Read Bawm Chin JOSUA 23 Bible Online

JOSUA 23 - Bawm Chin bible

JOSUA 23

¹LALPA nih Israel tla rangah an kiangkam ah an mêlma lakah himnâk sâwt tak a pêk na nûnah chun Josua chu thungâi a tar rawh le,

²Israel tla zawzawng, an upa tla, an ruitu tla, lâirêltu tla, zapi lakah hotu tla a kawh na le, an sinah, “Tuah chun thungâi ka tar rawh.

³Nanmah ruangah hi bang phun zawzawng tlûnah LALPA, nan Pathian nih thil a ti mi tla nan muh rawh asi. LALPA nan Pathian nih an do piak na rawh.

⁴Tuah a leifuan phun ah um mi tla leh phun zawzawng ram Jordan Va saklei ram thawk hen thlanglei ah Mediteranian Tipi ka lâk rawh mi tla chu nanmah phun tla rangah ka nan ruat piak na rawh.

⁵LALPA, nan Pathian nih a ti vima lai le, nan kalnâk zawngah a nar vima lai. LALPA nan Pathian nih an tiamh na rawh hâwi hen an ram chu nan tâ asi lai.

⁶Mosi Dân bu ah rîn mi thil, zeizawng zûl ding hen a thiamthih u. A zeitê khawm thlawrhthlâu lah ule,

⁷chu tikah hi a leifuan um mi minung sinah hin kawpkaihnâk nan nei lai lo le, an pathian min khawm nan lam lai lo, an min sim hen thutiamnâk khawm nan nei lai loh, chubang tla pathian sawnh hen an sin khawmah nan kûn lai lo.

⁸Chu hâwi ding ngâk hen, tuah nan umdân hâwi hen LALPA lakah chun zumhkâi hen um u.

⁹LALPA nih phun rokual leh thiltikho tak chu nan kalnâk zawngah a nar le, nanmah do ding hen pakhat khawm an dîr kho lo.

¹⁰Nan lakah pakhat khawm nih chun minung sâng khat tektirtu nan um lo ruangah thu a tiamh mi hâwitê hen LALPA nan Pathian nih an do piak na asi.

¹¹Churuangah LALPA nan Pathian chu dâwt ding hen a thiamthih u.

¹²Zumh nan kâi lo hen hi phun a leifuan mi hen nanna tlâi hen nupi pasal nanna umh chun,

¹³LALPA nan Pathian nih nan va kalnâk lak khawmah hi bang phun tla hi an nar piak na awt lo ti theih u, chu hâwi ngâk hen nan rangah thang hâwi hen ṭihnungkâi mawh khur mawh nan kêng lakah vuakfung mawh, nan mit lakah ling hâwi an si lai, chubang tla chu LALPA nan Pathian nih a nan pêk na mi ram ṭha lakah mi nan vei hep tiang an um lai.

¹⁴“Tu chun ka thih ni a nâi rawh. LALPA, nan Pathian nih a nan tiamh na mi chu an pêk na rawh ti nan ektê hen nan theih rawh. Thu a tiamh mi zawng chu a zulh hep rawh, pakhat khawm a zulhpeh lo mi a um lo.

¹⁵Sikhawmsele, nan lakah a thutiam a nan tiamh na mi zawng a zulhpeh hâwi hen, ningṭihnâk khawmah a nan rui vima na lai.

¹⁶LALPA, nan Pathian nih thudântuk zûl ding a nan pêk na mi nan zûl lo hen, pathian dang tla rianṭuan hen nan sawnh chun a thin thawknâk hen a nan rêp na lai le, hi a nan pêk na mi ram ṭha lakah nan um mi hi zeikar lo ah pakhattê khawm an zuah na lai lo,” a ti.