Read Bawm Chin JOSUA 22 Bible Online

JOSUA 22 - Bawm Chin bible

JOSUA 22

¹Churawhchun Josua nih Reuben leh Gad phun tla leh saklei mi Manaseh phun tla chu a pumh na.

²An sinah, “LALPA to-aw Mosi nih ti ding hen thu a nan pêk na mi nan ti hen, thu ka nan pêk na mi nan zûl ver.

³Hi bang tla zawzawng lakah hin veikhat khawm nan hâwi Israel tla rangah nan thlawrhthlâu na lo. LALPA nan Pathian thupêk tla khawm thiamthih tak hen nan zûl.

⁴Tuah LALPA, nan Pathian nih a tiamh rawh hâwi hen nan hâwi Israel tla rangah thlangamnâk a pêk rawh. Churuang chun Jordan Va saklei ram LALPA to-aw Mosi rangah nan deih le, a nan pêk na mi ram ah tlung u rawh.

⁵Mosi nih dân a nan pêk na mi chu zûl ding hen theihkumza ule; LALPA, nan Pathian chu dâwt ule, a duhzia hen thil ti u, a thupêk tla zûl ule, a lakah zumhkâi hen um u, nan thinlung leh nan thlarau zawzawng hen a nâwl zulh u,” a ti.

⁶Josua nih mal a sâwm na le, hi bang thu tla a simh na rawh chun, in leiah a tlungtir na le, “Tuah nan in leiah neih bû hen nan tlung awt rawh asi, ranrual, tangka, ngûn, dâr, thîr leh nipuan tamtak hen. Nan phun hâwi tla rangah nan mêlma thawk hen nan tawng mi tla pêk na bâk u,” a ti. Churawhchun in leiah an tlung rawh. Mosi nih Jordan Va saklei Manaseh phun khingkhuai a pêk na le, sikhawmsele phun khingkhuai dang chu Josua nih phun dang tla hen Jordan Va thlanglei ram a pêk na.

⁹Churuangah Reuben leh Gad phun tla leh saklei mi Manaseh phun tla chu an in leiah an kîr rawh. Israel mi tla zawzawng Kanaan ram ah Siloh khua ah an mâk na le, Gilead ram Mosi mang hen LALPA nih thu a pêk na mi hâwi hen an lâk chia, anmah ram leiah chun tlung ding anna thawh rawh.

¹⁰Reuben, Gad leh saklei mi phun Manaseh chu Geliloth an va tleng le, Jordan thlanglei kap tiva kiang ah chun thinlung purh tak mi mâichâm lian tak an siam.

¹¹Israel mi zawzawng chu an simh na le, “Ngâi u! Reuben, Gad leh saklei mi Manaseh phun tla nih Geliloth khua ah, kanmah lei thal Jordan vakap ah mâichâm an siam!” an ti.

¹²Israel mi tla nih chu chu an theih rawh chun, mi zawzawng tla chu saklei mi phun tla do ding hen Siloh khua ah an va a pûm rawh.

¹³Churawhchun Phinehas bâwlpu Eleazar fapa chu Gilead ram ah mi Reuben, Gad leh saklei mi Manaseh phun tla sinah an fial rawh.

¹⁴Ruitu minung parâ tla chu Phinehas hen an kal, thlanglei mi phun lakah pakhat vima hen, chi khat lakah dâwngsungkhur lakah pakhat chiau hen.

¹⁵Gilead ram ah Reuben, Gad, saklei mi Manaseh phun tla sinah an va kal le,

¹⁶LALPA mi zawzawng ruangrûl ah an sinah thu an va sim. “Zei zia, Israel Pathian duh lo zia thilsual nan ti zia? Nanmah nih mâichâm nan siam mi hi LALPA lakah nan hel mi asi, amah chu nan zûl lo rawh ma hi!

¹⁷Peor ah kan sualnâk tla kha theih ko u me, LALPA nih a mi tla râi hen a rêp na mi kha nan theih lo ma? Chu thilti ruangah tutiang kan tuar nget rih asi. Chu sualnâk chu â tâwk lo rih nan ti ma?

¹⁸Tuhin LALPA chu nan zûl duh awt lo rawh mi masi? Tusûn ni hin LALPA lakah nan hel mi asi chun, thâituan ah Israel mikip lakah a thinthawk lai.

¹⁹Nan ram ah LALPA sawnhnâk ding hen a tlâk lo tuktarâi chun a Puanin umnâk LALPA ram ah hawng ko u me. Kanmah lakah mi ram khawm hawng kan deih ko u, sikhawmsele LALPA lakah hel rîlmâl lah u. LALPA kan Pathian mâichâm nûnah mâichâm dang siam hen kan lakah khawm hel lah u.

