Read Bawm Chin DEUTERONOMY 31 Bible Online

DEUTERONOMY 31 - Bawm Chin bible

DEUTERONOMY 31

¹Mosi nih Israel mi tla sinah thu a sim vima le,

²“Tu chun kum zâ leh kul ka si rawh le, an rui natu ding ka si kholo rawh. Chulo khawmah LALPA nih Jordan Va na kanh lai lo ti hen hawng ka simh.

³LALPA nan Pathian amah ngelchel chu nan mâilei ah a kal lai le, chunah phun a um mi tla chu an veih piak na lai, an ram nan luah khonâk ding hen; LALPA nih a sim rawh hâwi hen Josua chu an rui natu asi lai.

⁴LALPA nih Amor lalchem Sihon leh Og a neh na le, an ram a râwk dep na mi hâwi hen chubang minung tla chu a veih dep na lai.

⁵LALPA nih anmah nehtu ah an siam na lai le, ka nan simh na ziatê hen nan ti na lai.

⁶Zumh thlir le, tum thlir. Annih tla chu ṭih na lah u. Nan Pathian, LALPA amah tak chu nan sinah a um lai. A nan thlahthlamh hen a nan kaltâk na lai lo,” a ti.

⁷Churawhchun Mosi nih Josua chu a kawh le, Israel mi zawzawng mâika ah a sinah thu a simh, “Zumh thlir le, tum thlir; nang hi an thlâktu tla sinah LALPA nih a tiamh mi ram va luah ding hen hi minung tla rangah ruitu ding mi chu na si.

⁸LALPA amah tak chu na sinah um hen an rui lai. An thlawrhthlâu hen an kaltâk lai loh, churuangah na thinlung dâwk lo hen ṭih khawm ṭih lah,” a ti.

⁹Mosi nih Pathian dân chu a rîn le, Levi bâwlpu tla LALPA Thudântuk Bâwm kilkâwitu leh Israel ruitu tla sinah a pêk na.

¹⁰Thu a pêk na, “A kum sarihnâk dawngh kipah lei bat mi tla râwk kum ah, Basâ Kût ah hâu fâk tak hen hi hi rêl rawh.

¹¹Sawnhnâk ding mun pakhat ah Israel mi tla nih LALPA an Pathian sawnh ding hen an hawng tikah rêl piak na rawh.

¹²Mipa, nunau, ngâksia zawzawng leh nan khua ah ramdang minung um mi tla kawh ver na ule, LALPA nan Pathian thu theih leh zah ding hen a sîntirnâk tla chu mikip nih zumhkâi tak hen an zûl khonâk ding hen.

¹³Hi hâwi nan thlâk tla LALPA nan Pathian dân theih dahlo mi tla nih an theih kho lai. Chu hâwi hen Jordan Va kanh hen nan va luah ding mi ram ah nan um kar zawzawng chu LALPA thu zûl ding dân an theih lai,” a ti.

¹⁴Churawhchun LALPA nih Mosi sinah, “Tam na dam lai lo rawh. Josua kawh le, Puanin ah hawngpi, chu tikah sîntirnâk ka pêk kho ding hen,” a ti. Mosi leh Josua chu Puanin ah an va kal le,

¹⁵LALPA chu chunah chun sûm dîr hâwi hen Puanin kawtkâ kiangah dîr hen an sinah â langh rawh.

¹⁶LALPA nih Mosi sinah, “Na thihnâk a nâi rawh, na thih nûnah mi le tla chu zumhkâi lo tak hen ka lakah an um lai le, an sinah thudân ka tuk mi tla khawm an buar lai. An ka kaltâk lai le, an va lûtnâk ding mi ram ah lunglotu pathian tla an sawnh lai.

¹⁷Chu hâwi a hawng si tik chun an lakah ka thin a thawk lai le; ka kaltâk na lai le, an vei lai rawh. An lakah siatnâk ṭihnungkâi tak a hawng tlung lai le, chu tikah hi bang thil tla chu an tlûnah a hawng tlung tik chun, kei, an Pathian an sinah ka um lo rawh ruangah asi ti an theih lai rawh.

¹⁸Chu tikah kei nih ka ṭangpi duh na awt lo rawh, thilsual ti hen pathian dang an ka sawnh tâk rawh ruangah.

¹⁹“Tuah hi la hi rîn rawh. Israel mi tla rangah sîntir na le, an sinah thil a hawng um ding mi theihfiangnâk ruangrûl ah.

²⁰An thlâktu tla sinah thu ka tiamh rawh mi hâwi hen hi ram ṭha leh neihnâk ram ah ka kalpi na lai. Chunah chun ei ding an duh mi zawzawng an tawng lai le, lungngam tak hen an um lai. Sikhawmsele, mahlo leiah an pial lai le, pathian dang tla an sawnh lai. An ka nawng lai le, ka thudântuk tla an buar lai,

²¹siatnâk ṭihnungkâi tamtak an lakah a hawng tlung lai. Sikhawmsele hi la hi sak kumza ding asi lai, an lakah thil a hawng um ding mi theihfiangnâk ruangrûl ah asi lai. Tu khawmah thu ka tiamh na mi ram ah ka kalpi na lân khawmah an thinlung ruat ka theih ko,” a ti.

²²Chu ni lîlâ ah Mosi nih chu la chu a rîn le, Israel mi tla chu a sîntir na rawh.

²³LALPA nih Josua Nun fapa chu a sawnh le, a sinah, “Zumh thlir le, tum thlir. Israel mi tla, hi ka tiamh mi ram ah na kaipi na lai le, na sinah ka um lai,” a ti.

²⁴Mosi nih lasuibu ah LALPA dân tla a rîn le, zeikhawm thlâu lo hen a kil ziar.

²⁵A ti thluh rawh chun Levi bâwlpu tla, LALPA Thudântuk Bâwm zauhkhenhtu tla sinah,

²⁶“Hi LALPA dân bu hi lâk ule, LALPA nan Pathian Thudântuk Bâwm sungah siah u, Israel mi le tla lakah a lungsilo zia theihpitu dingah chun a um ding asi.

²⁷An lungkhung zia leh hel an mang zia ka theih. Ka dam liau khawmah LALPA tlûnah an hel le, ka thih nûn châng chun thungâi an zual lai.

²⁸Ka mâika ah hin phun lakah ruitu leh rianṭuantu tla hawng pumh ver na, chu tikah hi bang thil tla ka simh kho na lai le; an tlûnah lung silonâk thu ah theihpitu ding hen tual leh vân ka kawh lai.

²⁹Ka thih nûnah hi minung tla hi an sual ding mi leh ka sîntir na mi tla an duh awt lo mi khawm ka theih ko. Tik a hawng tlung ding mi lakah siatnâk an tawng lai, a khap mi thil ti hen LALPA chu a thin an thawktir awt ruangah,” a ti.

³⁰Churawhchun Mosi nih la zawzawng chu Israel mi tla ngâi ding hen a sim piak na rawh.