Read Bawm Chin JOSUA 14 Bible Online

JOSUA 14 - Bawm Chin bible

JOSUA 14

¹Chu nûnah chun Kanaan ram Jordan Va thlanglei chu Israel tla rangah ṭhenh hen a hawng um nawlh. Bâwlpu Eleazar, Nun fapa Josua leh Israel dâwngsung lakah ruitu tla zapi tla lakah an ṭhenh zâr na.

²LALPA nih Mosi sinah thu a pêk mi hâwi hen phun kua leh a khingkhuai tla lakah Jordan Va thlanglei ram chu chamchawh hen anna ṭhen.

³Mosi nih Jordan Va saklei ram chu phun nih leh a khingkhuai rangah a pêk ving na rawh. (Josef thlâk tla chu phun nih hen anna ṭhen le, Manaseh leh Efraim) an si. Sikhawmsele Mosi nih Levi tla rangah lam chun ram tingvo a pêk na lo. Ram ruangrûl ah khuapi an umnâk leh an ranrual rangah phâisen anna ting bâk.

⁵Israel tla nih LALPA nih Mosi rangah thu a pêk mi hâwi hen ram chu anna ṭhen zâr rawh.

⁶Ni khat chu Juda lakah mi âu tla mawh Josua sinah Gilgal ah an hawng. An lakah minung pakhat Keniz mi Jephuneh fapa Kaleb nih a sinah, “Kades Barnea ah nang leh keimah thu LALPA nih Mosi Pathian mi rangah a simh mi na theih ko kha.

⁷Mosi LALPA to-aw nih hi ram thlingthlâk ding hen Kadesh Barnea thawk hen hawng ka fial liauah kum sâwmli tluk hen upa ka si. Thâwngthâng zumhkâi tak ka simh.

⁸Kan sinah kal mi minung tla nih zapi tla rangah an zerhtir. Sikhawmsele kei lam chu LALPA ka Pathian chu ka zumh thlir le, a thu ka ngâi.

⁹Chu hâwi ka um ruangah Mosi nih ka fa leh kei nih ka kalnâk ram tla chu kan tâ rangah a ting bâk ding hen thu hawng ka tiamh.

¹⁰Sikhawmsele tuah, ngâinik rawh! LALPA nih Mosi sinah a simnâk thawk hen kum sâwmli leh kum nga tiang asi rawh. Chu chu Israel tla chu ramkaro ah an hawng kal le, LALPA nih thu a tiamh mi hâwi hen, tusûn ni tiang hen dam hen hawng ka zuah rih. Hawng ka zauhnik rawh! Kum sâwmriat leh kum nga ka si rawh.

¹¹Mosi nih hawng ka fial liau mi hâwi tluk hen tu khawmah ka chak nget rih. Râl tuk ding leh zei thil tal ti ding hen ka chak tâwk rerêng rih.

¹²Asi chun, tuah ka mi le tla hen ram thlingthlâk thu kan sim liauah LALPA nih thu hawng ka pêk mi hâwi hen tlâng ram chu hawng ka pêk. Anakim murui, milian umnâk khuapi lian kulh pang mi ka nan simh mi kha. LALPA chu ka sinah a um lai ti ka ruat, LALPA nih a sim mi hâwi hen ka nar phin na lai,” a ti.

¹³Josua nih Jephuneh fapa Kaleb rangah mal a sâwm le, amah tâ si ding hen Hebron khuapi chu a pêk rawh.

¹⁴Hebron chu Keniz mi Jephuneh fapa Kaleb thlâk tla tâ asi kumza rawh. LALPA Israel Pathian lakah zumhkâi tak hen ê-aw a ngâi ruangah.

¹⁵A lânah chun Hebron chu Arba khuapi an ti. (Arba chu Anakim lakah mi rokual chem asi.) Churawhchun ram sung chu thla a ngam rawh.