Read Bawm Chin DEUTERONOMY 28 Bible Online

DEUTERONOMY 28 - Bawm Chin bible

DEUTERONOMY 28

¹“LALPA nan Pathian thu ngâi hen zumhkâi tak hen a thupêk zawzawng tusûn ni ah kan pêk na mi hi nan ti thlir chun, tual tlûnah phun dang tla ngâk hen rokual dauh hen a nan siam na lai.

²LALPA nan Pathian thu ngâi ule, hi bang malsâwmnâk tla hi nan tâ asi lai.

³“Nan phâisen leh nan khua tla LALPA nih mal a sâwm lai.

⁴“LALPA nih fa tamtak, mîm-le-fâng, ranrual leh dawrâ tla tamtak hen mal an sâwm na lai.

⁵“LALPA nih nan fâng tla leh tî-le-râwl nan timhtuah mi mal an sâwm piak na lai.

⁶“Nan thilti zeizawng ah LALPA nih mal an sâwm na lai.

⁷“Nan mêlma tla nih an do na tikah LALPA nih an neh piak na lai. Kâng khat lei hen an do na chun, a dang chereh hen an tek lai.

⁸“LALPA nan Pathian nih nan rianṭuan mal a sâwm lai le, nan fângbâwk tla fâng hen a khattir lai. A nan pêk na mi ram ah mal a nan sâwm na lai.

⁹“LALPA nan Pathian aw-ân nan ngâi hen thupêk zeizawng nan ti chun, thu a tiam rawh hâwi hen amah mi tak ah a nan siam na lai.

¹⁰Churawhchun tual tlûnah minung zawzawng tla nih LALPA nih amah mi tak si ding hen a nan thîm na mi nan si ti an muh lai le, an ṭih na lai rawh.

¹¹LALPA nih a nan thlâk natu tla sinah pêk ding hen a tiamh mi ram ah fa tla, ranrual tla, neihnâk tamtak an pêk na lai.

¹²Vân ah a neih-le-siah kilnâk thawk hen ruah a tik takah a hawng sûrtir lai le, nan rianṭuan zawzawng mal a nan sâwm na lai, churawhchun phun tamtak tla rangah nan pûktir na lai le, sikhawmsele nannih tla lam chu âu sin khawmah nan pûk lai lo.

¹³LALPA nan Pathian nih phun tamtak lakah ruitu ah a nan siam na lai le, anmah rui mi lam chu nan si lai lo; tusûn ni ah ka nan pêk na mi a thupêk zawzawng tla hi zumhkâi tak hen nan zûl asi chun tluang tak hen nan um kumza lai le, tlawlhnâk zeikhawm nan nei lai lo.

¹⁴Sikhawmsele, zei lak khawmah ê-aw ngâilo hen nan um ding asi lo, pathian dang tla sawnh hen a rian nan ṭuan ding asi lo.

¹⁵“Sikhawmsele, LALPA nan Pathian thupêk leh a dân tla tusûn ni ah ka nan pêk na mi zawzawng zumhkâi tak hen nan zûl lo asi chun hi bang thil ṭhalo tatak tla nan sinah a hawng tlung lai.

¹⁶“LALPA nih nan khua leh nan phâisen tla siat a barh lai.

¹⁷“Nan fâng tla leh tî-le-râwl nan timhtuah mi tla LALPA nih siat a barh lai.

¹⁸“LALPA nih siat a nan barh na lai le, fa tâwmtê, fâng tla tâwmtê, ranrual leh dawrâ tla tâwmtê cho an pêk na lai.

¹⁹“Nan thilti zeizawng LALPA nih siat a barh lai.

²⁰“Thilsual nan ti hen LALPA chu nan duh lo asi chun nan tlûnah vânduainâk, nawknâk, lawksawngnâk nan thilti zeizawng ah nan vei dep tiang hen a hawng tlungtir lai.

²¹Tuah luah ding hen nan tum mi ram ah râi dang dang a hawng tlungtir lai le, pakhattê khawm zuah nan si lai lo.

²²Râi a kâi kho mi, phingnâk leh damlonâk hen LALPA nih a nan vuak na lai le; nikhuakhêu leh thlilûm nan thlâi râwk ding hen a hawng fial lai. Nan thih lânlo hi bang siatnâk hi nan sinah a um lai.

²³Ruah rerêng a sûr lai lo le, nan tual chu thîr hâwi hen a chang lai.

²⁴Ruah sûr ding ngangâk hen nan vei hep lânlo chu LALPA nih phildip leh risep khû a hawng fial lai.

²⁵“LALPA nih nan mêlma tla nanmah nehtu ah a siam na lai. Kâng khat lei hen nan do na chun, a dang chereh hen nan tek lai, tual tlûn minung zawzawng nih nan lakah thil tlung mi an muh lai le, an lâu lai.

