Read Bawm Chin DEUTERONOMY 3 Bible Online

DEUTERONOMY 3 - Bawm Chin bible

DEUTERONOMY 3

¹“Churawhchun, marlei kângah mi Basan ram ah kanna ṭhial le, Edrei khua kiangah hawng kan do ding hen Og lalchem chu a mi tla zawzawng hen an hawng suak.

²Sikhawmsele LALPA nih ka sinah, Anih chu ṭih rîlmâl lah, a ram leh a minung zawzawng chu nangmah ka nan pêk awt. Hesbon lâirêltu Amor lalchem Sihon lakah na ti hâwi hen a lakah ti rawh,’ a ka ti.

³“Churawhchun LALPA nih Og lalchem leh a mi tla khawm kanmah thu thu hen a siah rawh, kan thah hep na.

⁴Chu liauah a khuapi zawzawng kan lâk hep le, kan lâk lo mi pakhat khawm a um lo. Basan lalchem, Og nih lai a rêlnâk ram Argob ram zawzawng ah mi khuapi sâwmruk kan lâk hep.

⁵Chubang khuapi zawzawng tla chu sâng tak hen kulhnei tla, kulh kawtkâ tla ah a renhnâk um mi tla leh kulh neilo khua tetê tla tamtak an si.

⁶Khuapi zawzawng tla kan râwk le, mipa tla, nunau tla leh ngâksia tla kan thah hep na, Hesbon ah mi Sihon lalchem khuapi tla kan ti hâwitê hen kan ti.

⁷Khua tla kan râwk le, ran tla kan lâk.

⁸“Chu liauah Amor lalchem panih thawk hen Jordan Va saklei lakah ram kan lâk mi chu, Arnon Tiva thawk hen Hermon Tlâng tiang asi.

⁹(Hermon tlâng hi Sidon mi tla nih chun Sirion an ti le, Amor mi tla nih Senir an ti.)

¹⁰Basan ram ah mi Og lalchem ram zawzawng chu kan lâk hep: phai ram mi khuapi tla, Gilead leh Basan ram tla, saklei ah Salekah leh Edrei khuapi tiang hen,” a ti.

¹¹(Og lalchem chu Rephaim lal madungchem asi. A ruak siahnâk kuang chu lung hen siam mi asi; tahnâk dân hâwi hen feet leili hen a sâu le, feet ruk hen a lian. Amon khuapi Rabah ah muh kho asi rih.)

¹²“Ram tingvo kan siam liauah Reuben phun leh Gad phun chu Amon Tiva kiangah mi Aroer khuapi marlei kâng ram leh Gilead tlâng leh a khuapi tla ka pêk na asi.

¹³Manaseh phun khingkhuai rangah chun Gilead ram a leifuan leh Basan ram zawzawng, Og lalchem nih lai a rêlnâk Argob ram zawzawng khawm ka pêk na asi,” a ti. (Basan chu Rephaim ram ti asi.

¹⁴Jair, Manaseh phun a mi nih Argob ram pumpi, chu chu Basan asi, Gesur leh Maakah ram tiang hen a lâk. Amah min put hen min a phuah le, Jair khua tla ti hen theih an si nget rih.)

¹⁵“Gilead ram chu Makir thlâk Manaseh phun a mi rangah ka pêk.

¹⁶Reuben phun leh Gad phun rangah chun Gilead thawk hen Arnon Tiva tiang ka pêk. Tiva dung khingkhuai chu simlei kângah an ramri asi le, marlei kâng ramri lam chu Jabok Tiva asi, a khingkhuai chu Amon ramri lei asi.

¹⁷Thlanglei kângah chun Jordan Va tiang asi le, marlei kângah Galili rilî thawk hen simlei kângah mi Tipi Thi ah a kal le, saklei kângah Pisgah Tlâng bul tiang a asi.

¹⁸“Chu liau chun hi bang sîntirnâk tla hi ka pêk na: ‘LALPA kan Pathian nih Jordan Va saklei ram hi nan luah ding hen an pêk na asi. Tuah nan minung râltuktu tla chu râlthuam pêk na ule, Israel phun dang tla mâilei ah Jordan Va kanh ding hen fial na u, an ram luah ding hen ṭangpitu dingah.

¹⁹Nan nupi tla, nan fa tla, ranrual tla ran tamtak nan nei ti ka theih mi tla cho nan dunglei ah khuapi ka nan pêk na mi tla lakah um na seh.

²⁰Nan hâwi Israel tla chu Jordan Va thlanglei kâng ram LALPA nih a pêk na mi an luah tiang hen leh hi ram ah nan rangah LALPA nih a ti mi hawi hen thlangam tak hen an um tiang hen ṭangpi na u. Chu nûnah ram nan rangah ka nan pêk na mi ah hin nan hawng kîr kho lai,’ a ti.

²¹“Churawhchun Josua rangah ka simh le: Lalchem panih Sihon leh Og tlûnah LALPA nan Pathian nih a ti dân zawzawng kha na muh asi; na va rûn mi ram kipah chu hâwi vima hen a ti lai.

²²Annih tla chu ṭih na rîlmâl lah, LALPA na Pathian nih a nan do piak awt asi, a ti.

²³“Chu liau chun sunhsak tak hen thla ka cham le,

²⁴‘Rokual chem mi LALPA, na rokualnâk leh na thilchê ti ding mi dawmhnâk cho na ka muhtir ti ka theih. Thil rokual na ti mi hi tual leh vân ah tikhotu zei pathian khawm a um lo!

²⁵LALPA Jordan Va hawng kan kanhtir rawh, ram ningno varâl lei mi tlâng ram dawh tak leh Lebanon Tlâng tla hawng kan muhtir,’ ka ti.

²⁶“Sikhawmsele nanmah zapi tla ruangah LALPA ka tlûnah a thinrun le, ka thu a ngâi awt lo rawh. Ngâi ding ngâk hen, ‘A tâwk asi! Hi thu hi sim nawlh lemang lah!

²⁷Pisgah Tlâng sîpah va kâi le, simlei, marlei, saklei leh thlanglei zauh. Chiamcheriam tê hen zauh, Jordan Va kanh ding na silo ruangah.

²⁸Josua chu sîntirnâk pêk rawh. A thiltum lakah fawrh le, na muh mi ram luah ding hen zapi tla chu rui hen a ṭangpi na awt ruangah,’ a ka ti.

²⁹“Churawhchun Bethpeor khua zâwn tivakuam ah kan um ko rawh,” a ti.