Read Bawm Chin LÂIRÊL 10 Bible Online

LÂIRÊL 10 - Bawm Chin bible

LÂIRÊL 10

¹Abimelek thih nûnah Puah fapa Tola, Dodo tupa chu Israel tla sanh na ding hen a hawng. Isakar phun lakah mi asi le, Efraim Tlâng ram Samir khua ah a um.

²Kum kul leh kum thum kar Israel ruitu ah a um. Churawhchun a thi le, Samir khua ah an vûi.

³Tola nûnah Jair chu Gilead thawk hen a hawng. Israel tla kum kul leh kum nih a rui na.

⁴Sanatung sâwmthum tlûnah to mi fapa sâwmthum a nei. Gilead ram ah khuapi sâwmthum an nei, chubang tla chu tutiang hen Jair khua tla an ti.

⁵Jair chu a thi le, Kamon ah an vûi.

⁶Israel tla chu LALPA tlûnah thilsual an ti fâwn le, Baal leh Astartes, Siria, Sidon, Moab, Amon leh Philistia pathian tla chu an sawnh. LALPA chu an kaltâk le, amah an sawnh mi chu an bâng rawh.

⁷Churawhchun LALPA chu Israel tlûnah a thinrun le, Philistia mi leh Amon mi tla anmah a nehtir na.

⁸Chun kum leiriat kar vial chu Gilead ram Jordan Va saklei ah Amor ram ah um mi Israel tla chu an nâuneh na hen an nehsawh na.

⁹Amon tla nih Jordan Va kanh hen Juda, Benjamin leh Efraim phun tla chu an do na. Israel tla chu hamh tak hen an um rawh.

¹⁰Churawhchun Israel tla nih LALPA chu an auh le, a sinah, ‘Na lakah thilsual kan ti le, kan Pathian chu ka nan kaltâk le, Baal chu kan sawnh rawh,” an ti.

¹¹LALPA nih hi hâwi hen a sâng na: “Amor mi tla, Amon mi tla, Philistia mi tla,

¹²Sidon mi tla, Amalek mi tla leh Meon mi tla nih chun a lânah khan an nâuneh na le, nan hawng ka auh. An lakah mi ruang kan suah na lo ma?

¹³Sikhawmsele, nan hawng ka kaltâk le, pathian dang tla nan sawnh nget rih. Churuangah ruang kan suah na awt lo rawh.

¹⁴Kal ule, nan thîm mi pathian chu auh u. Nan lawksawng liauah anmah nih an hum na seh,” a ti.

¹⁵Sikhawmsele Israel mi tla nih LALPA sinah, “Kan sual ngâk asi. Na duhzia zawng ti le, sikhawmsele zângfahtê hen tusûn ni ah ruang hawng kan suah,” an ti.

¹⁶Churawhchun ramdang pathian chu kaltâk hen LALPA chu an sawnh rawh; chun Israel tuarnâk ruangah chun a lawksawng rawh.

¹⁷Churawhchun Amon kawrsen tla nih râltuk ding hen anna timhtuah le, Gilead ah riakmun an siam. Israel tla khawm Gilead ram ah Mispah khua ah riakmun an khuar.

¹⁸Chunah mi, mi zapi leh Israel phun ruitu tla nih chun, “Amon mi tla do ding hen âu ruitu ding asi lai? Chu lakah ruitu chu Gilead ram ah mikip ruitu asi lai,” anna ti.