²⁶Nan thi tikah ram sa leh vâ nih nan ruak an ei lai le, âukhawm a dâwitu an um lai lo.

²⁷LALPA nih Aigupta mi tla tlûnah a ti hâwi hen khuailumâ an veitir na lai. Nan taksa lakah mapî a suahtir lai. Râithak nih an tuam pang na lai le, thungâi a thak lai, sikhawmsele damhtu ding âukhawm an um lai lo.

²⁸LALPA nih nan thinlung a mawlhtir thlo lai; mitchâwtnâk leh nawknâk hen a nan vuak na lai.

²⁹Mitchâw hâwi hen sûn nî chêu ah khawm nanna dap lemang lai le, kalnâk lampi rerêng nan muh kho lai lo. Nan thilti zeikhawm a tluang lai lo. Nauneh leh fîr piak kumza hen nan um lai le, an ṭangpi natu âukhawm an um lai lo.

³⁰“Nupi na deih lai le, sikhawmsele midang nih an umpi lai. In na sak lai le, khawmsele na luah lai lo. Grep na phun lai le, sikhawmsele a rah na ei lai lo.

³¹Nan mitmuh ah nan ranrual tla an thah lai le, sikhawmsele a sâ lam chu nan ei lai lo. Nan sanatung tla chu nan zauh ko bû hen an ruai ving lai le, an hawng khirh nawlh rerêng lai lo. Nan dawrâ tla chu nan mêlma tla rangah pêk asi lai le, nannih ṭangpitu ding âukhawm an um lai loh.

³²Nan zauh ko bû hen nan fanu leh fapa tla ramdang ah sal ah an put na lai. Nisiar hen nan fa tla kîr ding lungum hen nan zauh mi chu a thawttham ko lai rawh.

³³Hamh tak hen thlâi nan chîng mi tla chu ramdang mi phun nih an lâk hep lai, chu tikah nannih chu nehsawh leh nauneh cho lo chu zeikhawm nan tawng lai lo.

³⁴Nan tuar fâk tuknâk nih nan thinlung a mawlhtir rê lai.

³⁵LALPA nih nan kê chu dam kholo mi mâ fâk tak hen a tuam tir zat lai le, nan lû thawk hen nan kepâr tiang khuailumâ nih an tuampang na lai.

³⁶“LALPA nih nanmah leh nan lalchem tla hen an thlâk natu um dah lonâk ramdang ah a nan kalpi ving na lai; chunah chun lung leh thing hen siam mi pathian tla rian nan va ṭuan lai.

³⁷LALPA nih a nan rektir phin na ding mi ram ah mi minung tla nih nan lakah thil a hawng tlung mi ruangah an lâu rê lai le; an nihsanh na hen an zauhnawmh na lai.

³⁸“Chî tamtak nan tuh lai le, tâwmtê ko nan zûn lai, khâubawk tla nih nan thlâi chîng an ei awt ruangah.

³⁹Grep dûm nan siam lai le, nan kurî lai, sikhawmsele a rah nan ei lai lo, a hâng khawm nan din lai lo, tholung nih a zûn a ei awt ruangah.

⁴⁰Oliv thing tla chu nan ram mun kipah nan phun lai le, sikhawmsele a sariak chu nan nei lêm lai lo, oliv tla chu a tlawng ver awt ruangah.

⁴¹Fanu leh fapa nan nei lai le, khawmsele nan thlâu hep na lai, râltuknâk ah deih hen an kalpi hep na awt ruangah.

⁴²Nan thing leh nan thlâi tla khâubawk nih a veih hep lai.

⁴³“Ramdang minung nan ram ah um mi tla chu nannih nan vei dadauh liauah annih chu anna dingchang dadauh lai.

⁴⁴An pûk tir na ding hen annih chu tangka an nei lai le, anmah pûk tir na ding hen nannih lam chu nan nei lai lo. A dawnghnâk ah chun nan tlûnah lâirêltu an si lai.

⁴⁵“Chubang siatnâk zawzawng chu nan tlûnah a hawng tlung lai le, LALPA nan Pathian nih dân an pêk na mi zawzawng zûl lo hen a lakah ê-aw nan ngâilo ruangah nan vei dep lân lo chu nan sinah siatnâk chu a um kumza lai.

⁴⁶Nan thlâk leh nanmah tlûnah Pathian lâirêlnâk a hawng tlung kumza ding mi asi lai.

⁴⁷LALPA nih thil zeizawng ah mal an sâwm na le, sikhawmsele nannih lam nih chun thinlung lâwm bû leh lâwptlo bû hen a rian nan ṭuan lai lo.

