Read Bawm Chin DEUTERONOMY 24 Bible Online

DEUTERONOMY 24 - Bawm Chin bible

DEUTERONOMY 24

¹“Mi nih nunau a umpi hen a nehnûn ah a um dân a muh hen a duh lo chun, mâknâk lasui a rîn hen a pêk lai le, a in sungkhur ah mi chu a kaltir lai rawh.

²Chu nunau nih midang mipa a umpi hen, chu mipa nih chu nunau chu a duh lo ber fâwn chun,

³anih khawm nih mâknâk lasui a rîn lai le, nunau sinah a pêk lai le, a in ah mi chu a kaltir lai. Asi lo leh, a pasal panihnâk chu a thi ving kho.

⁴Zeitin tal khawm hen a pasal masa nih a umpi nawlh ding asi lo rawh; chu nunau chu a nâwm rawh mi hâwi hen a ruat ding asi. A umpi nawlh êu mi asi chun LALPA lakah a sual mi asi lai. LALPA nan Pathian nih a nan pêk na mi ram ah chubang hâwi sual ṭihnungkâi chu nan ti ding asi lo.

⁵“Mi, nupi a nei ka hen kawrsen rianṭuan mawh zatlâng rianṭuan ah rêlsih ding asi lo; kum khat chu rianṭuan awlh ding asi, in ah a nupi hen lâwm tak an um kho ding hen.

⁶“Midang rangah thil zeimawh na pûktir chun, fângrialnâk lung sungkam ah lâk piak lah. Chu thil chu dâwngsung rangah nungnâk buh timhtuahnâk lâk piak ving mi hâwi asi.

⁷“Âuzawng mah Israel phun lakah mi a fîr hen sal ah a siam hen mawh sal ah zuartu chu thah ngelchel ding asi. Hi hâwi hen chubang thilsual tla chu nan veih ding asi.

⁸“Vun râi nan nei chun, Levi bâwlpu nih an sim ziatê hen ti ding mi kha theih ule; sîntirnâk ka pêk na mi kha zûl u.

⁹LALPA nan Pathian nih Aigupta ram thawk hen nan hawng liauah Miriam tlûnah a ti mi kha theihkumza u.

¹⁰“Mi rangah thil zeimawh na pûktir chun, sungkam ah a nan pêk ding mi nipuan lâk ding hen a in ah kal lah;

¹¹lênglei ah ngâk le, amah nih an pêk seh.

¹²Mipâm tak asi chun zân khat khawm siah lah;

¹³a zânlei siar va pêk nawlh, churawhchun ṭha tak a it khonâk ding hen. Â lâwm lai le, LALPA na Pathian khawm na tlûnah â lâwm lai.

¹⁴“Mi ngâkṭah leh mipâm to-aw ah na siah mi perpet lah, Israel mawh, nan khua ah ramdang minung a hawng um mi mawh khawm si seh.

¹⁵Nisiar hen nî tlâk lânah a lawh mi nikhat vo na pêk ngelchel ding asi; tangka a herh hen tawng ding sek hen â siar ko ruangah. Na pêk lo asi chun, nangmah min sim hen LALPA a auh lai le, sual hen ngaih na si lai.

¹⁶“An fa tla thilsual ti ruangah nu leh pa an thah na ding asi lo, an nu leh pa thilsual ti ruangah fa le tla thah ding asi lo; mi amah sual ruangah amah a thi ding asi.

¹⁷“An diknâk ah chun mi ngâkṭah khawm ramdang mi khawm dawktir lah u; lei â bat mi ruangah numei nipuan lâk piak lah.

¹⁸Aigupta ram ah sal ah nan um mi LALPA nan Pathian nih an suah na mi kha theihkumza u; churuang tak chun hi thupêk hi kan pêk na mi asi.

¹⁹“Fâng nan ât chun, nan fatêl nan relh mi lâk ding hen kîr nawlh lah u; ramdang mi, mi ngâkṭah leh numei tla rangah siah u, chu tikah LALPA nan Pathian nih nan thilti zeizawng ah mal an sâwm na lai.

²⁰Nan oliv veikhat nan kawih rawh chun, nan relh mi kawih nawlh ding hen kîr nawlh lah u; ramdang mi, mi ngâkṭah leh numei tla rangah um seh.

²¹Nan grep tla veikhat nan kawih rawh mi chu va kal nawlh hen kawih nawlh lah u; chubang chu ramdang mi leh mi ngâkṭah leh numei tla rangah um seh.

²²Aigupta ram ah sal nan si mi kha philh lah u; churuangah asi hi bang thupêk tla kan pêk na mi hi.