Read Bawm Chin LÂIRÊL 14 Bible Online

LÂIRÊL 14 - Bawm Chin bible

LÂIRÊL 14

¹Nikhat chu Samson chu Timnah leiah a kal le, chunah Philistia mi nungâk pakhat a muh.

²In leiah a kîr le, a nu leh a pa sinah, “Philistia nunau Timnah ah a um mi nungâk chu ka mêldî thlo. Keimah rangah hawng ka lâk piak u; umpi ding ka duh,” a ti.

³Sikhawmsele, a nu leh pa nih, “Zeirangah chubang lunglo mi Philistia mi sinah nupi hâwl ah na kal. Kanmah phun zawzawng lakah nungâk na tawng kho lo ma?” an ti. Sikhawmsele Samson nih a pa sinah, “Ka rangah nan hawng ka lâk piak ding hen ka duh mi tak asi,” a ti.

⁴A nu leh a pa nih hi hi ti ding hen Samson chu LALPA nih a ruat mi asi ti an theih loh, LALPA nih Philistia do ding hen tik dêngkhâwng a hâwl mi asi. Chu liau chun Philistia tla nih Israel tlûnah lâi an rêl.

⁵Churawhchun Samson chu a nu leh pa hen Timnah ah chun an va kal rawh. Chu ram mi grep dûm ah an kal liauah chakeibaknei a hûk mi hâu an theih.

⁶Mawhsareh hen LALPA thiltikhonâk nih Samson chu chaknâk a hawng pêk le, a kut karo hen kêl fa hâwi hen a dawh dip. Sikhawmsele a thilti chu a nu le a pa rangah a simh na lo.

⁷Churawhchun a kal le, nungâk chu a va sawnh le, thungâi a duh.

⁸A nehnûnah sâwtlotê ah Samson chu amah umpi ding hen a kal rawh. A chakeibaknei thah mi zauh ding hen lampi mi chu a pial le, chê tak hen chakei ruak lakah khuai nih thlâr a tuah mi a muh le, ruak sungah chun khuaitizû a um.

⁹Khuaitizû chu a kut ah kal pah hen a sûr le a ei. A nu leh pa sinah a va tleng le, tâwm a pêk na bâk. An ei bâk le, khawmsele Samson nih chakei ruak lakah a lâk mi khuaitizû asi ti a simh na lo.

¹⁰A pa chu nungâk in ah a va kal le, Samson nih puai a tuah. Chu chu tlangvâl ti dân asi.

¹¹Philistia mi tla nih an muh le, a sinah tlangvâl sâwmthum va um ding hen an fial.

¹²Samson nih an sinah, “Thu theih har ka nan deih na lai. Hi umhnâk puai lîm lân ni sarih sungah simhfiangnâk nan hawng ka pêk kho lo chun puan mangṭhia leh nipuan thleng ṭha tak châwi ding hen a kam chiau u,” a ti. Annih nih, “Thu har chu hawng kan simh me ne, kan ngâinik lai,” an ti.

¹⁴Anih nih, “Eitu thawk hen ei ding a hawng suak; Chak tak thawk hen thil thlum a hawng suak,” a ti. Ni thum nûn khawmah chu thu har chu an theih kho dah lo.

¹⁵A ni linâk ah Samson nupi sinah, “Na pasal nih hi thu har umzia hi hawng kan simh ding hen lêm rawh. Chu hâwi hen na ti lo chun na pa in kan duah lai le, nang khawm na kâng sih lai. Châwitir ding nan kan tum ruangah ma hi nan panih hen hawng kan sâwm hi, asi lo mazei mu?” an ti.

¹⁶Churawhchun Samson nupi chu ṭap bû hen a sinah, “Na hawng ka dâwt lo thlo ma hi! Na ka hua thlo ma hi! Ka hâwi le tla rangah thu har na deih le, kei khawm chu a umzia na hawng ka simh lo!” a ti. Anih nih, “Ngâinik, ka nu leh pa khawm ka simh lo mi. Nang zeitin kan simh lai?” a ti.

¹⁷Puai tuah kar ni sarih sung zawzawng chu a ṭap koro a ṭap. Sikhawmsele a ni sarih ni ah chun chu thu har umzia chu a ngiar êu ruangah a simh rawh. Churawhchun anih nih Philistia mi rangah a simh na.

¹⁸A ni sarih ni ah chun Samson chu a it mun ah a lût lânah khua mi tla nih a sinah, “Khuaitizû ngâk hen a thlum mi chu zei asi lai? Chakeibaknei ngâk hen a chak mi chu zei asi lai?” an ti. Samson nih a sâng na le, “Ka chawpê nunau hen tual nâwn lah u le chu, Tu khawmah a sângnâk nan theih lai lo,” a ti.

¹⁹Lâkkhatko ah LALPA thiltikhonâk nih a chaktir le, Askelon ah a va kal le, minung sâwmthum a thah na le, an thuam a lît piak na le, puan mangṭhia tla chu thu har sim khotu tla a pêk na. Chu nûnah chun in leiah a tlung le, chubang thil a hawng um ruangah thungâi a thin a thawk.

²⁰A nupi chu a hâwipa ṭha tak rangah an pêk tâk ving.