Read Bawm Chin LÂIRÊL 13 Bible Online

LÂIRÊL 13 - Bawm Chin bible

LÂIRÊL 13

¹Israel tla chu LALPA lakah thilsual an ti fâwn le, Philistia lâirêlnâk tangah kum sâwmli an um.

²Chu liauah chun mi pakhat a min Manoah, Zorah khua mi a um. Amah chu Dan phun ah mi asi. A nupi nih fa a nei kho lo.

³LALPA vânmifial a sinah â langh le, “Fa nei kholo thlo hen na um le, sikhawmsele sâwtlotê ah na râi lai le, fapa na nei lai.

⁴Uain mawh zû mawh din lo ding hen a thiamthih le, eiphung khap mi khawm ei lah,

⁵chun na fapa a hawng suak rawh chun, a sam khawm na mêt ding asi lo, a suak ni thawk hen Nazirit si ding hen Pathian sinah pêk mi asi lai. A rianṭuan chu Philistia lakah Israel mi tla ruangsuah ding chu asi,” a ti.

⁶Churawhchun chu nunau chu a pasal sinah a va kal le, a sinah, “Pathian mi ka sinah a hawng le, Pathian vânmifial hâwi hen zauh hen ṭihnung a kâi. A zei thawk hen a hawng mi me ti khawm ka deih lo, a min khawm hawng ka simh lo.

⁷Sikhawmsele, ka râi ding mi thu leh fapa ka nei ding mi thu hawng ka simh. Uain mawh zû mawh na din ding asi lo, khap mi eiphung rêng na ei ding asi lo, chu ngâksia chu a dam kar vial chu Nazirit mi si hen Pathian sinah ap ding mi asi ruangah,” a hawng ka ti.

⁸Churawhchun Manoah nih LALPA sinah thla a cham, “LALPA zângfahtê hen, Pathian mi kha kan sinah hawng fial nawlh le, chu fapa kan ring ding mi a hawng suak tikah kan ti ding dân hawng kan simh seh,” a ti.

⁹Pathian nih Manoah deih mi hâwi hen a vânmifial chu nunau sinah phâisen ah a to liauah a fial nawlh. A pasal lam chu a sinah a um lo,

¹⁰churawhchun a va tek phêt le, a sinah, “Hawng zauhnik: Nikhat ni ah a hawng a langh mi minung kha ka sinah a hawng a langh nawlh fâwn,” a ti.

¹¹Manoah chu a thawk le, a nupi chu a zûl rawh. Chu minungpa sinah a va kal le, thu a deih, “Ka nupi sinah thusimtu kha nangmah ma na si?” a ti. “Si ta a” ti hen a sâng.

¹²Churawhchun Manoah nih thu a deih le, “Na thu hâwitê hen a hawng tlung tikah, hi ngâksia nih zei a ti lai? Zei hâwi nunchan me a put awt?” a ti.

¹³Vânmifial nih a sâng le, “Na nupi nih ka sim mi thil zeizawng ti ding mi a theih ko lai rawh.

¹⁴Grep zûn lakah mi thil rerêng a ei ding asi lo; uain mawh zû mawh a din ding asi lo, eiphung khap mi a ei ding asi lo. Ka simh mi zawzawng a ti ding asi,” a ti.

¹⁵Manoah nih LALPA vânmifial asi ti a theih lo le, churuangah a sinah, “Zângfahtê hen kal lah rih, na rangah kêl fa kan suang awt,” a ti. Sikhawmsele, vânmifial nih, “Ka um khawmsele na buh ka ei awt lo. Sikhawmsele timhtuah ding mi na duh êu chun, LALPA sinah duahphung thil ap rangah mang rawh,” a ti.

¹⁷Manoah nih a sâng le, “Na min hawng kan simh ma a, na thu chu a dik tatak tikah na thang kan ṭhattir kho ding hen” a ti.

¹⁸Vânmifial nih, “Zeirangah ka min theih ding na duh êu? Min chê asi,” a ti.

¹⁹Churawhchun Manoah nih kêl la chu a lâk le, sangvut hen lung mâichâm tlûnah thilchê titu LALPA sinah a ap.

²⁰Mâichâm ah mei chu a alh rawh chun Manoah leh a nupi nih LALPA vânmifial chu meialh lakah vân leiah a kâi mi an muh. Manoah nih chun chu minung chu LALPA vânmifial asi ti a theih le, amah leh a nupi chu tual ah bawkbukhup hen an bawk rawh. Vânmifial chu an muh lo rawh.

²²Manoah nih a nupi sinah, “Pathian kan muh ruangah kan thi ding ko rawh,” a ti.

²³Sikhawmsele a nupi nih, “LALPA nih hawng kan thah ding a duh mi asi chun, kan thil ap a pawm ding asi lo; hi bang thil tla khawm hi tuah hawng kan muhtir hen hawng kan simh ding asi lo,” a ti.

²⁴Chu nunau nih fapa a ring le, a min ah Samson a sak. Ngâksia chu a hawng lian vima le, LALPA nih mal a sâwm.

²⁵Chun, Zorah leh Estaol karah Dan Riakmun ah a um liauah LALPA thiltikhonâk nih amah chu chaktir a dawmh rawh.