Read Bawm Chin DEUTERONOMY 25 Bible Online

DEUTERONOMY 25 - Bawm Chin bible

DEUTERONOMY 25

¹“Israel mi panih an thunawk sim ding hen lâirêlnâk mun ah va kal sele, pakhat chu sual lo hen, pakhat chu sual hen ngaih hawng si sele.

²A sual dauh mi pa chu lâirêltu nih rêp hen a vuak awt chun, bawkbukhup hen ittir sele vuak seh. A vuak ding zat chu a thilsual ti zia vima hen asi lai.

³A tam chem ah vei sâwmli vuak ding, chu lei chun vuak ding asi lo; a tam tuk chun nâuneh hen a kal lai.

⁴“Chawchal rangah fâng na chîltir liauah a mûr phuar lah.

⁵“Unau panih nih thil a bâwm na sele, pakhat dauh chu thi sele, fapa neilo sele, a nupi nih a pasal unau silo mi, midang âumawh a umpi ding asi lo; a dam mi pa nih a unaupa a thi mi nupi chu a umpi ding asi.

⁶Fapa an nei masachem mi chu a thi mi pa fapa ah ngaih ding asi, a dâwngsungkhur a chi-le-kuang chu Israel lakah a um vima khonâk ding hen.

⁷Sikhawmsele, a thi mi unaupa nih a umpi duhlo asi chun, khua lakah ruitu tla sinah a va kal lai le, ‘Ka pasal unaupa nih a thilti ding a ti duh lo; a unaupa rangah Israel lakah thlâk siam piak ding a êl, a va ti ding asi.

⁸Churawhchun khua mi lâirêltu tla nih an kawh lai le, thu an simh lai. Chu nûn khawmah umpi ding a êl nget asi chun,

⁹a unaupa nupi chu khua mi ruitu mâika ah a sinah a va kal lai le, a pheikawk pakhat a lît piak lai le, a mêl ah chil a sah lai le, ‘Hi minung hi a unaupa rangah chi thlah ding duhlotu asi, a ti lai.

¹⁰A dâwngsungkhur chu Israel lakah ‘A pheikawk an lît piak mi pa dâwngsung’ ti asi lai.

¹¹“Minung panih a sual na sele, pakhat pa nupi nih a pasal sanh hen a sualpi mi pa siaṭha dawh sele,

¹²khuaruat lah ule; a kut tan piak u.

¹³“Perpet hen khîng khingh hen tah lah.

¹⁵Tahnâk dik leh khinghnâk dik mang rawh, chu tikah LALPA nan Pathian nih a nan pêk na mi ram ah kum sâwt tak nan um lai.

¹⁶LALPA nih mi perpê tla chu a hua asi.

¹⁷“Aigupta ram thawk hen nan hawng liauah Amalek mi tla nih an ti na dân kha theihkumza u.

¹⁸Pathian ṭihnâk neilo thlo hen, nan dît hen nan uai liauah dunglei thawk hen an do na le, dunglei mi murui tla an thah hep na mi kha.

¹⁹Churuangah chun LALPA nan Pathian nih a nan pêk na mi ram ah, nan kiangkam ah nan mêlma tla lakah him ziar hen an umtir na tikah Amalek tla thah hep ding mi kha theih set u, pakhat khawm theih na lo rawh ding hen. Philh rîlmâl lah u.