Read Bawm Chin LÂIRÊL 11 Bible Online

LÂIRÊL 11 - Bawm Chin bible

LÂIRÊL 11

¹Jepthah, Gilead ram ah kawrsen râlṭha chu, nunau â zuar mi fapa asi.

²A pa Gilead nih chun a nupi hen fa dang tla an nei le, an hawng lian dauh rawh chun Jepthah rangah in ah mi chu an nar. A sinah, “Kan pa lakah mi thil zeikhawm na ting lai lo; nang chu nu dang fa na si mi,” an ti.

³Jepthah chu a unau sinah mi chu a tek le, Tob ram ah a um. Mi ṭhalo murui khat a kawmh na le, a sinah an va kal.

⁴A nehnûnah veikhat chu Amon mi nih Israel tla an do na.

⁵Chu hâwi hen thil a hawng um rawh chun Gilead ram ah ruitu tla nih Tob ram ah mi Jepthah kawh ding hen an kal.

⁶A sinah, “Hawng le, Amon mi tla do ding hen hawng kan rui,” an ti.

⁷Sikhawmsele Jepthah nih, “Nan hawng ka hua tuk ah ka pa in sungkhur ah mi nan hawng ka nar kha ta a! Zeirangah tuah nan lawksawng le, ka sinah nan hawng?” a ti na.

⁸Jepthah sinah, “Tuah chun nangmah leikângah kan hawng âwn rawh, Amon mi tla hawng kan dopi ding leh Gilead ram ah mi zawzawng hawng kan ruitu ding kan duh ruangah,” an ti.

⁹Jepthah nih an sinah, “Amon mi tla do ding hen in leiah nan ka tlungpi hen LALPA nih nehnâk a hawng kan pêk mi asi chun, nan lâirêltu ka si lai,” a ti.

¹⁰Annih nih an sâng le, “Rem kan ti. LALPA chu hawng kan theihpitu asi” an ti.

¹¹Churawhchun Jepthah chu Gilead ram ah ruitu tla hen chun an kal le, an lâirêltu leh ruitu ah an siam. Jepthah nih chun Mizpah khua ah LALPA mâika ah a thilti dân ding chu a ruat.

¹²Jepthah nih chun Amon lalchem sinah, “Zei me na kan huatnâk a um? Zeirangah kan ram na hawng rûn?” ti sim ding hen mi a fial.

¹³Amon lalchem nih Jepthah mifial tla a sâng na le, “Israel tla Aigupta ram thawk hen an hawng liauah, ka ram Amon Va thawk hen Jabok Va leh Jordan Va tiang nan lâk. Tuah ṭhadektê hen nan hawng ka pêk nawlh ding asi,” a ti.

¹⁴Jepthah nih mifial tla Amon lalchem sinah

¹⁵a thusim sâng ding hen a fial nawlh na: “Israel tla nih Moab ram leh Amon ram nan lâk na ti mi chu a dik lo.

¹⁶Hi hâwi hen thil a hawng um: Israel tla nih Aigupta ram an mâk liauah ramkaro pal hen Akaba likâwlneng leiah an kal le, Kades ah an va kal.

¹⁷Churawhchun Edom lalchem sinah a ram pal siangnâk deih ding hen mi an fial. Sikhawmsele Edom lalchem nih a siang piak na lo. Chun Moab lalchem khawm an deih le, anih khawm nih a ram pal ding a siang piak na lo. Churawhchun Israel tla chu Kades ah an um ko.

¹⁸Churawhchun ramkaro pal hen an kal le, Edom leh Moab ram chu an hêl le, Moab ram saklei ah, Amon Va varâl leiah an kal rawh. Chunah chun Riakmun an khuar le, Moab ramri asi ruangah Amon Va chu an kanh lo.

¹⁹Churawhchun Israel tla nih Amor lalchem Sihon Hesbon ah a um mi sinah mi an fial le, an ram leiah kal ding hen a pal ding hen siangnâk an deih.

²⁰Sikhawmsele, Sihon nih Israel tla chu kal ding a pêk na lo. A kawrsen zawzawng a pumh na le, Jahaz ah um mun an khuar le, Israel tla chu an do na.

²¹Sikhawmsele LALPA, Israel Pathian nih chun Israel tla chu Sihon leh a kawrsen tla nehtu ah a siam na. Churungah Israel tla nih chu ram ah um mi Amor tla umnâk chu anna ting hep rawh.

