Read Bawm Chin DEUTERONOMY 32 Bible Online

DEUTERONOMY 32 - Bawm Chin bible

DEUTERONOMY 32

¹“Tual leh vân, ka thu tla hi theih ule, nâi tek hen ngâi u.

²Ka sîntirnâk tla chu ruah hâwi hen a sûr lai le, dâmtî hâwi hen tual tlûnah a um lai. Ka thu tla chu thlâi keuh no leh belh no lakah ruah a sûr mi hâwi asi lai.

³LALPA min chu ka sawr lai le, a rokualnâk chu a mi tla nih an sim lai.

⁴“LALPA chu nangmah vêngtu chak tak asi, a lampi zawzawng ah rangtling leh rep tak asi; Na Pathian chu zumh a kâi hen a dik asi; A dik mi leh a ṭha mi vial a ti.

⁵Sikhawmsele, nannih lam chu a mi si ding hen zumh nan kâi lo hen nan tlâk lo. Phun sual tak leh perpet mang nan si.

⁶Nannih mi â leh theihnâk neilo tla, LALPA nan ti ding mi chu hi hâwi mazei asi? An siam natu, phun ah an siam natu nan pa chu asi.

⁷“Tik a kal rawh mi hun sâwt tak asi rawh mi tla dawn set ule; Zei zei thil me a hawng um ti an simh na ding hen nan pa le tla rangah deih na u, Tar tla rangah a lânah mi thusim ding hen deih na u.

⁸Chungnungchem nih chun phun tla chu an ram tla a ruat piak na le; Mi zapi tla chu an umnâk ding ruat piak na a tum. Phun kip rangah pathian a ruat piak chiau na.

⁹Sikhawmsele, Jakob thlâk tla lam chu amah rang ê ah a thîm na.

¹⁰“Ramkaro, mun kingnâk, thlî rângnâk ah an vâi mi chu a tawng na. Amah â hum ding mi hâwi hen a hum hen a zauhkhenh na.

¹¹Mupî nih a fa tla zuang ding a sîntir na le, a thla a pharh mi tlûnah him tak hen a tleih thlir na mi hâwi hen, Israel tla chu an tlû ding mi lakah LALPA nih a kilkâwi na.

¹²LALPA cho nih a mi tla chu ramdang pathian bawmh lo hen a rui na.

¹³“Mun sâng tak tla ah lâi a rêltir na le, phâisen ah thil a kho mi tla an ei. Lungpi tla lakah mâng khuaitizû an tawng; an oliv thing tla chu lung nâwngah a ningno

¹⁴An chawpinu leh an kêl tla nih nûk hâng tamtak an suah; dawrâ ṭha chem, kêl tla, ranrual tla, fâng ṭha chem tla leh uain sung tak tla anna ting.

¹⁵“LALPA mi tla chu an nei dadauh le, sikhawmsele hel mang an si; An bit hen an khawp asi. An Siamtu Pathian chu an kaltâk le, an Ruangsuahtu chak chu an duh lo.

¹⁶An ruk sawnhnâk ruangah LALPA thîknâk thinlung an thawktir; thilsual an ti mi nih a thin a thawktir.

¹⁷Pathian tak silo mi tla sinah bâwlnâk an pêk, an thlâktu tla nih an theih dahlo mi pathian thar, Israel tla nih an zûl dahlo mi pathian tla chu.

¹⁸An Pathian, an Ruangsuahtu chak tak, anmah rangah nungnâk pêktu chu an philh asi.

¹⁹“LALPA nih chu chu a muh rawh chun a thin a thawk le, a fanu leh a fapa tla a nawng na.

²⁰‘Ka ṭangpi na lai lo rawh; mi zumhkâilo leh mi lungkhung lakah zei me a hawng tlung ka zauhnik lai,’ a ti.

²¹An milem hen ka thin an ka thawktir, Pathian tak silo mi tla pathian an ti ruangah thîknâk an ka neihtir. Churuangah phun salam an ti mi tla chu mang hen an thin ka thawktir na lai le, phun â tla hen ka thîktir na lai.

²²Ka thinthawknâk chu mei hâwi hen a alh lai le, tual tlûnah thil zeizawng a kâng lai. Laikulh tanglei tiang a va tleng lai le, tlâng tonâk bul tla a râwk lai.

²³“An tlûnah siatnâk dawng lo ka tlungtir lai le, ka chanhtiang fung zum chu an lakah ka mang lai.

²⁴Sungvâng leh damlo hen an thi lai le, râi ṭihnungkâi hen an thi lai. Anmah sehtu ding hen ram sa tla ka fial lai le, anmah chuktu ding hen rûl tûrnei ka fial lai.

²⁵Râltuk ruangah zâwllâi ah thihnâk a tlung lai le; In ah ningṭihnâk a tlung lai. Tlangvâl leh nungâk tla an thi lai le, tarpa leh nausêm tla khawm zuah an si lai lo.

