Read Bawm Chin LÂIRÊL 15 Bible Online

LÂIRÊL 15 - Bawm Chin bible

LÂIRÊL 15

¹Chu nûnah chun Samson chu fângzûn liauah kêl la a put le, a nupi sinah a va kal. A pu sinah, “Ka nupi sinah kardang sungah kal ding ka duh,” a ti. Sikhawmsele va kal ding a siang piak lo.

²Anih nih Samson sinah, “Na hua thlo hen ka ruat le, na hâwipa rangah ka pêk ving rawh. Sikhawmsele a naunu a mêl a ṭha dauh mi a um rih, chu chu na duhzia zawng hen a ruangrûl ah na umpi kho lai,” a ti.

³Samson nih, “Tusun lam chu hi Philistia mi tla tlûnah ka ti ding mi lakah mawh ding ka ruat lo,” a ti.

⁴Churawhchun Samson nih kâwlui zathum a tleih na. Panih vima hen an mei a peh le, a ṭêm pang le, meifâr a khih piak na.

⁵Meifâr lakah mei a hawng kaih le, Philistia phâisen ah chun kâwlui tla chu a thlah na rawh. Hi hâwi hen fâng an zûn mi lâwng a kâng lo le, phâisen ah zûn lo rih mi leh oliv mun tla khawm a kâng hep.

⁶Philistia mi tla nih, “Hi hi âu nih me a ti,” ti hen anna deih. Samson pupa Timnah mi nih a nupi amah Samson hâwipa rangah a pêktâk ruangah Samson nih a ti mi asi ti an theih. Churawhchun Philistia mi tla chu an va kal le, chu nunau chu mei hen thi thlo an duah le, a pa in khawm an duah hep.

⁷Samson nih an sinah, “Hi nan thilti lakah hi lehrûl kan sam na lân lo chu ka bâng awt lo,” ti hen thu ka tiam asi.

⁸Anmah tla chu a do na le, cherkhet a thah na. Churawhchun a va kal le Etam lungpi pûk ah a va um.

⁹Philiistia mi tla nih Juda ram ah riakmun ah khuar le, Lehi khua chu an do.

¹⁰Juda mi tla nih, “Zeirangah nan hawng kan do?” an ti na. Chun, annih nih, “Samson rêng ah thlâk ding leh hawng kan nehsawh hâwi hen nehsawh bâk ding hen kan hawng mi asi,” ti hen an sâng.

¹¹Chun, Juda minung sâng thum chu Etam lungpi pûk ah an va kal le, Samson sinah, “Philistia mi tla hi kan tlûnah lâirêltu an si ti na theih lo ma? Kan tlûnah zeirang hi hâwi na ti?” an ti. Anih nih a sâng le, “Anmah nih an hawng ka ti mi hâwitê hen kei khawm nih ka ti na bâk mi ma kha,” a ti.

¹²Annih nih, “A nan phuar pang ding hen kan hawng mi asi, an sinah kan pêk kho ding hen,” an ti. Samson nih, “Nan hawng ka thah lo ding hen thu tiam u,” a ti.

¹³“Si seh” an ti. Kannih lam chu kan phuar lai le, an sinah kan pêk awt mi cho asi. Kan thah rîlmâl lai loh,” an ti. Churawhchun rî thar siar mi panih hen an ṭêm pang le, lungpi pûk sung thawk hen an kalpi rawh.

¹⁴Lehi an va tleng rawh chun Philistia mi tla chu âu bû hen amah leiah an hawng tek rawh. Mawhsareh hen LALPA thiltikhonâk nih a chaktir le, a kut leh a bân ah mi rirual chu mei nih lazâi a khangh mi hâwi hen a sah rel.

¹⁵Churawhchun sanatung a thi mi kharuh a tawng sek. A kûn le a sar chu hen chun minung sâng khat a thah na.

¹⁶Churawhchun Samson nih la a sak le, “Sanatung kharuh hen minung sâng ka thah na le; Sanatung kharuh hen tlûn tung hen ka pawng na,” a ti.

¹⁷Churawhchun chu kharuh chu a lawnh ving rawh. Chu thil hawng tlungnâk min chu Ramath Lehi a ti asi.

¹⁸Churawhchun Samson chu thungâi a tî a hâl le, churuang chun LALPA a auh le, a sinah, “Hi nehnâk rokual tak na ka pêk le; tuah tîhâl hen ka thi awt rawh, hi Philistia lunglo mi tla neh hen ma ka um awt?” a ti.

¹⁹Churawhchun Pathian nih Lehi mun ah mi tual chu a kaktir le, tî a hawng suak rawh. Samson nih a din rawh chun a hawng a panh rawh. Chu tinung va min chu, Hakor ti asi; tu khawmah Lehi mun ah a um ko rih.

²⁰Philistia mi tla nih lâi an rêl liauah, Samson nih kum kul sung ding Israel tla a rui na.