bible

DEUTERONOMY 19

¹“LALPA nan Pathian nih an ram a nan pêk na mi minung tla a veih na hen an khuapi leh an in tla lakah nan va um tikah

²ram chu mun thum hen ṭhen ule, a khuapi tla chu awlzâng tak a tlung kho ding hen. Mi âumawh mi thahtu chu chu khua tla lakah himnâk a zei khua tal ah a va tek hen a him khonâk ding hen.

⁴Mi nih a mêlma silo mi âumawh a thah palh chun, hi khuapi tla a zei lak tal ah him ding hen a tek khonâk ding hen.

⁵Hawlhnâk ah, thing hâu ding hen mi panih thing mun ah va kal sele, mi pakhat nih thing a hâu hen reitlung chu a hâ lakah mi tlawng hen a hâwipa tlâk hen thi sele, hi khuapi pathum lakah a zei mi tal ah him ding hen a tek kho lai.

⁶Khuapi pakhat cho a um chun, anna lât tuktarâi lai le, a unaupa phû lamtu ding mi nih a tleih sual lebang lai le, a sual lo mi pa rangah a thinthawk tuk ah a thah sual lebang lai. Palh-le-rah ruang ko ah a mêlma silo thlo hen a thah mi asi ruangah.

⁷Churuang tak asi khuapi pathum siam ding hen thu kan pêk na mi chu.

⁸“LALPA nan Pathian nih a nan thlâk natu sinah ka ti lai, ti hen a simh na mi hâwi hen nan ram an kauh piak na tikah leh thu a tiamh mi hâwi hen ram zawzawng a nan pêk na tikah khuapi pathum nan thîm rih ding asi.

⁹(LALPA nan Pathian chu nan dâwt hen leh tusûn ah thu ka nan pêk na mi hâwi hen zeizawng nan ti hen, a nan sîntir na mi hâwi hen nan um chun hi ram hi a nan pêk na lai.)

¹⁰Hi hi ti ule, thilsual tilo mi tla chu an thi lonâk ding leh LALPA nih a nan pêk na mi ram ah mi thah ruangah nan mawh lonâk ding hen.

¹¹“Sikhawmsele, mi nih a mêlma a thah hen, chubang khua lakah mi khua pakhat ah him ding hen a va tek kho.

¹²Chubang thu lakah chun a umnâk khua lakah ruitu tla nih a thah mi rualsia phû lamtu ding mi kut ah a va pêk lai le, anih nih a thah bâk ding hen.

¹³Tâwmtê khawm khuaruat lah seh. Israel lakah mi thah hi a um lonâk ding leh thil zeizawng a tluang khonâk ding hen.

¹⁴“LALPA nan Pathian nih a nan pêk na mi ram ah a lân thawk hen nan unau tla hen nanna rînâk nan singsiah hen birhtir rawh mi chu ṭhial lah u.

¹⁵“Mi nih thilsual a ti mi lakah theihtu pakhat ko chu a tam tâwk lo; mi a mawh asi ti theih ding hen a tâwm leiah theihpitu panih a herh.

¹⁶Minung pakhat nih midang rangah nganfâk pêk ding duh hen âwkrâwl hen a phiar chun,

¹⁷an panih hen sawnhnâk mun pakhat ah an va kal lai le, bâwlpu tla leh lâirêltu tla chunah um mi nih lâi an rêl ding asi.

¹⁸Lâirêltu nih zeizawng thunawk chu a deihfiang ding asi; chu minung nih a hâwi Israel mi tlûnah âwkrâwl hen phiarnâk a siam mi asi chun,

¹⁹mi a phiar mi rêp tawng ding mi chu a phiartupa nih rêp a tawng rûl lai. Chu hâwi hen nan lakah sual chu nan veih ding asi.

²⁰Chun, mikip nih thil a hawng um mi tla chu an theih lai le, an ṭih lai le, chu hâwi thilsual chu âukhawm nih an ti lai lo rawh.

²¹Chubang hâwi thu lakah chun khuaruat lah u; rêpnâk chu nungnâk ruangrûl ah nungnâk, mit ruangrûl ah mit, hâ ruangrûl ah hâ, kut ruangrûl ah kut, kezaphah ruangrûl ah kezaphah asi lai.