Read Bawm Chin JOSUA 24 Bible Online

JOSUA 24 - Bawm Chin bible

JOSUA 24

¹Josua nih Israel mi zawzawng Sekem ah a pumh hep na. Upa tla, ruitu tla, lâirêltu tla, Israel lakah hotu tla a kawh na le, Pathian mâika ah an hawng ver.

²Josua nih zapi minung zawzawng sinah, “Hi hi asi LALPA Israel Pathian nih a sim ding mi chu: ‘A lânah an thlâk natu tla chu Eufretis tiva râl leiah an um le, pathian dang tla an sawnh. Chu lakah mi pakhat chu Terah asi, amah chu Nahor leh Abraham pa asi.

³Churawhchun an thlâk natu Abraham chu Eufretis pîn lei ram ah mi chu ka put le, Kanaan ram pumpi ka ṭawlpi. Thlâk tamtak ka pêk. Isak ka pêk le,

⁴Isak rangah chun Jakob leh Esau ka pêk. Esau rangah a tâ ding hen Edom tlâng ram ka pêk. Sikhawmsele an thlâk natu Jakob lam chu a fa tla hen Aigupta ram ah an ṭum.

⁵A nehnûnah chun Mosi leh Aron ka fial na le, Aigupta ram ah nawknâk fâk tak ka tlungtir rawh. Chu lakah mi chu ka nan suakpi na.

⁶Nan thlâktu tla chu Aigupta ram thawk hen ka suakpi na le, Aigupta mi tla nih an kari leh rang tlûnah chuan mi tla hen an hawng ṭhâwl na. Sikhawmsele, an thlâk natu tla chu Tipi Sen an hawng tleng rawh chun,

⁷ṭangpi deih hen an hawng ka auh le, Aigupta mi tla hen an karah mûi ka siah. Aigupta mi tla lakah chun tî ka luangtir le; ka nîmtir dep na. Chu hâwi hen Aigupta ram ah ka ti mi chu nan theih. “Ramkaro ah kum sâwt tak nan um.

⁸Amor umnâk Jordan Va saklei ah kan kalpi na. A nan do na le, sikhawmsele nehtu ah ka nan siam na. An ram tla chu nan lâk le, nan kalnâk kipah ka veih na.

⁹Churawhchun Moab lalchem Zipor fapa Balak nih a nan do na. Beor fapa Balaam sinah thu a thanh le, siat an barh na ding hen a ngiar.

¹⁰Sikhawmsele Balaam thu ka ngâi piak lo, mal lam an sâwm na, hi hâwi hen Balak sinah mi kan hum na.

¹¹Jordan Va nan kanh le, Jeriko nan hawng tleng. Jeriko mi tla nih Amor mi, Periz mi, Kanaan mi, Hit mi, Girgasit mi, Hiv mi leh Jebus mi tla hâwi hen an do na. Chubang tla lakah nehtu ah kan siam na.

¹²Nan kalnâk zawngah Amor lalchem tla panih nar ding hen ningṭihnâk ka pêk na. Nan chanhtiang leh nâmsâu tla nih zei kawngkâ khawm asi lo.

¹³Nan vât dah lo mi ram ka nan pêk na le, nanmah tuah lo mi khuapi tla ka nan pêk na. Tuah chubang lakah nan um le, nan chîng lo mi grep tla nan ei, nan phun lo mi oliv sariak tla nanna ting,’ a ti.

¹⁴Josua nih thu a sim vima le, “Churawhchun tuah, LALPA chu zah ule, zumhkâi tak leh rinh tlâk hen a rianṭuan u. A nan thlâk natu leh pathian tla Mesopotamia leh Aigupta ram ah an sawnh mi tla lakah mi chu a lêt ule, LALPA amah rian chu ṭuan u.

