Read Bawm Chin JOSUA 5 Bible Online

JOSUA 5 - Bawm Chin bible

JOSUA 5

¹Amor lalchem Jordan thlanglei mi zawzawng tla, Mediteranian Tipi kiangkam ah um mi Kanaan lalchem tla nih Israel mi tla nih an tan ver tiang hen LALPA nih Jordan Va tî chu a kangtir piak na ti an theih. Israel mi tla ruangah an thinlung a dâwk hep le, thungâi an ningṭih.

²Churawhchun LALPA nih Josua chu a simh le, “Lung hen nâmtê siam le, Israel fa tla fêm tan na,” a ti.

³Josua nih LALPA thupêk hâwi hen a ti le, Israel tla chu Fêmtannâk Tlâng an ti mi ah fêm a tan na.

⁴Israel mi tla chu Aigupta an kaltâk liauah mipa zawzawng chu an fêm an tan hep rawh. Sikhawmsele, zapi tla nih ramkaro kanh ding hen kum sâwmli an râu le, chu karah mipa ngâksia tla chu fêm tanlo hep an si. Chu lo khawm chu hun dawngh leikângah chun Aigupta ram thawk hen suak mi upa râltuktu vial chu LALPA thu an ngâilo ruangah an thi hep. A tiam rawh hâwi hen anmah thlâktu tla sinah a tiamh rawh mi neihnâk ram leh ram ṭha chu an muh ding hen a siang na lo.

⁷Hi bang fapa tla chu an fêm tanlo mi an si le, Josua nih a tan na mi chu thlâk nawlh rangah a thartê hen a tan na mi asi.

⁸Fêm an tan thluh rawh chun phun tla zawzawng chu an mâ a dam lân lo chu riakmun ah chun an châm ko.

⁹LALPA nih Josua sinah, “Tusûn ni ah hin Aigupta ram ah mualpho tak hen sal nan si mi chu ka lawnh rawh,” a ti. Churuangah asi, a mun min ah Gilgal an tinâk chu, chu min chu a put nget ko rih.

¹⁰Israel fa tla chu Jeriko phâi Gilgal ah an um liauah chun chu thla ni leili ni zânlei ah Kalkanh Kût an mang.

¹¹A thâituan ah an buh ei chu Kanaan ram buh chîng mi an ei tîrnâk asi. Sang tla an ei mi chu thilnu telhlo mi asi.

¹²Churawhchun Manna a tlâ mi khawm â dîn rawh. Israel lakah âukhawm nih an neilo rawh. Chu thawk hen Kanaan ram ah an chîng mi buh an ei vima rawh.

¹³Josua chu Jeriko khua kiangah a um liauah lâkkhatko ah minung nâmsâu put hen a mâika ah dîr mi a muh. Josua chu a sinah a va kal le, thu a deih, “Kan kawrsen lakah mi ma na si? Asi lo leh mêlma ma na si?” a ti.

¹⁴“Zei leikâng mi khawm ka silo,” ti hen chu minung nih a sâng. “Kei chu hinah LALPA kawrsen tla thupêktu ah um mi ka si,” a ti. Josua chu a mâika ah a bawkbukhup le, a mâimûk le, a sinah, “Pu, na to-aw ka si, zei ti ding na ka duh?” a ti.

¹⁵LALPA kawrsen thupêktu nih hi hâwi hen a simh, “Na pheikawk lît, mun thenhlimh ah dîr na si,” a ti. A simh mi hâwi hen Josua nih a ti rawh.