Read Bawm Chin DEUTERONOMY 20 Bible Online

DEUTERONOMY 20 - Bawm Chin bible

DEUTERONOMY 20

¹“Nan mêlma do ding hen nan kal tikah kâri tla, rang tla leh kawrsen tla, nanmah lei mi ngâk hen an tam ruang ko ah ṭih lah na u. LALPA nan Pathian Aigupta ram ah mi ruang a nan suah natu chu nan sinah a um awt asi.

²Râl do nanna dawmh lântê ah bâwlpu chu nan mâilei ah a hawng lai le, kawrsen tla sinah,

³‘Israel mi tla, ngâi u! Tusûn ni ah hin râl nan tuk awt asi. Nan mêlma tla chu ṭih lah na ule, zer hen nan thin dâwk lah u.

⁴LALPA nan Pathian chu nan sinah a hawng a tel lai le, nehtu ah a nan siam na lai, a ti ding asi.

⁵“Churawhchun hotu tla nih mi tla chu an kawh na lai le, ‘Hinah hin mi in sak hen ap lo rih mi nan um ma? A um asi chun in leiah tlung seh. Asi lo chun râltuknâk ah a thi beibâng chun a in chu midang nih an ap lai.

⁶Chun, grep dûm siam hen a rah kawih lo rih mi nan um ma? A um chun in leiah tlung seh. Asi lo chun râltuknâk ah a thi beibâng chun, midang tla nih uain chu lâwptlonâk ah an mang salam lai.

⁷Nupi deih hen umpi lo rih mi nan um ma? A um asi chun in leiah tlung seh. Asi lo chun râltuknâk ah a thi beibâng chun chu nunau a deih mi chu midang nih an umpi lebang lai, a ti ding asi.

⁸“Hotu tla nih chun mi tla sinah, A zer hen a ṭih mi nan um ma? A um chun in leiah tlung seh. Midang thinlung a râwk lai, ti na seh.

⁹Hotu tla nih kawrsen tla sinah thusim an lîm rawh chun murui kip rangah ruitu thîm ding asi.

¹⁰“Khuapi nan rûn awt chun, a masa hen hawng a pêk ding hen mi tla chu nan simh na ding asi.

¹¹Kulh kawtkâ an awng hen an hawng a pêk chun, nan sal leh nan rangah rianṭuantu an si lai.

¹²Sikhawmsele chu khua mi minung tla an hawng a pêk duhlo hen do ding an duh dauh chun, nan kawrsen tla hen kulh na u.

¹³Churawhchun LALPA nan Pathian nih chu khua chu an lâktir na tikah a sungah minung tla chu thah na u.

¹⁴Nunau tla, fa tla, an ran vulh tla leh thil dang zawzawng an khua lakah um mi tla mah rangah nan lâk kho lai. Nan mêlma thil-le-rî zeizawng chu nan mang kho lai. LALPA nih a nan pêk na mi asi.

¹⁵Chubang chu nan umnâk ram thawk hen lât tak a mi khuapi tla nan do ding dân chu asi.

¹⁶“LALPA nan Pathian nih a nan pêk na mi ram ah khuapi tla nan lâk tikah thah ver na u.

¹⁷Hit mi tla, Amor mi tla, Kanaan mi tla, Periz mi tla, Hiv mi tla, Jebus mi tla chu LALPA nih thu a nan pêk na mi hâwi hen thah hep na u.

¹⁸An pathian tla sawnhnâk thil fihnungkâi an ti mi an sîntir na hen LALPA lakah nan sual lonâk ding hen thah hep na u.

¹⁹“Khuapi lâk ding nan awt chun nan hual mi sâwt ual khawm ule, thing thei tla hâu lah u. A rah chu ei ule, a kûng chu hâu lah u; thing tla chu nan mêlma an si lêm lo.

²⁰Thing dang lam chu khuapi nan lâk lân lo chu nan hâu hen khua hualnâk thil herh ah nan mang kho.