⁴⁸Churuangah LALPA nih nan lakah mêlma a hawng fial ding mi tla rian nan ṭuan lai. Sungvâng leh tîhâl hen nan um lai le, ni leh puan neilo hen zeizawng ah samphâng hen nan um lai. Nan vei dep lânlo chu LALPA nih fâk tak hen an nehsawh na awt.

⁴⁹Tual dawngnâk ah mi phun an hawlh khawm nan theihlo mi LALPA nih nanmah do ding hen a hawng fial awt. Mupî â thlûr mi hâwi hen a nan nam na lai.

⁵⁰Upa, ngâksia âu lak khawmah khuaruatnâk leh siherhnâk neilo mi an si lai.

⁵¹Nan ranrual leh nan fâng tla an ei lai le, nannih chu buh ngei hen nan thi lai. Fâng tla, uain tla, oliv sariak tla, ranrual leh dawrâ tla zeikhawm an mâk na lai lo le; chun nan thi lai rawh.

⁵²LALPA nan Pathian nih a nan pêk na mi ram lakah khua kip an do lai le, nan zumh chem mi khua kulh sâng tak tla a chim lai.

⁵³“Nan khua tla nan mêlma nih a hawng kulh tikah nan sung a vâng tuktarâi lai le, LALPA nan Pathian nih an pêk na mi fa tla tiang nan ei na lai.

⁵⁴Mi ṭha leh mi rokual tla hawng suak mi tla khawm nih ei ding buh an neilo rawh ruangah an hawng kulh na liau chun an sung a vâng tuk ah an fa le tla an ei lai. A unaupa mawh, a nupi a dâwt tak mi mawh a fa a um lem mi tla sin khawmah zeitê khawm a pêk lai lo.

⁵⁵

⁵⁶Nunau ṭha mi rokual lakah suak mi, a neihsiah ruangah lêng suak dah lo mi khawm chu hâwi hep an si lai. An khua tla mêlma nih an kulh tikah chun a sungvâng tuktarâi ah a fa a ring ka mi leh alam khawm a thuptê hen a ei lai. A pasal a dâwt tak mi leh a fa tla rang khawmah a ṭhenh na lai lo.

⁵⁷

⁵⁸“Pathian sîntirnâk lasuibu lakah a rîn mi zawzawng zumhkâi tak hen nan zûl lo hen leh LALPA nan Pathian min zahkâi leh chê tak nan zah lo chun,

⁵⁹râi dam kholo leh kaih kho mi ṭihnungkâi, reh kholo mi nanmah leh nan thlâk tla tlûnah a hawng fial lai.

⁶⁰Aigupta ram ah nan theih rawh mi ṭihnungkâi tak tla kha nan tlûnah a hawng tlungtir nawlh lai le, zeiliau khawm a dam lai lo.

⁶¹Râi zât kip leh râi kaih kho mi hi Pathian dân leh sîntirnâk bu ah sim lo mi tla a hawng fial lai le, nan vei dep lai.

⁶²Vân ah ârfi zat hen tam khawm ule, a leifuan chu tâwmtê cho nan si lai, LALPA nan Pathian thu nan ngâi lo ruangah.

⁶³LALPA nih nan sul-le-lam a tluang tir hen zantir na ding a duh mi hâwitê hen nan lakah an veih na ding leh siatnâk nan tlûnah tlungtir ding a duh rûl rawh. Nan umnâk ram ah mi an ṭhial ving na lai.

⁶⁴“LALPA nih phun zawzawng nâwng ah tual dawnghnâk khatlei thawk hen khatlei kâng a dawnghnâk tiang an rekrâwi tir na lai le, chunah chun lung leh thing hen siam mi pathian, a nan thlâk natu leh nanmah khawm nih a lânah nan sawnh dahlo mi rian nan ṭuan lai.

⁶⁵Thlangamnâk mun rerêng nan tawng lai lo le, nan tâ ding mun rerêng a um lai lo; LALPA nih hamhnâk leh lawksawngnâk, lung dawngnâk leh kawng dawngnâk a tlungtir lai.

⁶⁶Zeiliau zawngah ningṭih kumza hen nan um lai. A sûn a zân hen ningṭih leh thih ṭih hen nan um lai.

⁶⁷Nan thil muh mi zawng nih nan thinlung a lâutir lai. Zînglei kipah zânleibâi si ding nan mawhlah lai, zânleibâi kipah zînglei si ding mi nan mawhlah lai.

⁶⁸LALPA nih chu leiah nan kîr nawlh rêng lai lo rawh a ti menza khawmsele Aigupta ram ah meilawng hen an kîrtir nawlh ving na lai. Chunah chun sal si ding hen nan mêlma sinah va a zuar ding nan tum lai le, sikhawmsele, âukhawm nih châwk ding hen an duh na lai lo,” a ti.