Read Bawm Chin DEUTERONOMY 33 Bible Online

DEUTERONOMY 33 - Bawm Chin bible

DEUTERONOMY 33

¹Hi bang tla hi Pathian mi Mosi nih a thih lânah Israel mi tla tlûnah malsâwmnâk a sim mi chu asi.

²LALPA chu Sinai Tlâng thawk hen a ṭum le; Edom ram tlûnah nî hâwi hen a hawng suak le, Paran Tlâng thawk hen a mi tla a hawng cherh na. A sinah vânmifial sâng râ an um le, a kut vawrhlei ah meialh a um.

³LALPA nih a mi tla chu a dâwt na hen amah mi tla chu a hum na. Churuangah a kê phûr ah kan kûn le, a thupêk tla kan zûl.

⁴Mosi nih dân hawng kan pêk mi tla chu kan zûl, kan phun tla rangah kan roting chem asi.

⁵LALPA chu a mi Israel tla lakah lalchem asi, an ruitu tla leh an phun tla anna pûm liauah chun.

⁶Mosi nih Reuben phun thu a sim: “Reuben chu an minung tla tâwm khawmsele a thi dah lai loh,” a ti.

⁷Juda phun thu a sim: “LALPA, ṭangpi ding deih hen an auh mi chu ngâi le; phun dang tla hen tlâitir na. LALPA, an rangah do piak na le, An mêlma lakah mi chu ṭangpi na rawh,” a ti.

⁸Levi phun thu a sim: “LALPA, nangmah nih, na duhzia chu Urim leh Thummim hen hawng langh, Na to-aw zumhkâi Levi tla mang hen: Masah ah niksak na dêl na le, Meribah tî ah diknâk ah na nik na.

⁹Nu leh pa tla, unau tla, fa tla sin ngâk hen na sinah zumhkâi dauhnâk an langhtir. Na thupêk tla chu an zûl hen, Na thudântuk lakah zumh an kâi.

¹⁰Na fa tla chu na dân zûl ding hen an sîntir lai le; Na mâichâm ah bâwlnâk an hawng ap lai.

¹¹LALPA, an phun tla chu ṭhang ding hen ṭangpi na; An thilti lakah a lâwm rawh. An mêlma tla chu râwk dep na le; Thawktir nawlh lah na rawh,” a ti.

¹²Benjamin phun thu a sim: “Hi hi LALPA nih a dâwt hen a hum na mi phun chu asi; Nî tlâk hen anmah tla chu a vêng na le, An lakah â chêl,” a ti.

¹³Josef phun thu a sim: “LALPA nih an ram chu ruah leh tual tang thawk hen mi tî hen malsâwm seh.

¹⁴An ram chu nî sa lakah a min mi theirah hen malsâwm hen um seh; A tik kipah rah ṭha chem hen tamtak hen rah seh.

¹⁵A lânah mi tlâng tla chu thei rah sung tak hen khat seh.

¹⁶An ram chu thil ṭha hen khat seh, Thing bû lakah mi meialh thawk hen thusimtu LALPA ṭhatnâk hen malsâwm hen um seh. Hi bang malsâwmnâk tla hi Josef phun tla sinah um seh, Anih chu a unau tla lakah ruitu asi ruangah.

¹⁷Josef nih chun chawchal chaknâk, Ram chawchal ki a nei. A ki tla chu Manaseh phun sâng khat leh Efraim phun sâng râ an si. Chu tla hen chun phun tla chu a suk na le, Kâwlkil tiang hen a nâwr na,” a ti.

¹⁸Isakar leh Zebulun phun tla thu a sim: “Zebulun phun chu tipi tlûnah an sawlehnâk sul-le-lam tluang hen um na seh. Isakar phun chu in leiah a neih siah pung seh.

¹⁹An tlâng ah ramdang mi tla an sâwm na hen chunah chun bâwlnâk dik tak an ap. Neihnâk tla chu tipi thawk hen leh tiva kap mi sep thawk hen an tawng,” a ti.

²⁰Gad phun thu a sim: “An ram kâu tak hen siamtu Pathian chu sawr hen um seh. Gad nih chun chakeibaknei hâwi hen Lû vun leh a bân thlêr ding a bawh ko.

²¹Anmah rangah ram ṭha chem an lâk. Hotu tingvo chu an rangah an ruat piak na. Israel ruitu tla anna pûm liauah LALPA thupêk leh dân tla an zûl,” a ti.

²²Dan phun thu a sim: “Dan chu chakeibaknei fa no asi; Basan ram thawk hen a hawng per,” a ti.

²³Naphtali phun thu a sim: “Naphtali chu LALPA sunhsaknâk ṭha hen neih-le-siah hen malsâwm hen a um. An ram nih Galili Rilî thawk hen simlei kâng a dêng khet,” a ti.

²⁴Aser phun thu a sim: “Aser chu phun dang tla ngâk hen malsâwmnâk a tawng dauh. A unau tla nih sunhsak sele, A ram ah chun oliv thing tamtak um seh.

²⁵A khua chu thîr kulh kawtkâ hen hum hen um sele, Him tak hen um kumza seh,” a ti.

²⁶Israel mi tla, nan Pathian hâwi hi zei pathian khawm a um lo. Rokual tak hen vân ah â chuan le, Nanmah ṭangpi ding hen sûm lakah chuan hen a hawng kal.

²⁷Pathian chu nanmah vêng kumzatu asi; A zungzâl bân chu nanmah ṭangpitu asi. Nan kalnâk zawngah nan mêlma tla chu a nar le, An ektê râwk ver ding hen an simh na.

²⁸Churuangah Jakob thlâk tla chu thlangam tak hen an um, Vân mi dâmtî nih a chinh mi tual ah fâng leh uain hen a khat mi ram ah him tak hen um na seh.

²⁹Israel, na lâwptlo chiam e! Nangmah hâwi hen LALPA nih ruang a suah mi phun âukhawm an um lo. LALPA amah tak chu a nan vêng ding leh nehnâk a nan pêk ding hen na phâw leh na nâmsâu chu asi. Na mêlma tla chu khuaruatnâk deih hen an hawng lai le, nangnih na lamhbêk na lai.