¹⁵Amah rian chu ṭuan ding nan duh lo asi âwk leh tusûn ni ah hin âu rian nan ṭuan awt a ruat set u. Tuah nan umnâk ram Amor tla pathian mawh Mesopotamia ram ah an thlâk natu pathian rian ma nan ṭuan awt thlûk u. Kei leh ka dâwngsung lam nih chun LALPA rian kan ṭuan lai,” a ti.

¹⁶Zapi tla nih an sâng le, “pathian dang sawnh ding hen LALPA chu kan kaltâk lai lo!

¹⁷LALPA, kan Pathian nih chun Aigupta ram ah kan pa leh kanmah sal ah kan tâng mi hawng kan suah le, thilchê a ti mi tla khawm kan muh. Kan kalnâk leh kan pal mi zawzawng phun lakah mi hawng kan hum.

¹⁸Hi ram ah hin kan hawng kal le, hinah Amor um mi tla khawm a nar ver na. Churuangah chun LALPA rian chu kan ṭuan bâk awt, amah chu kan Pathian asi,” an ti.

¹⁹Josua nih zapi tla sinah, “Sikhawmsele, LALPA rian nan ṭuan kho ding asi lo. Pathian thenhlimh asi, nan sualnâk a ngaihdam ding asi lo, dotu chu a sâithiam lo.

²⁰Ramdang mi pathian sawnh ding hen amah nan thlawrhthlâu chun a nan do na lai le, a nan rêp na lai, a lânah ṭha ngâi khawmsele a nan veih hep na lai,” a ti.

²¹Mi zapi nih Josua sinah, “Silo! LALPA rian kan ṭuan awt,” an ti.

²²Josua nih an sinah, “LALPA rianṭuan ding nan thîm mi lakah nan ti tatak mi asi le silo thu ah nanmah kha theihtu si chawlh u,” a ti. “Si seh” an ti le “Theihtu kansi” an ti.

²³“Asi chun, ramdang pathian nan nei mi thawk hen a thliar u,” ti hen thu a pêk na le, “LALPA Israel Pathian sinah buar lo ding thu tiam u,” a ti.

²⁴Mi zapi tla nih Josua sinah, “LALPA kan Pathian rian kan ṭuan awt, a thupêk tla kan zûl lai,” an ti.

²⁵Churawhchun Josua nih chu ni ah chun zapi rangah thudântuk a siam, Sekem ah an zûl ding hen dân leh ti ding mi a pêk na.

²⁶Josua nih LALPA dân bu ah hi bang thupêk tla hi a rîn. Lungtlêp lianpî a lâk le, oak thing tangah LALPA mun thenhlimh tangah a phun.

²⁷Zapi zawzawng sinah, “Hi lung hi kan rangah theihpitu si seh. Kan sinah LALPA nih thu a sim mi zawzawng chu a theih hep. Churuang chun, LALPA lakah hel lo ding hen theihpitu leh a nan vêng natu asi lai,” a ti.

²⁸Churawhchun Josua nih mi zapi tla chu a ṭiaktir na le, anmah ram chiauah an tlung rawh.

²⁹Chu nûnah chun Josua Nun fapa LALPA to-aw chu kum zâ leh kum râ si hen a thi rawh.

³⁰Amah ram lei Gaash marlei tlâng ram Timnath Serah ah an vûi rawh.

³¹Josua chu a dam sung zawzawng ah chun Israel mi tla nih LALPA rian an ṭuan le, a thih nûn khawmah chun a dam liauah ruitu si mi tla LALPA nih Israel tla rangah thil a ti mi muhtu tla nih an ṭuan vima.

³²Josef ruak Aigupta ram thawk hen an hawng put mi khawm Hamor Sekem pa sinah mi tangka zâ hen a châwk mi, ram mêtê Sekem ah an vûi. Hi ram hi Josef thlâk tla nih anna ting.

³³Aron fapa Eleazar chu a thi le, Gilead ah an vûi le, chu khua chu Efraim tlâng ram Phinehas fapa sinah a pêk mi chu asi.