²⁶An ektê hen ka veih dep na lai le, pakhat khawm theih an si lai lo rawh.

²⁷Sikhawmsele, ka mi tla an neh na ruangah an mêlma tla chu an lakah putso hen ka umtir na awt lo. Keimah nih ka râwk na mi an si ruangah.

²⁸“Israel phun tla chu theihnâk neilo mi an si le; finghnâk rerêng an neilo.

²⁹Zeiruangah neh hen kan um ti khawm an theih lo; zei thil me a hawng tlung ti khawm an theih kholo.

³⁰Zeiruangah minung pakhat nih minung sâng khat a neh na hen, Minung panih nih sâng râ an neh na zia? LALPA an Pathian nih a kaltâk na le; an Pathian chak nih anmah rangah a pêk na ruangah asi.

³¹An mêlma tla nih chun an pathian tla chu, Israel tla Pathian hâwi hen chun a chak lo ti an theih.

³²An mêlma tla nih Sodom leh Gomorah hâwi hen an râwk na le, Grep zûn khâ tîk leh tûr hen a rah mi hâwi an si.

³³Rûl tûr thawk hen uain hâng siam mi hâwi asi.

³⁴“LALPA nih an mêlma tla thilti chu a theih ko; anmah rêpnâk ding hen tik dêngkhâwng a ngâk.

³⁵LALPA nih lehrûl sam hen a rêp na lai le; an tlûk ding tik a tlung teh lai. An vânduainâk ni chu a nâi rawh.

³⁶Chaknâk zeikhawm an neilo rawh ti a muh tikah a mi le tla chu LALPA nih ruang a suah na lai. ṭangpi an herh mi a muh na tikah a rianṭuan piaktu tla tlûnah khua a ruat lai.

³⁷Churawhchun, ‘Nan pathian chak nan zumh mi tla chu kha zeiah an um rawh?’ ti hen. LALPA nih a mi le tla chu a deih na lai.

³⁸Nan bâwlnâk thâu hen nan châwm na le, din ding hen uain tla nan pêk na. Tuah hawng hen an ṭangpi na seh me; tuah ruang an suah na ding hen hawng tek na seh.

³⁹“ ‘Keimah cho hi Pathian ka si; Pathian dang tla chu a tak asi lo. Ka thah le, ka nunh, ka liamh le ka damh. Ka thilti lakah âukhawm an hawng ka do kho lo.

⁴⁰Kei, Pathian nung ka si kar vial chu ka kut phar hen thu ka tiamh.

⁴¹Ka nâmsâu tlêu vak chu ka tât lai le, diknâk thilti chu ka zauhnik awt. Ka mêlma tlûnah lehrûl ka sam lai le, hawng ka huatu tla chu ka rêp na awt.

⁴²Ka chanhtiang fungzum lakah a thî a zut lai le, ka nâmsau nih hawng ka dotu tla a thah na lai. Hawng ka dotu chu pakhat khawm ka zuah na awt lo; liamh mi tla leh rêng an tlâ mi khawm an thi lai,’ a ti.

⁴³“Phun tla, LALPA mi tla chu sawr u, anmah thahtu tla zawzawng chu a rêp na. A mêlma lehrûl a sam na le, a mi tla chu an sual a ngaihdam na,” a ti.

⁴⁴Mosi leh Josua, Nun fapa nih hi la hi Israel tla nih an theih ding hen an sim.

⁴⁵Mosi nih Pathian sîntirnâk zapi tla a pêk thluh rawh chun,

⁴⁶“Tusûn ni ah hi thupêk tla zawzawng ka nan pêk na mi hi zûl ding hen theih set u. Nan fa tla simh lemang na ule, Pathian sîntirnâk zawzawng zumhkâi tak hen an zûl kho ding hen.

⁴⁷Hi sîntirnâk tla hi thu salam asi lo; nan nungnâk bul tak asi. Zûl ule, Jordan Va kanh hen nan va luah ding mi ram ah nan um kumza lai,” a ti.

⁴⁸Chu ni lîlâ ah LALPA nih Mosi sinah,

⁴⁹“Jeriko khuapi zâwn ah mi Moab ram ah Abarim Tlâng ah kal le; Nebo Tlângah kâi, Israel tla ka pêk na ding mi Kanaan ram chu chuanh.

⁵⁰Na unaupa Aron chu Hor Tlâng ah a thi mi hâwi hen nang khawm chu tlâng ah na thi lai;

⁵¹Israel mi zapi tla mâika ah nan panih hen ka lakah zumh nan kâilo vevê ruangah. Zin ramkaro, Kades khua kiangah mi zapi mâika ah Meribah tiva ah nan ka chawnglawmh lo ruangah.

⁵²Lât tak thawk hen ram chu na chuanh lai le, sikhawmsele Israel mi tla ka pêk na ding mi ram ah lam chun na lût lai lo,” a ti.