²²Amor ram zawzawng, simlei kângah Amon thawk hen marlei kângah mi Jabok tiang, ramkaro saklei thawk hen Jordan Va thlanglei tiang an luah hep.

²³A mi Israel tla rangah Amor tla nartu chu LALPA Israel Pathian asi.

²⁴Lâk nawlh ding hen ma nanna tum? Nan pathian Kemos nih a nan pêk na mi zawng chu nanna ting kho. Sikhawmsele kannih lam chu LALPA, kan Pathian nih hawng kan pêk mi zawng chu kanna ting awt.

²⁵Zipor fapa Balak Moab lalchem ngâk hen ṭha dauh hen ma na ruat? Anih nih Israel tla a zuam dah na mazei? Anih nih hawng kan do dah tâwn mazei?

²⁶Israel tla nih chun kum zathum sung Hesbon leh Aroer, a kiangkam a khua tla leh Amon tivakap ah khuapi tla zawzawng khawm an luah. Chubang tla chu tutan ah zeirangah na lâk hep lo?

²⁷Nannih tlûnah zeikhawm thilsual ka ti mi a um lo. Nanmah tla nih lehlam diklo tak hen nan ka do. LALPA chu lâirêltu asi. Tusûn ni ah hin Israel leh Amon mi karah thu a thlûk lai,” a ti.

²⁸Sikhawmsele, Amon lalchem nih chun Jepthah thuchah chu zeikhawm a siarlo.

²⁹Churawhchun LALPA thlarau chu Jepthah tlûnah a hawng tlung rawh. Gilead ram leh Manaseh ram ah a kal le, Gilead ram ah Mizpah ah a hawng kîr nawlh le, Amon leiah a kal.

³⁰Jepthah nih LALPA sinah thu â tiam: “Amon tla nehtu ah na ka siam chun,

³¹râltuk neh hen ka hawng kîr tikah, ka in thawk hen hawng ka dawng masachem mi minung chu bâwlnâk thil duah rangah na sinah ka hawng pêk lai,” a ti.

³²Churawhchun Jepthah nih tiva chu tan hen Amon tla chu a do na le, LALPA nih nehnâk a pêk rawh.

³³Aroer thawk hen Minith kiangkam tla a ektê hen khuapi kul leh Abel Keramim tiang a do na. Chunah chun thahnâk fâk tak a um le, Amon tla chu Israel tla nih an neh rawh.

³⁴Jepthah chu a khua Mizpah leiah a kîr le, a fanu nih khuang tum leh lâm bû hen a hawng dawng. A fanu neihlem asi.

³⁵A fanu a muh rawh chun, a ngaihsia tukrarâi le, a puan a thlêk le a sinah, “Ka fanu! Ka thinlung na râwk thlo! Zeirangah ka lung fâktirtu na hawng si awt le? LALPA sinah thutiam bir tak ka nei le, ka lêt kho awt lo!” a ti.

³⁶A fanu nih a pa sinah, “Chu hâwi hen LALPA sinah thu na tiamh mi asi chun, na mêlma Amon mi tla lakah nehtu ah a nan siamtu LALPA sinah thu na tiamh mi hâwi hen zeital na ti ding mi chu ka lakah ti ko,” a ti.

³⁷Sikhawmsele a fanu nih a pa sinah, “Hi thil pakhat hi ka rangah hawng ka ti piak. Thla nih kar chu keimah lâwng hen hawng ka umtir le; nungâk thenhlimh si bû hen ka thi ding mi, ka ngaihsiatnâk ka hâwi le tla hen tuar bû hen tlâng ah va a sawk ding hen ka kal khonâk ding hen,” a ti.

³⁸A pa nih thla nih kar mang ding hen a kaltir rawh. Amah leh a hâwi tla hen tlâng leiah an va kâi le, fa neilo leh pasal neilo hen a thi ding mi chu ngaihsiat an tuarpi.

³⁹Thla nih nûnah chun a pa sinah a hawng kîr nawlh rawh. LALPA sinah thu a tiamh mi hâwi hen a ti le, nungâk thenhlimh si bû hen a thi rawh. Hi hi Israel lakah dân bulpi si hen

⁴⁰Gilead mi Jepthah fanu ruangah ngaihsiatnâk tuar ding hen kum siar hen nungâk tla chu ni li kar an suak.