Read Bawm Chin JOSUA 16 Bible Online

JOSUA 16 - Bawm Chin bible

JOSUA 16

¹Simlei kâng ramri Josef thlâk tla rangah an ruat piak na mi ram chu Jeriko kiang Jordan thawk hen Jeriko khua saklei tinung va, chu thawk hen a kal vima le, ramkaro ah, Jeriko thawk hen tlâng ram leikângah Bethel tiang hen.

²Bethel thawk hen Luz ah Atarot Adar pal hen, Arkit umnâk ah.

³Chu thawk hen thlanglei kângah Japhlet ram leikângah a kal le, Beth Horon mun niam dauh ram tiang hen. Chu thawk hen chun Gezer leiah a kal vima le, Mediteranian Tipi ah a dawng.

⁴Josef thlâk tla, Efraim phun tla leh thlanglei mi Manaseh thlâk tla nih hi ram hi an tâ ding hen anna ting.

⁵Hi hi Efraim dâwngsung tâ ram asi. An ramri chu Atarot Adar thawk hen saklei kâng Beth Horon thlang dauh ah,

⁶chu thawk hen Mediteranian Tipi leiah. Mikmethath chu marlei kângah um mi asi. Saklei mi ramri chu Taanath Siloh leiah a hawng a kuai le, saklei kâng Janoah ah a kal.

⁷Janoah thawk hen a um le, Atarot leh Naarah, Jeriko a va phanh le, Jordan ah a dawng.

⁸A ramri chu thlanglei kâng Tapuah thawk hen Kanah tiva Mediteranian Tipi ah a dawng, hi ram tla hi Efraim phun dâwngsungkhur rangah pêk asi.

⁹Chu thawk hen khuapi leh khua tênâu Manaseh phun tla umnâk ramri mi tla hen, sikhawmsele Efraim phun rangah pêk mi asi.

¹⁰Sikhawmsele, Gezer ah um mi Kanaan mi tla chu an nar na lo, churuang chun Kanaan mi tla chu tutiang Efraim phun tla nâwngah an um. Sikhawmsele an to-aw ah rianṭuantir hen an um.