Read Bawm Chin DEUTERONOMY 9 Bible Online

DEUTERONOMY 9 - Bawm Chin bible

DEUTERONOMY 9

¹“Israel mi tla, ngâi u! Tusûn ni ah nanmah ngâk a chak leh rokual mi phun umnâk ram chu luah ding hen Jordan Va chu nan kanh awt rawh asi. An khuapi tla chu a lian hen a kulh tla thungâi a sâng.

²An minung tla khawm an sâng hen an chak le; milian tla an si le, âukhawm nih do na kho an silo ti nan theih.

³Sikhawmsele, nanmah ngelchel nih LALPA nan Pathian chu nan mâilei ah meihumpi hâwi hen a kal mi nan muh lai. Nan kalnâk zawng nan neh vima lai le, nan nar phin na lai, thu a tiamh hâwi hen tuko ah nan neh dep lai.

⁴“LALPA nan Pathian nih nan rangah an nar piak phin na tikah chun kanmah ṭhat ruangah hi ram hi ting ding hen hawng kan put asi ti a ruat lah u. Churuang asi lo, an sual tuk ruangah LALPA nih hi minung tla hi an nar piak na awt asi.

⁵LALPA nih an ram an tingtir na mi chu nan ṭhat ruang leh nan dik ruangah asi lo. An sual ruangah leh a nan thlâk natu Abraham, Isak, Jakob sinah thu a tiamh mi ti a tum ruangah a nar na awt mi asi.

⁶Pêk tlâk nan si ruangah hi ram ṭha hi LALPA nih an pêk na mi asi lo ti theih u. Chu hâwi ding ngâk hen, mi lungkhung tak nan si.

⁷“Ramkaro ah LALPA nan Pathian nan thinthawk tir mi kha philh lah u. Aigupta ram nan kaltâknâk ni thawk hen hi mun nan tlung tiang hen a tlûnah nan hel mi kha.

⁸Sinai Tlâng khawmah nanmah an veih dep na ding rê hen LALPA thin nan thawktir.

⁹Tlâng ah lungtlêp nan sinah thudân a tuk mi rînâk chu lâk ding hen ka va kâi. Chunah ni sâwmli leh zan sâwmli tî dinlo leh buh eilo hen ka va râu.

¹⁰Churawhchun LALPA nih lungtlêp panih tlâng bulah nanna pûm liauah mei thawk hen nan sinah thudântuk a sim mi amah kut ngelchel hen a rîn mi chu hawng ka pêk rawh.

¹¹Asi, ni sâwmli leh zân sâwmli nûnah chun thudântuk a rîn mi lungtlêp panih chu LALPA nih hawng ka pêk rawh.

¹²“Churawhchun LALPA nih ka sinah, ‘Hi tlâng ah mi hi ṭum rereh, Aigupta ram thawk hen na hawng suakpi mi tla kha thilsual an ti le, anna râwk ver rawh. Thu ka pêk na mi duhlo hen kâng dang leiah anna her ving le, an rangah milem an siam, a ti.

¹³“LALPA ber nih ka sinah, ‘Hi minung tla hi an lung a khung thlo ti ka theih.

¹⁴Hawng ka thloh rîlmâl lah. Ka veih dep na awt, âukhawm nih an theih na lai lo rawh. Nang hi anmah ngâk hen phun lian leh thiltikho dauh pa ah ka nan siam awt,’ a ti.

¹⁵“Churawhchun tlâng ah mi chu thudântuk rînnâk lungtlêp panih put hen ka ṭum rawh. Tlâng ah mi meialh chu a hawng ṭum.

¹⁶LALPA nan Pathian thupêk chu nan ngâi lo zia ka nan muh na, nan rangah thîr hen chawchal lem nan siam le, a lakah thilsual nan ti.

¹⁷Churuangah nan mâika ah chu lungtlêp chu ka lawnh le, a kuai dip.

¹⁸Churawhchun LALPA mâika ah ni sâwmli leh zân sâwmli tî dinlo leh buh eilo hen ka buk nawlh. Hi hi LALPA tlûnah nan sual ruangah leh a thin nan thawktir mi ruangah ka ti mi asi.

¹⁹LALPA thinthawknâk chu thungâi hen ka ṭih, an veih dep na ding hen ṭihnung a kâi ruangah; sikhawmsele LALPA nih hawng ka ngâi piak nawlh fâwn.

²⁰Aron tlûn khawmah thah ding rê hen LALPA a thinthawk le, chu liau khawmah Aron rangah thla ka cham piak.

²¹Nan thilsual siam chawpê lem chu ka lâk le, mei ah ka lawnh rawh. Ka khuai dip le, valeidip hâwi hen ka rial dip le, tlâng ah a luang mi tiva ah a dip chu ka lawnh rawh.

²²“LALPA nan Pathian chu Taberah, Masah leh Kibroth Hataavah ah nan um liauah a thin nan runtir ber.

²³Kades Barnea thawk hen ram a nan pêk na mi va luah ding hen a nan fial na liauah a tlûnah nan hel le; amah chu nan zumh lo hen a thu khawm nan ngâi lo.

²⁴Chu thawk hen chun LALPA lakah hel mang mi nan si ti kan theih na.

²⁵“LALPA nih a nan veih dep na awt ti ka theih ruangah a mâika ah ni sâwmli leh zân sâwmli ka buk.

²⁶Churawhchun, LALPA sinah thla ka cham le, LALPA zahkai, na mi tla, na thiltikhonâk leh chaknâk hen Aigupta ram ah mi na suakpi na mi chu veih lah na.

²⁷Na to-aw Abraham, Isak, Jakob chu theihkumza na le, hi bang zapi mi lungkhung, ṭhatlonâk leh sualnâk hi ngâi piak lah na.

²⁸Chu hâwi asi lo chun, Aigupta mi tla nih na mi tla chu na tiamh na mi ram ah a kalpi na kholo an ti lebang lai. A hua na ruangah a mi tla chu ramkaro leiah a suakpi na le, a thah hep na an ti lai.

²⁹Na thiltikhonâk rokual leh na chaknâk hen Aigupta ram thawk hen na suakpi na mi, na mi rang dingah na thîm na mi an si lo mazei?’ ka ti.