²⁰Zerah fapa Akan nih thu ngâi duh lo hen râwk dep ding mi thil a veih lo ruangah Israel tla rêp an si; amah Akan sual ruangah amah cho mazei a thi,” an ti.

²¹Reuben, Gad leh saklei mi Manaseh phun tla nih thlanglei ah mi phun dâwngsungkhur lakah a lû dauh si mi tla rangah an sâng na le:

²²“Mi thiltikho chu Pathian asi, amah chu LALPA asi! Mi chak pakhat chu Pathian asi! Amah chu LALPA asi! Zeirangah hi hi kan ti amah nih a theih asi, nannih khawm nih nan theih ding hen kan duh na! LALPA lakah kan hel hen amah kan zumh lo mi asi chun hawng kan zuah rerêng lah seh!

²³LALPA lakah ê-aw kan ngâi lo hen mah rangah mâichâm siam hen bâwlnâk ding leh ei phung apnâk mawh, kawmhnâk apnâk mawh rang dingah mang ding kan tum mi asi chun LALPA amah tak nih hawng kan rêp seh.

²⁴Chu hâwi ngâk hen! Mâilei ah nan thlâk tla nih kan thlâk tla sinah, ‘LALPA Israel Pathian hen nanna tlâinâk zei nan nei?

²⁵Kannih leh nannih Reuben leh Gad minung tla kanna rînâk ding hen Jordan Va a siam. LALPA hen nannih a tlâinâk zeikhawm nan nei lo,’ an ti ding mi kan ṭih ruangah kan siam mi asi. Chu tikah chun nan thlâk tla nih kan thlâk tla LALPA sawnhnâk chu an veih awt thlo.

²⁶Churuang chun hi mâichâm hi kan siam le, a tlûnah bâwlnâk kan duah ding asi lo, thil ap khawm kan nei ding asi lo,

²⁷sikhawmsele nan mi tla leh kan mi tla hi nûnthâi ah thlâk a hawng um vima ding mi nih LALPA Puanin thenhlimh mâika ah thil ap duahphung tla leh bâwlnâk, kawmhnâk thil ap tla nei hen LALPA kan sawnh tatak ti theihnâk ding hen asi dauh. Hi hi nan thlâk tla nih LALPA hen tlâinâk zeikhawm nan nei lo an ti kholonâk ding hen asi.

²⁸Kan thinlung ah kan ruatnâk ah hi hâwi hen a hawng um lai ti kan ruat ruangah, hi hâwi hen hawng um menza khawmsele, kan thlâk tla nih, ‘Zauhnik u me! Kan thlâktu tla nih LALPA mâichâm hâwitê an siam bâk hi teh. Duahphung apnâk mawh bâwlnâk mawh lam chu asi lo, nan mi leh kan mi tla rangah theihtirnâk cho asi’ an ti kho.

²⁹LALPA lakah hel hen zûl kan tum lo ruangah duahphung thil apnâk leh eiphung bâwlnâk mawh apnâk ding hen mâichâm kan siam mi asi rîlmâl lo. LALPA umnâk Puanin mâika mi mâichâm lo hen mâichâm dang rerêng kan siam ding asi lo,” an ti.

³⁰Phinehas bâwlpu leh a kalpi na mi minung parâ leh thlanglei kâng mi phun dâwngsungkhur lakah a lukhâi tla nih Reuben, Gad leh saklei mi Manaseh phun tla thusim chu an theih le, thungâi anna lâwm.

³¹Bâwlpu Eleazar fapa Phinehas nih an sinah, “Tuah kan sinah LALPA a um ti kan theih. Nannih khawm a lakah nan hel mi asi lo, Israel mi tla LALPA rêp hen an um ding mi chu nan hum lehlam mi asi,” a ti.

³²Chun, Phinehas leh ruitu tla nih Reuben, Gad phun Gilead ram ah mi chu an kaltâk na le, Israel mi Kanaan ram ah um mi tla sinah an va kîr le, an simh na rawh.

³³Israel tla chu thungâi anna lâwm le, Pathian an sawr rawh. Churawhchun Reuben leh Gad umnâk ram leiah kal hen va râwk na ding thu rerêng an sim lo rawh.

³⁴Reuben leh Gad mi tla nih chun, “Hi mâichâm hi kan ektê rangah LALPA chu Pathian asi ti hawng kan theihtirtu asi,” an ti. Churuangah a min ah “Ed’’ (Theihtirtu) an ti.