Read Bawm Chin LÂIRÊL 12 Bible Online

LÂIRÊL 12 - Bawm Chin bible

LÂIRÊL 12

¹Efraim mi tla chu râltuk ding hen anna timhtuah le; Jordan Va tan hen Zaphon leiah an va kal le, Jepthah sinah, “Zeirangah na sinah tel bâk ding hen kanmah sâwm lo hen Amon thlâk do ding hen ramri na kanh zia? Na in ah kan duah sih rep awt,” an ti.

²Jepthah nih an sinah, “Ka mi leh kei chu Amon thlâk hen thungâi kanna êl. Kawh chu kan kawh na le, sikhawmsele nan hawng ka hum duh lêm lo.

³Nan hawng ka ṭangpi awt lo ti ka theih rawh chun thih ui lo hen ramri chu ka kanh le, ka do na rawh. LALPA nih anmah nehtu sinâk hawng ka pêk. Chu hâwi mi lakah zeirangah tuah keimah do ding hen nan hawng?” a ti.

⁴Gilead ram mi minung tla chu Jepthah nih a pumh na le, Efraim mi tla chu a do na le, a neh na rawh. (Efraim mi tla nih, “Nannih Efraim leh Manaseh ram ah um mi Gilead mi tla, Efraim lakah thawk hen tek mi nan si,” an ti.)

⁵Efraim tla tek ding mi vêng ding hen Gilead mi nih Jordan Va tan khonâk mun an lâk. Efraim tla âuzawng nih suak ding an duh mi asi chun tan ding hen siangnâk ngiar ding asi, Gilead mi tla nih, “Efraim mi ma nan si?” ti hen, an deih na lai. “Silo,” a ti chun,

⁶“Shibboleth” ti nik ne an ti ding asi. Sikhawmsele “Sibboleth,” a ti lai, fiang tak hen a lam kholo ruangah. Chun an tleih lai le, Jordan tannâk mun pakhat ah an thah lai. Chu tan ah chun Efraim mi tla sîng li leh sâng nih an thah na.

⁷Jepthah nih Israel tla chu kum ruk a rui na. Churawhchun a thi le, Gilead ram ah amah khuapi ah an vûi rawh.

⁸Jepthah nûnah Bethlehem ah mi Ibzan nih Israel tla a rui na.

⁹Fapa sâwmthum leh fanu sâwmthum a nei. A fanu tla chu phun dang rangah a umpitir na le, a fapa nupi rangah phun dang nungâk sâwmthum a lâk na. Ibzan nih Israel tla chu kum ruk a rui na le,

¹⁰a thi le, Bethlehem ah an vûi rawh.

¹¹Ibzan nûnah Zebulun ah mi Elon nih Israel tla chu kum râ a rui na.

¹²Elon chu a thi le, Zebulun ram ah mi Aijalon ramri ah an vûi.

¹³Elon nûnah, Hilel fanu Abdon, Pirathon a mi nih Israel tla a rui na.

¹⁴Fapa sâwmli leh tupa sâwmthum, sanatung tlûnah chuan mi a nei. Abdon nih Israel tla chu kum riat a rui na le,

¹⁵Churawhchun a thi le, Amalek tlâng ram ah Efraim ram ah mi Pirathon ah an vûi.